¹ Va Jésus a-mana yambele mamba ma motchi, ndè na-lèle baduki bèndi ndé: " ² Béna leyèbi ti tsughu ka yoli ya-saale mu saade Paque; na Muaan'amutu niba-kaaba ndè mu komini ndè va kurusu". ³ Avaana kaniva bivonda bia vèghe malaghe na bivonde bia tsènge bakokena va ndanda a-Caiph. ⁴ Bo ni baghada ledita la-kuate Jésus na mu bome ndè. ⁵ Bo niba-lèle bo: " Bachi saade lo valekèse la mukungi vè, baka yitumbulu baata. ⁶ Jésus a-baade ghu Béthanie ghutso nzo Simon ngua makédi. ⁷ Va ndè baade ki tchad'atchada, mukase na-yaade ghu lidi ndè na tsèdi muyombe yi basaade na lemania li-batèdè " albatre"; tsèdi muyombe ya- lefunu bunono, ndè na- yitela yo vayulu mutsuè Jesus. ⁸ Va baduki béndi bamono bona, bo niba-mono kéchi, niba-lèle bo : " A-li lebonga la-ki" ? ⁹ Muyombo muène ba-mbé toghe ndè sombese baka vède bitutu badolo. ¹⁰ Jésus a-yaaba lo na-lèle ndé :" Béna muki lasèmbè mukase wunewu" ? Ndè tchambe li-lebuè a-chidili mè. ¹¹ Béna lilidi na bitutu tsughu yotchi to a-nème vè. ¹² Mu yitele muyombe mu-nuit'amè, ndè a-chide lo mu vange mè nuite ngana nuit'amutu wu makuada. ¹³ Mumbuli mè-lèle béne mé, mu bitchigha biotchi, tsanga yi-yibuè muène, ni bayole musama tchambe li mukase muène achidile, ni ba bangelenge ndè . ¹⁴ Mute mumochi vatso baate ba-lekumi na-boli, ndogha ndè Judas Iscariot, na -yènde ghu mbogha- abivonde bia bavèdi bia malaghe. ¹⁵ Na-lèle ndé: " Béna biki likivède mè, mu mè ki kabe ndè na-béna ? " Bo niba sosa makumi mataate ma-bitèli bia badolo va yulu mududu mu vède ndè. ¹⁶ Va kèti a-lekèse muène, ndè nasaghe lesoghe la kabe ndè nabo. ¹⁷ Letsughu latsomi la mapè mamavè nzanzena, baduki ba-Jésus nibadinge ndè na-lèlenge ndè bo: " Wè ghuni wè tonde wo bése le-lambela wè biéla bia mukungi'aPaque ?" ¹⁸ Ndè na yaghele ndé: " Yèndani ghu musènge ghu mbogh'achimbi, béna le-lèle ndè ti: "Kumu a-léli ndé, " Lekèse lème ka-bèle lekada; mè tondo tchade biéle bia Paque ghu mbogh'awè bésa baate bème. ¹⁹ Baduki ba-Jésus ni-basaade bu Jésus atome bo mu saade; bo ni-balambe biéle bia Paque. ²⁰ Mungumbi'atodo, Jésus natsaghele va ikakele bona baduki bèndi ba-lekumi na-boli. ²¹ Va bo baade ki tchade batchada, ndè na-lèle ndé: " Mumbuli mè lèle béne mé mute vatso béne va amakabe mè na na- baate". ²² Bo niba mone yibèyi chalotela, mutu mutu nabande ndè fule ndé: " A Kumu mè "? ²³ Ndè nayaghele ndé: " Wu bésa ndè letubi lekake letubu lemochi ghutso biéla, a-wona ni wu ka kaabe mè na-baata. ²⁴ Muaan'amutu ka-yèndè ayèndè ngana bu bakome mu ndè. To muchibele ghulidi wu ka kaabe Muaan'aMutu. Mutu muène mbé buédi abaade ti bayabote ndè. ²⁵ Judas wa tondo kaabe ndè, na-fule ndè ndé: " A Kumu, ni mè"? Ndè na yaghele ndè ndé:" Wè muènè wè ma-mana lo-lèlè". ²⁷ Ndè nabonge kopo, na-sambele Malumbi, navède bo ndé: Niodani kopo béna botchi. ²⁸ Muti a yineyii ni ndjin'amè, yo ni ndjine ya ndèghi ya-namanza, yii yatsolo mu chindele mabi. ²⁹ To mè-lèle béna mé mè sakabaghabele uniode malame ma mulonda -amuti wu batèdè "Vigne " nachi mè kabaghabeghele ubaniode mo na-béna ghutso Buyumene bua Taat'amè. ³⁰ Va yul'avane bo bamane mimbe yimba, bo nibayèndè