¹ Lan yaapo , tin cedi tin cicili ki bangi yaa maama n tie li tanpuli Kilisiti nni ki suagi liiga leni yaa bangima n kpedi ki dagidi ki kan go guani ki bili ti tuonkpiema tanputoali tin den yie ya , ² Leni li dandanli U tienu po , leni mi batisima bangima , leni ki maani i nii ki jandi , leni ki jandi ki fiini a tinkpila , leni yaa buudi n ba yuandi ki cua . ³ Ti ba ti yaa tiendi lane U tienu yaa bua . ⁴ Kelima li pa leni yaaba n cili ki ba Kilisiti yenyenma , ki leeni U tienu paabu yaabu n ñani tanpoli po , ki go ba U tienu Fuo ŋanma , ⁵ Ki leeni ki la Utienu maama n mani maama , ki go bandi yaa diema n kpendi yaa paalu ; ⁶ Li pa leni bi po , bi yaa yaadi ban go fidi ki lebidi bi pala ki mia sugili . kelima bani bi yaaba n go kpaagi U tienu Bijua li dapoanpoanli po ki go fiagi O asala nni . ⁷ Yaa tinga n yen baadi ke ki taaga mi ki po , ki yaa pudi yaala n pia mi fuoma yaaba n ko ga po , laa tinga baadi U tienu seli . ⁸ Ama ki ya pudi i konkoni leni muadi malikonkoni , kaa pia fuoma ba kuli . ki go tie tinsolinkaaga li kan waagi leni ban juuga mi fantama . ⁹ N bua kaaba ba leni tin maadi yeni kuli , ti gu ki lee yi kani ke yi tiendi yaali n ŋani ki go dagidi leni yi tindima po . ¹⁰ U tienu tiega cain , o kan sundi yi tuonŋama leni yin den doagidi yi buama O po maama . kelima yi den todi O nigagidiŋanba hali yen moala ke yi go baa todi ba . ¹¹ Ti bua yi niini yendi yendi kuli n ŋanbi ki kubi laa yankuali hali mi juodima , lan tie yin ba yin bi sugini yaala . ¹² Yin da yualigi mani yi gbanu ,ama yin yaa togidi yaaba n baadi U tienu n niani bi yaala kelima bi dandanli leni bi ŋaniali po . ¹³ U tienu n den niani Abalahama u ñoanianu yaa yogunu O den ta wani O ba yaa yeli ki poli kelima o ba kuli ki ye ki cie O ke O baa poli li daano yeli nni . ¹⁴ Ki yedi : moamoani cain , n baa seligi ŋa ki yaa pugidi a puoliŋuani . ¹⁵ Lan teni Abalahama den juuna ki suagi liiga ki den ba U tienu n niani o yaala . ¹⁶ Bi nisaaliba yaa poli bi yen poli ki taa yua n cie ba yaa yeli . lan tie yaa ñoanianu n kali bi siiga yen teni niama kuli n gbeni . Lan yaapo yo , ¹⁷ U tienu moko den bua ki doagidi waani ke O ñoanianu kan lebidi yaaba yaa po ke O den niani ba ban baa ba yaala . ke O ñoanianu kan lebidi leni wan bili ya yanjagili , O go den poli ki pugini O ñoanianu po . ¹⁸ Laa bonliedili yaali n kan lebidi ki go doagidi ki waani ke U tienu kan pua faama ; lani n paagidi ti pala tinba yaaba n sani ki baa O po . ¹⁹ Ti pia ki muubi laa suginma ke mi tie nani o naano ñindabiagu kubikpiagili yaali n ba cuo ki sieni ku ñindapiagu kaanyendu . laa suginma pendi ku cabipigin kaabu ki kua hali deeni liiga po . ²⁰ Jesu n den kpa galiiga ki kua naani ti po . O tua yaa kopadicianbado n baa ye hali yaa yogunukuli nani Melekisedeki yeni .