¹ Jésus na bo ndi:" asisièlè, mè é dugho bè: bari akè ali o ngha bo y buna okua ni yughu bo akini o mono é djighi é Ndjiami na mpari è ndè ni". ² Etchughu ésiami éyiri, Jesus o yaghi Pierre bla ndè, Jacques na Jean oyéni bla bo oyulu okuri é'nini. ³ Emana, ndè okali olia o misi a bo. A mfa a ndè a ya kubughu, mpini mvuru i buna o tchuka mo a fumi vua ni. ⁴ Emana, Elie bla Moise a wasighi a ya ma bana o wobo na Jesus. ⁵ Ngha Pierre okali na Jesus ndi:" nkumu na ovè o sabè mo ka kuni, gnagha bisi lè tua èlèbè étari, omo o wè, omo a Moise omo Elie." ⁶ (Obila Pierre a ki y ya dja adugha ni, ndè a ki na vuogho). ⁷ Lénguri lè yi le wughi bo. A yughi djuhi lè wa ntsa lenguri:" yu muana mè a dia lé yugha ndè." ⁸ Ndjila kali, ntini è bo ama kèsè ompanighi é bo, bo a ka ma mono mvuru ni, ongula Jesus otu. ⁹ Ntini è bo ma surighi okuri, Jesus na bo ndi bè i dugha mvuru mami a bè lè moni ni, ndjihi na égnusighi è muana ndjiami ntsa léku. ¹⁰ Bo a kièlighi mbari djia bo a pisagha akesè bo ndi égnusighi onkèsè è bari mama kua buni. ¹¹ Bo a pisi ndè:" moma a tendi a mbari è Ndjiami ma dugha ndi Elie o sa ya na vuragha levusu?" ¹² Ndè kali bo ndi:" Elie aki oya lévusu mo yèsè mami aso. Ngha moma atendi ndi muana Ndjiami ovè o moni a mpasi o mami kuna a mana a yaghi ndè mva mvuru otsa? ¹³ Ngha mè èdugha bè Elie a mi mana o ya bo asi mami aso a bo ma dihi, mva osumbu è mbari è ndjiami è dughu o ndè. ¹⁴ Bo a yi na vuragha mpili a luoni mamo, bo abasighi bari kuna onkèsè a bo, a tendi a mbari é Ndjiami a ki ma wobo bla bo. ¹⁵ O nghingha, bo a moni ndè bo aso a moni ovè a yi mo ntini mo yamba ndè. ¹⁶ Ndè pisi na a luoni a ndè:" a bè le wobogho na bo oma?" ¹⁷ Mvuru omo o ntsa bari o kali:" nkumu mé ma ya na wè muana a mè a balagha, ndè na odidima omo ebi èligha ndè owobo. ¹⁸ O kuari ndè o pisi ndè o ntsiè, lé sa ndè otusagha awuru, ndè oya adja akèghi o sihi. meki éma pisa na luoni a ndè mo tura ndè, bo a ka buna ni. ¹⁹ Bo a kali ndi:" bari a tchughu e labi m'étima onono, a ntini kuè a mè èka bla bè? A ntini kué a mè èka na okini m'éku è bè? Le ya na mè ndè." ²⁰ Bo a y na ndè muana. Odidima na o mono Jesus ndè pisi muana nghingha o ntsa olabi. Ndè vi o ntsiè awuru a ya ma tugha m'ognua. ²¹ Jésus, o pisi na tara ndè." A ntini khuè a ndè a ma sa ntsa ngaha? " o ntsa obusi ondè" èkalighi è tara muana. ²² A ntini akè ndè a tuna ndè ntsa mba na ntsa andja ma osagha obuma ndè wè yughu a buna osa dja, mono bisi nkérighi wè yamagha bisi. ²³ Jesus o vurighi okali ndè: " yughu wè a buna wè oka na tari wè a buna" ²⁴ O nghingha, tara muana oyabighi ndi:" mè è yalagha! yiagha wè yamagha