DCS-Mirror-parfait-ayanou_mev_mrk_text

Ayíɓòpɛ̀lɛ̀ 8

¹ A lúo e kílía káa, mìa gbũ vùozɛ̀ o kɛ o páà e kɛ́́à o kiè mɔ zeĩ, pɛ gbɛɛ lɛ̀ɛ́ gbaa kɛ o kɛ̀lɛ̀ ó ɓèlè. Zézu e là tɔ́à píé mia suokɛ̀ áà gèe o lɛ̀ɛ: ² « Mía o kéa o yèĩzɛ̀ lɛ́ɛ̀ m kɛ̀ ɓíì wàa lɛ̀kpàlèa yàaka kɛ m píé zèe tɛ́ pɛ gbɛɛ wɔ́ o kɛ̀lɛ̀ ó ɓèlèa. ³ Ƙɛɛ yé máà gèe o lɛ̀ɛ ó ló o píé kálémɔ lɔɔ káa, óò lo fùkɛ̀lɛ̀ zuu. Ɓíì mìa gbú óò go zì gbèkèni píé.» ⁴ Là tɔ́à píé mìa wa gèe à lɛ̀ɛ: «Mɛ́nɛ̀zàá lɛ́ o bɛi à mɔ ó kɔ̃́nɔ̃́ gɛ̄i yɛ̀í là zèe, kɛ é lɔɔ ɓo mía wɛ mɔ?» ⁵ Zézu e o wɛ̃́ĩ́lɔɔ kɛ kélɛ: «Lùpɛ̃ɛ̃ wɛɛ lɛ́ kò kɛ̀lɛ̀?» Wà gèe kélɛ̀: «O sálápèelɛ̀.» ⁶ Zézu a gèe mia gbũ yaa lɛ̀ɛ ó yà tã́ã̀. E lùpɛ̃ɛ sálápèelɛ̀a sí e Wálà sɛ̀kɛɛɓò, a yɛ́ kélékélé à nɔ̀ là tɔ́àpíémìa lɛ̀ɛ kɛ ó nɔ míáa lɛ̀ɛ, yelɛ́ là tɔ́àpíémìa wà kɛ̀ kíli. ⁷ Kpã̀ã ɓéĩ́ e kɛ o kɛ̀lɛ̀ nɔ́ kíli. Zézu e Wálà sɛ̀kɛɛɓò, ɛ̃́ɛ̃ a gèe là tɔ́àpíémìa lɛ̀ɛ kɛ ó nɔ míáa lɛ̀ɛ zeĩ. ⁸ Mia séĩ́ séĩ́ wà ɓèlè, o gí e dɔ . Yé e kɛ gbaa kília, o a kpũ kpũ e tóa wɔ́ɔ: E kòṹ vùovùo sálápèelɛ̀ pa. ⁹ Mía o kɛ yía óò bɛ̀i kɛ̀ɛ mia wáa yììsɛ ka. Yelɛ́ Zézu a gèe ó ló o pàa gbaa. ¹⁰ Yé e kɛ nɔ́ kília, e yà gɔɔ yí wa là tɔ́àpíémìa ká, wáà lo Damanutaa sɛ̀lɛ̀ yi ¹¹ F álàsímìa o nu Zézu píé o gbɛ̃ gbaa wáà téèɓò a lé wáà nãa ó à yídã. À mɔ́ɔ̀wɔ̃mɔɔ, o à gèe a lɛ̀ɛ kɛ é kpàlé wɔ̄̀ kɛ̀ kɛ á zɔ̄̀ɔ̃ kélɛ̀ yíkɛ̀gaa lɛ́ɛ̀ go wálà kɛ̀lɛ̀ lɛ̀i. ¹² Zézu è e wúu sí e gé a káa áà gèe: « Mɛɛ e kɛ̀ lɛ́ lùopɛ̀lɛ̀mɔ̀ mìa o nãa kpàlé ká ó gɛ̃ ɓe? Wã́nãwɔ̄̀ lɛ́ m gèe kà lɛ̀ɛ, kpàléwɔ̃̀ nɔ́ɔ̀fé dò lɛ̀ɛ́ ló kɛ̀ɛ ɓe ka lɛ̀ɛ lùopɛ̀lɛ̀mɔ̀ mìa.» ¹³ Zézu e o tó yi e yà gɔɔ yí zénii e ló yíía mɛ̀i. ¹⁴ Là tɔ́àpíémìa zò e ni lùpɛ̃ɛ ka. Kɛɛ lùpɛ̃ɛ kpàlà dóo lɛ́ nɔ́ e kɛ o kɛ̀lɛ̀ gɔɔ yía. ¹⁵ Zézu e