ghu mukonge wa miti mia ba-olivier. ³¹ Kaniva Jésus a-lèle bo ndé; na mungumbi a-lolo, lo mè nibaade lebake la-raghese béna botchi, ngana bu bakome bo; " Mè nibome mukéli bindombe, na bindombe nibi fuada na tsamegha". ³² To va yul'avane mè kasogha, mè ka tsuame ghu Galilée". ³³ Pierre na-bongo ndaghe na-lèle ndè ndè: " Va baane botchi ba katamene wè, mè sakatamene wè vè nachi lekabaade". ³⁴ Jésus na-lèle ndè ndé:" Mumbuli, mè-lèle wè mé na butsughu bunebu, koko napa kokidi, wè nitone mè matone matate". ³⁵ Pierre na-lèle ndè ndè: " Kiti mu mè kuade besanawè, mè sakatone wè vè, nachi lekabada". Na-baduki bane botchi ni- balèle nabo tchambe ndile lo. ³⁶ Avana, Jésus na-yèndè bona baduki bèndi ghu ghu yitchigha chi batède Gethsémané, na-lèle bo ndé. "Tsaghelani vaneva mè pakaghaghe na béna muyènde ghu bondo Nzèmbi." ³⁷ Ndè na-béta Pierre na baana ba- Zébedée babaghela baboli: Ndè nabande umone paghe na mangonge. ³⁸ Ndile kava ndè lèle bo: " Mutém'amè kanimen'akade nacha leku , badani vaneva, moghani nème. ³⁹ Na-yènde va busu mua-pésa, naghudune va toto, na bondo Nzèmbi ndé: " Taat'amè, ti lo-lelidi buédi mu saade kaghele mè na kopo wu; abu mè tonde vè, ndile ngana bu wè tondo. ⁴⁰ Ndè na-baghabeghe ghu mboghe baduki bèndi, nabakese bo ndile balaase biolo, ndè na-lèle Pierre ndé: "Béna lesatughi ubaade na-bungosa mu lekèse lemochi nème vè " ? ⁴¹ Badani nabungosa, bondani muti béna leka raghe ghutso makanesa. Lénioni li-lachitese tchitsa le-lidi, to musoni ndile niwa volo. ⁴² Ndè nabaghabeghele uyènde mu leyakene la-moli, ghu bonde Nzèmbi ndé: " A taat'amè, ti bachi togha saada ti kopo wunewu akagheghe nème mè ndè uniode vè, buédi ti letondo lawè lebaada. ⁴³ Ndè naba- yighabegha, nabakese bo ndila balaase biolo,mise dibele vè na minzumbudu mia-cholo. ⁴⁴ A vaana ndè naba-niagha bo, na-bakukule va busu lékukele lékima, na bondo Nzèmbi mu leyakena la-mutata, na mabigha muène ndile nimo-nimo. ⁴⁵ Jésus aghabegha ghu mbogha baduki bèndi, na-lèle bo ndé: " Mè nuitu yiya volo yilidi mu tchambe lébene la-lase biolo. Monani lekèse libakikabe Muaan'aMutu na bapayi ka-bèlè lekaada. ⁴⁶ Tèmenani, wokani, wa kabe mè kaasa ka kukul'akukule. ⁴⁷ Va ndè baade ki-yambel'ayambela, Judas wa baada vatso baduki bèndi ba lekumi na-boli nayaada na piti'abaate yiya matenge ghu mbogha ayivonde cha bavédi ba malagha na bikutu bia tsènge. Bo ni bayaada na miboto na mayènge. ⁴⁸ Mutu wa kabe Jésus a-baade amavède bo yilémba ndé: "Wu mè ki-sambena na ndè, awone ni ndè, kuatani ndè. ⁴⁹ Va kèti'avaana, ndè nakukulu ghu pédi'aJésus, na-lèle ndè ndé : "A Kumu, wè masogha ! " Ndè na-sambena na ndè, naviva ndè maboka. ⁵⁰ Jésus na-lèle ndè ndé: " A wèyi, saade li wè yidi mu saada na mukase." Avaana kaniva bo bakukulu ghu lidi Jésus, ni bakuate ndè. ⁵¹ Mutu mumochi wa baada bona baate ba baade na Jésus, naposa léyènge lèndi ghutso yisupu, nakèse letchui la musèli ayivonde cha bavédi ba malagha. ⁵² Avaana Jésus na-lèle ndè ndé : " Ghabese léyènge lawè ghutso yisupu, muti botchi ba-bakaluane na léyènge, ni banzonzini na léyènge. ⁵³ Wè taase wo mè sa-mbé togha fulu Taat'amè