¹ Yaa kopadicianbado ke bi gandi bi niba siiga kuli tie yua ke bi dini o ke o tuuni U tienu tuonli bi niba siiga . wani yen tiendi mi buama paabu padili leni ti tuonbiadi sugili miabu padili . ² O ba fidi ki juuni leni bi yanpiidanba , leni bi ni yaadikaaba po . kelima wani o ba yen pia ku tadingu mitianma . ³ Laa tadingu po n teni ke li tie tiladi won padi ki mia o yuceli tuonbiadi sugili nani wan padi bi niba po maama . ⁴ Nilo ba kuli kan teni o yuli laa kpiagidi li yaa tie ke U tienu n yini yua li po yaa ka ;nani wan den yini Alono maama yeni . ⁵ Kilisiti wani moko naa teni O yuli laa kpiagidi ki yini O yuceli kobadiciamo , ama O pia laa kpiagidi kelima yua n den yedi o : " A tie n bijua Mini n mali ŋa " ⁶ Nani wan go yedi kaanu ba maama : A tie kobadicianbado hali ya yogunu kuli nani Melekisedeki yeni . ⁷ Wane , won den ye O gbanadi nni ya yogunu , O den miadi U tienu leni a bubula leni ti ninsiidi i jandi nni ki pugi yua n ba fidi ki fabi o leni mi kuuma . O jandi den ba mi gua lebidima kelima wan den pia ya fangili U tienu po . ⁸ Ba leni wan tie U tienu bijua , O den bangi mi tuoma ya bonli yaa niini ke O den laa fala . ⁹ Wan den teni ke o ŋani ki dagidi cain li bonli kuli yeni , lan yaapo O den cuani yaaba tuo O kuli po ya tindima n kaa pia gbenma . ¹⁰ U tienu wani O yaaba n yedi ke O tie kopadicianbado nani Melekisedeki yeni . ¹¹ Lan kani , ti pia maama boncianla li po , ya bonli yaa togida n pa kelima yi suangi leni ki ga mi maama tontomi . ¹² Yinba yaaba hali yogu i bi ŋaa tua bangikaaba , ama hali yen moala ,i da go li baa bua ban cogini yi yin baa cili ki bandi yaala U tienu maama siiga . kelima yi tie nani yaaba ñu mi naaŋanma ki kan fidi ki je ya jiema n ciagi . ¹³ Ki sua yua n da li baa ñu mi naaŋanma bebe , ki bani ki gagidi yaali n tiegi leniyaali n ki tiega kelima o da baa tie canpandiga . ¹⁴ Ama ya jiema n ciagi tie a nikpela po kelima bi yantiana maani ki biigi ki gagidi yaali n ŋani leni yaali n bia .