lìèwè gèe o lɛ̀ɛ kélɛ̀:« Kà ka yɛ́lɛ́ kɛ kà diè píé Fálásíimìa zì lùpɛ̃ɛ fɔɔ pɛ̀ ɛ̃́ɛ̃ Élɔ́ɔdè là lùpɛ̃ɛ fɔɔ pɛ̀ɛ mɔ́ɔ̀wɔ̃̀mɔ.» ¹⁶ Là tɔ́àpíémìa o gbɛ̃̀ gbaa wáà wɔ̃́ gèe o kíè fìã wée ká kelɛ̀:« À gèe kíli ɓíì lùpɛ̃ɛ wɔ́ ko kɛ̀lɛ̀ɛ mɔ́ɔ̀wɔ̃̀mɔ.» ¹⁷ Zézu e wɔ̃́ tɛ́ o kɛ̀ à gèepɛ̀lɛ̀ɛ yídɔ̀, áà gèe o lɛ̀ɛ: «Mɛ̀ɛnɛ̃́ e kɛ̀ lɛ́ kà lùpɛ̃ɛ wɔ́ ká kɛ̀lɛ̀ɛ wɔ̃̀ gèe? Kàá a yídɔ̀ e bɛ̀i kàá yímá nɛ̃i? Kà gíkã́ wɔ́ kà kɛ̀lɛ̀ kɛ̀ɛ? ¹⁸ Ka ŋɛɛ lɛ̀ kà mɔ̀ lɛ̀ɛ́ lɛ̀ gɛ̃̀ɛ? Kà tóó lɛ̀ kà mɔ̀ lɛ̀ɛ́ wɔ̃́ maa? Kà zò lɛ̀ɛ́ vùòo? ¹⁹ Lúo tɛ́ m lùpɛ̃ɛ sɔ́ɔ́li yíkã́ã̀ kpũkpũ ká lɛ́ ka nɔ̀ mia wáá sɔ́ɔ́li lɛ̀ɛ ká? À kpũ kpũ yé tóà lɛ́ ka wɔ́ɔ́ɔ e kòṹ wɛ̀ɛ̀ pa?» Wà gèe a lɛ̀ɛ: « Kòṹ vũdóo wɛ́lɛ́pèelɛ lɛ́ e a paa.» ²⁰ È bɛ̀i lúó lɛ́ m lùpɛ̃ɛ sálápèelɛ̀ yíkã́ e kpũkpũ ká lɛ́ ka nɔ̀ mia wáayììsɛ̀ lɛ̀ɛ à kpũ kpũ yé e tóàa e kòṹ wɛ̀ɛ pa?» Wa gèe a lɛ̀ɛ: «Kòṹ sálápèelɛ̀ lɛ́ e a paa.» ²¹ Zézu a gèe zénii o lɛ̀ɛ kélɛ̀: «Kàá a yí ma nɛ̃́ì?» ²² Yé e kɛ gbaa kília, o ló o ɓɔ Ɓɛ̀tesaidaa. À lɛ̀ mɔ̀ dò o nu ŋɛɛ káa gɔ̃ dóo ká Zézu píe wáà kpé kã̀ à lɛ̀ɛ é è kɔ̀ páa mɔ̀. ²³ Zézu e gɔ̃ ŋɛɛzɛ̀ e kília kṹ e kɔ̀ mɔ̀ e gó à ká pɛ̀lɛ̀ yaa yí. Yé e e lé yìi sùo a ŋɛɛ é tó e e kɔ̀ kpɔ́ à làa, e à wɛ̃́ĩ́lɔ̀ɔkɛ̀ kélɛ̀: « Íì pɛ dò gɛ̃̀ɛ̃?» ²⁴ È e ŋɛɛ yà lɛ̀í áà gèe: «Ḿm̀ mia gɛ̃̀ wáà tààa kɛɛ o ké lɛ̀ yílí lɛ́ ɓe. » ²⁵ Yé e kɛ kília, Zézu e nĩa zèĩ e e kɔ̀ dɛɛ kpɔ́ à ŋɛɛ làa, gɔ̃́ wɛ́ e e ŋɛɛ fóló a ŋɛɛ kɛ gbaa kéléĩ́ kèlẽ̀i áà pɛ̀ séĩ́ gɛ̃̀ gbaa e yiè ka. ²⁶ Yé e kɛ gbaa kília, Zézu a gèe a lɛ̀ɛ: « é ló ì píé kɛ́ì yékɛ̀ í i diè ziɔ̃̀ɔ̃ pɛ̀lɛ̀i. » ²⁷ Zézu wà là tɔ́àpíémìa o ló gbaa Sèzalee Fílípè sɛ̀lɛ̀ kélékélévɔ yi. Yé o kɛ ló pɛ̀lɛ̀ɛ e wɛ̃́ĩ́lɔɔ kɛ̀ là tɔ́àpíémìa kɛ̀lɛ̀ kélɛ̀: « Mia óò gèe deĩ lɛ́ m ka?» ²⁸ Là tɔ́àpíémìa wa yíɓo à lɛ̀ɛ kélɛ: « Zã́ã̀ã mìa zò là pɛ́lɛ́mì lɛ́ i káa.» É tó mia dò bɛ̃̀ɛ̃ wáà gèe :«Elìi lɛ́ i káa.» e bɛ̀i zénii wáà gèe:.