mu tchindeghe mè mabèdi ma batoma ba Nzèmbi baghu yulu malotele malekumi na mabèdi moli ma batoma muène vè"? ⁵⁴ To mambe ma bakome bo mo-nimabaada, mo ka buni ma- kasopegha. ⁵⁵ Jésus na-lèle piti'abaate ndé, Béne leyidi na miboto na mayènge mukuate muyibi ? Tsughu yotchi mè bédi ghutso nzo Nzèmbi na longichingi, béne lesa kuate mè vè. ⁵⁶ Mamba muène mayaade muti mambe motchi mababighi bakome ma-kasopegha. A vaana kaniva baduki ba Jésus nibatamene ndè, nibabata. ⁵⁸ Ba-bakuate Jésus ni-babéte ndè ghu mbogha Caiphe, yivonde cha bavédi ba-malagha ghu ba Scribes bona mikute mi-miabaade mia- kokena. ⁵⁷ Pierre na dukukungu ndè mu mambisa yii na ghu nzo yivonda cha ba-bondili ba-baate Nzèmbi. Ndè ningela, na-tsaghela bona basèli bèndi mu mone ngana bu mambe makilote. ⁵⁹ Bivonde bia bavédi ba-malaghe na bangua misambe botchi niba-saghenge tchambe la- bumbanze bua kutu mu vange Jésus tchamba la-bome ndè naghu leku. ⁶⁰ Mambe ma bumbanza bua kutu ma mabaada mfuamovè, to bo basabakese tchamba ti lemochi vè. Lekèse lelota, baate boli niba-yaada. ⁶¹ Ni ba-lèle bo : " Mutu wunewu a-lèle ndé mè toghe nzo Nzèmbi nianza, mè kaghabeghele kima tonge ndile mu tsughe tata ". ⁶² Yivonda cha bavédi ba malaghe yitèmene na-lèle ndè ndé :" Wè sayaghela vè " ? Baata baneba, mambe ma bo balèle mu nuitu'awè mo mèni" ? ⁶³ Jésus na-baade ndile chui. Yivonde cha bavédi ba malaghe na-lèle ndè ndé: " Mu ndogh'aNzèmbi wu lidi moyi, mè tonde wè mu lèle bése ti wè ni Christ, Muaan'aNzèmbi"? ⁶⁴ Jésus na-yaghele ndè ndé, " Wè ma-lèle lo wè muène; to mè lèle wè mé wè nimono Muaan'aMutu atsaghele va mambaghele ma Nzèmbi ngua bungudi, nabu ndè akaba-yaade ghutso mabugi ma-ghulu. ⁶⁵ Avaana, yivonde cha ba-bondili ba-baate Nzèmbi na kasele lengoyi lèndi, na-lèle ndè : " Bésa-béne muki leki-bamonani nzale mbanza " ? Béna leyughi ngana bu ndè vongili Nzèmbi. ⁶⁶ Béne ka-buni la-taase mu saada ? " Bo ni-bayaghele bo, ndè ndile ukuada." ⁶⁷ Ni batutule ndè matè mu lebunzu, niba ghoba ndè maboto, ⁶⁸ Ni ba-lèlenge ndè bo,"Béghe mamba ma nuit'abésa, Christ. Wu bumi wè na"? ⁶⁹ Pierre a-baade atsaghela va mbèdi va yitchighe chi bamoghege, musèli wa mukase nakukule va pédi'andè, na-lèle ndè ndé: "Wè na-wè ngè wè bédi béna Jésus, muchi Galilée". ⁷⁰ To ndè natone va mise ma-baate botchi ndé, " mè sayèbi ma wè yambele mane vè ". ⁷¹ Ndè na yèndè ghu munio nzo wa yipulili, musèli mukima wa mukase namone ndè, na-lèle ba-babaade vane ndé: "Mutu wunewu na-ndè akimbingi bona Jésus wa muchi Nazareth". ⁷² Ndè na baghabeghela ndè batone letona lekima na bendegha kuluu ndé : "Mè sayèbi mutu muène vè". ⁷³ Mua mukulu pése a-lota ba-babaade batèmene vaana niba- kukulu va pédi'a-Pierre, niba-lèle ndè bo, " Avaane va la-mapfude vè, wè nawè, wè lidi ghutso lebuli muène, muti yiyèmbili chawè, cha yabese ti wè, wa ngagh'abo". ⁷⁴ Avaana, Pierre nalota ndila ghu michibela na miloghelo, na-bulunge ndé"Mè sayèbi mutu muène vè"; va kèti'avaane koko na kokidi. ⁷⁵ Pierre na-bangele mabighe ma Jésus a-lèle ndè ndé" koko na pa-kokidi, wè nitone mè matone matate". Avane kaniva ndè pola na-léla na bitchikiatchiki.