mè." Yamagha mè m'otima mè onono. ²⁵ Jesus o moni bari ma ya mpulè ndè biè na odidima ébi ndi:" wè édidima nkina mè è dugha na wè tugha, oka na gnunagha ni." ²⁶ Odidima o wuli nkima, o sèlighi o sèseghè muana, emana, ndè o tsughi. muana oya mva mvuru a ma kua ngha bari ndi :" ndè mi kua." ²⁷ Ngha Jesus o yaghi ndè o Kuogho, o sari ndè, muana o ya mo tèlè. ²⁸ Ntini è Jesus a gnunagha o ndjo, a luoni a ndè a pisi ndè ma yisighi:" moma bisi le ka buna otura odidima ki ni?." ²⁹ Ndè kali na bo ndi:" sila edidima bi o buna o tura bo me èvuonighi." ³⁰ Bo a tsièghi o ngha mo yiri ma lé Galilée. Ndè a ka dia bari a ya otchui éli bo ni. ³¹ Ndè a ki a yisagha bo. Ndè ndi: "muana ndjiami ma yo mpa o djiala è bari a buma ndè ntini ma yo o buma ndè, etchughu étari o yira ndè a gnusagha." ³² Ngha, bo a ka yugha ewobighi bia ni aki na vuogho mo pisa ndè. ³³ Bo a to Capernaum. Ntini è ndè a ki ntsa ndjo, ndè o pisi na a luoni a ndè:" bè oma lé yè na o wobo tèlè na ndjila?" ³⁴ Ngha, bo a ya pi, bo a wobighi panighi è bo tèlè na ndjila mo mvuru a vuli o kuru na. ³⁵ Ndè ki o ntsi ndè tuoli a kumi na vuèlè biri mo, émana ndè na bo ndi:" mvuru a saghi oka levusu, ovè ndè ki lembisa lè bari aso, mo djandja ma bugha aso." ³⁶ Ndè yaghi muana onkèrè ndè tsusi o mpanighi è bo. Ndè yaghi ndè ntsa djiala è ndè na bo ndi:" ³⁷ mpini mvuru a yamba muana onkerè mva yu o nkumi'è mè, ndè yambi mè sè, mvuru o yamba mè, ka me otu ndè a yamba ni, ngha na mvuru a tumi mè. ³⁸ Jean na ndè ndi: "nkumu, bisi le ma mono mvuru a tura édidima mébi o nkumi è wè, bisi lè lighi ndè, moma ndè li ka bla bisi ni. ³⁹ Ngha Jesus ndi:" bè lè ka ligha ndè ni, mvuru abuna osa djandja è mvè o nkumi è mè ognagha ndè sè o buni o dugha dja è mbi o gnuru è mè ni. ⁴⁰ Mvuru ali ka mbèlè sabè ni oli bla sabè. ⁴¹ Mpini mvuru a mpa bè kobo andja m'obila o bè leli bari aKrist, mè édugha bè asisièlè, ndè a ka yèlè wura è ndè ni. ⁴² Mpini mvuru a pisa muana o mo o ntsa bana ama yalagha mè, tata o ndè akuri ndè nkosi olomi o nki a tini ndè ntsa okéri enini. ⁴³ Yughu kugho o wè o sa wè opisagha, tsèbe tso. Tata wè baghi lè bighi kuogho otini ka wè yéni ntsa mba djiala djièlè ni, ⁴⁴ mba eli y dima ni. ⁴⁵ Yughu kulu o wè è tuma wè o va, tsèbè tso, tata o wè m'ognunagha ntsa lébighi lèli wa ni olèmè, ⁴⁶ ka ma basagha gnili djièlè wè yéni o mba. ⁴⁷ Yughu disi lè wè le sa wè opisagha, bra lo tata o wè mo ognunagha o yulu disilé mo, ⁴⁸ Ebigha è bo ikua ni mba sè i dima ni. ⁴⁹ Mvura na mvuru a yo yira ntsa mba. ⁵⁰ Ongua na ovè, ndè oyèlè mpiè è ndè, ovura ndè yo buni? Ovè leki na ongua ompanighi sabè anku, ovè leki na odusu ompanighi sabè.