«Ì dɔ̀ Wálà lé là mìa wɛ dò ka.» ²⁹ Yé e kɛ kília, Zézu e o wɛ̃́ĩ́lɔɔkɛ̀ kélɛ̀: « Kà bɛ̃̀ɛ̃ káà gèe deĩ lɛ́ m ka?» Pílɛ̀ a là niã wée ká kélɛ̀: «Ɓì lɛ́ Kílísà káa.» ³⁰ Yé e kɛ kília, Zézu a gèe o lɛ̀ɛ: « Yékɛ̀ ó wɔ̃́ lɛ́ a gbɛ̃̀ɛ̃ à mɔ̀ɔ yíɓo mì nɔ́ɔ̀fé dò lɛ̀ɛ.» ³¹ Tó e gbɛ̃̀ gbaa áà pɛ̀ zɔ̃̀ɔ̃ o lɛ̀ɛ kélɛ̀: « Gɔ̃ Gbe lɛ́ɛ̀ lo wààa ɓèlèa wɔ̃́ búnùzɛ̀ wɛ̃́ĩ ɛ̃́ɛ̃́ Wálà kà wì mìa ziiziivɔ wa sálàɓò Wálà mɔ̀ mìa é dàá ká Wálà sɛ̀ɓɛ̀ dɔ̀mìa bàa, óò lo ò kɔ̀ ɓòa a wi wà zɛ, tó à lɛ̀kpàlea yàaka lùo káa, lɛ́ɛ̀ lo wɛ̀lɛ̀ ga kɛ̀lɛ̀. ³² E kɛ wɔ̃́vɔ yaa gèe pɛ̀lɛ̀ o lɛ̀ɛ e yí fɔ̃̀nɔ̃̀ɔ̃ zɛ̀ ka. Lɛ̀ e kɛ kília, Pílɛ̀ a súò kɛ̀ o pèelɛ̀ làpɛ̀lɛ̀ áà lìèwè dɔ̀. ³³ Kɛɛ Zézu e niã e e ŋɛɛ yà là tɔ́àpíémìa mɔ̀, áà gbɛɛ Pílɛ̀ là wée ká kélɛ̀: « Gó dɔ̀á m là Ɓìlìsii! ɓíì i zì zòlíét́aa wɔ̃́ Wálà zì zòlíétáa ka kɛɛ lɛ mia zì zòlíétáa ka.» ³⁴ Zézu e mia kuuvùozɛ̀ wà là tɔ́àpíémìa o pá o kièmɔ̀ áà gèe o lɛ̀ɛ kélɛ̀ « Yé mi dò à nãa é ró m píéa, lɛ̀ a mɔ̀ é e diè wɔ̃̀ dà tã́ã̀ é là kòlòwáà sí é tóà ká m píé. » ³⁵ Ɓíì mí lɛ́ e lo a nãa é e diè là kɛ̀ɓè làa lɛ́ɛ̀ lo kɔ̃́ɔ̃̀ a ka. Kɛɛ mí lɛ́ e lo là kɛ̀ɓè gínã m mɔ́ɔ̀wɔ̃̀mɔɔ ɛ̃́ɛ̃́ Wálà lé wè wɛ̃́ĩ̀a, lɛ́ɛ̀ lo laa. ³⁶ Yé mi dóo áà kpóṹlà zèe pɛ̀ séĩ́ sɔ̀lɔ̀ɓò là pɛ ká tɛ́ àa la kɛ̀ɓè gínia, mɛɛnɛ̃́ e lo a sɔ̀lɔ̀ɓòa.? ³⁷ Mɛɛnɛ̃́ lɛ ɓe kɛ mi á nɔ kɛ é là kɛ̀ɓè sɔ̀lɔ̀ɓò e mɛi? ³⁸ Mí lɛ́ e lo yɛ̀lɛ̀ kɛ̀ɛ m lɛ̀ɛ, ɛ̃́ɛ̃́ m léwè lɛ̀ɛ yìì lɛ́ kɔ́à yía káa, kɛ yɛ̀lɛ̀ lɛ́ɛ̀ ĺo Mi Gbe kɛ̀ɛ a lɛ̀ɛ yé wa Wálà là vɔ̀mìa wàa kɛ nupɛ̀lɛ̀ a Dàa zì mɛ̃́kɛ̀gbíni yía ka. Mía lɛ́ kàa Wálà tó káà lo sɔ̃̀ũ yɔɔ wa nã́ŋã́ o kã́ã̀ sí ɓɛ.»