¹ Ntsa étchughu bia, ékikini na bari kuna, bo a ki bila ognagha. Jésus o tuoli a luoni a ndè ndi: ² " me na nkérighi o bari ba, bo a ki bla mè étchughu étari, bo bila mo dja ognagha. ³ Mè o vura bo ma ndjo ndjala, bo ma buna o va olabi o ndjila. Akè o mpanighi è bo ma wa la". ⁴ A luoni à ndè a kali ndi:" sabè o buna obasagha pèmbè o biri è kayi mo mpa bo kuni?" ⁵ Ndè o pisi bo:" sabè pèmbè kuè?" Bo a kali ndi:" ntsami." ⁶ Ndè dughu na bari moka o ntsi o ntsiè. Ndè oyaghi pèmbè é ntsami omona ompa Ndjiami lévè, nd'otsélbi o mpi na a luoni mo tsusa o mpanighé bari, bo o tchusi onkèsè è bari. ⁷ Bo a ki na antchu ma kièghè, ndè bo o mana o mpa ndjiami lèvè, ndè o dughi na a luoni a nde m'okabagha bari. ⁸ Bo adji a moni ovè. Bo a tonighi étini mé sili: " anguli ntsami ma nini. ⁹ Bari a kighi a kuna, Jésus o vuri bo. ¹⁰ Onghingha ndè ognunighi ntsa mbungu bla a luoni à ndè, bo a yeni ntsa mpughu è Dalmanutha. ¹¹ Emana , a Pharisiens a wasighi a ya ma bana o wobo bla ndè. Bo a pisi ndè ndimi é wa yulu mo lo nde ntsa étsinighi mébi. ¹² Jésus o wumi nkara ntsa aduduma ndè ndi:" moma bari a lobi ma sagha ndimi? Asisièlè, me èdugha bè, sè ndimi mo ma buna o mpa bari a lobi ognagha." ¹³ Emana, ndè gnili bo ndè vurighi ognunighi ntsa mbungu mo vula ngulu è mo. ¹⁴ A luoni alimighi o bira pèmbè bla bo. Ntsa mbungu esili le pèmbè lè mo. ¹⁵ Ndè o yièsi bo ndi:" lè sa oyeri, o pèmbè a Pharisiens na pèmbè Herode." ¹⁶ A luoni a ndè a ya ma wobo o mpunighi è bo:" obila sabè pèmbè ognagha." ¹⁷ Jesus o balighi, na bo ndi:" moma bè lè wobo mbiri bè pèmbè kali? Bè le kini o mono ni? Bè le kini oyugha ni ? Etima é bè é mi sélèghè o sa onono? ¹⁸ Bè na misi, bè y mono ni ? Bè na atchui, be y yugha ni? Bè y yi bala ni? ¹⁹ Ntini é mè é tsébi pèmbè é tani o misi a bari, bè le biri anguli mè tini è pèmbè kuè?" Bo na ndè ndi:" kumi na vuelè". ²⁰ "Ntini é métsebi pèmbè ntsami o mpanighi bari kuna, bè lè baghi anguli kue?" Bo a kali ndè ndi "Ntsami". ²¹ Ndè ndi:" thi n'abu bè y yugha ni?" ²² Bo a to Bethesda. Bari a ngha a yi na ndè balagha a misi a ma tubugha bo a vuoni Jésus ma otila ndè. ²³ Jésus o kuari mvuru a misi mama tubagha o kuogho o biri ndè la na mpughu. Ndè o mona otura antayi o misi a ndè oleghi djiala oyulu ndè, nde pisi ndè:" wè a mono kila?" ²⁴ Ndè sari misi ndi:" mè é mono bari a ma wuana ethi mè lana." ²⁵ Emana ndè vurighi o leghi ndjiala o yula misi, mvuru o nani misi, misi a ndè a naghi. Ndè moni mami aso yémighi. ²⁶ Jesus o vuri ndè ndjo: " ka agnunaha ntsa ongundu ni." ²⁷ Jésus o tughi bla aluoni a ndè mo ye ampughu a César na a Philippe. O ndjila ndè pisi aluoni a ndè: " bo ma dugha ndi mè na?" ²⁸ Bo a kali ndi:" Jean Baptiste." Akè m'adugha:" Elie" mamo, " ntuma ndjiami" ²⁹ Ndè o pisi bo:" ngha o bè mè na?" Pierre okali ndè:" wè Krist ³⁰ Jesus oyièsi bo ndi bè y wobo o mè na mvuru ni. ³¹ Ndè bani oyisagha bo ndi muana ndjiami a yé mono ampasi o mami kuna, akuru ma yo otura ndè na ankumu a ndjo ndjiami, na a téndi a mbari é ndjiami, ma yo o buma ndè, oyisa étshughu étari ndè ognusighu. ³² Ndè dughi kari tèlè. Ngha Pierre o yaghi ndè m'osièsè mo biè na ndè. ³³ Ngha Jésus o kalighi o kési a luoni a ndè. Emana ndè biè na Pierre ndi:" vuragha na mbisa djabiri! Wè a ka gnima mami a ndjiami ni, wè ognima a bari." ³⁴ Emana ndè o kusighi bari na a luono a ndè, ndè odughi:" mvuru osagha owono mè, ovè ndè bisi mami a mo gnuru é ndè, nde biri kuri o luoni mè. Lébighi, aye ovusighi lo. ³⁵ Mpini mvuru a saghi ovusagha le bighi le ndè oyeli lo, a yeli le bighi a ye ovu. ³⁶ O mvuru a buna obagha oma yughu ndè na ènami é yula ntsiè, amana ndè yeli oduduma ndè? ³⁷ O mvuru a buna o kala o biri lebighi le ndè oma? ³⁸ Mpini mvuru a mono okuru o mè na mbari è mè o bari a lobi a nga ntsuma na mbini, muana ndjiami a djo mono okuru o ndè ntini é ndi a yo ya ntsa lekuma lé tara ndè na abandji.