¹ Lan wani tin fangi mani ti yula , nani ki kua O fuodima ñoanianu daa baa ye , ba ni yendo i siiga n da ti sua ke li pendi . ² Kelima tin gbadi ya labaaliŋamo yeni , bani moko gbadi o ama ban den gbadi yaa maama naa todiba li ba kuli . laa maama naa den kua bi pala nni kelima bi den luo ti dugidi . ³ Tinba yaaba n daani , ti kua laa fuodima nni nani wan yedi yaa maama yaa po : n den poli n pabienli nni ke bi kan kua n fuodima nni . O yedi yeni ba leni wan den suani ki gbeni O tuona kuli hali ŋanduna tagima yogunu . ⁴ Kelima li pia naankani ke O den maadi li danleleedili daali maama ki yedi : U tienu den fuodi leni O tuona kuli li danleleedili daali . ⁵ O go den yedi bi kan kua n fuodima nni . ⁶ Nani yaaba n den kpa ba u ñoanianu naa den fidi kua O fuodima nni kelima bi yiemia po , u folu baa ye bi tianba po ke fidi ban kua laa fuodima nni . ⁷ U tienu go bili dantoali lan tie dinla . O den kpa maadi laa maama Dafidi ñoabu nni hali yogunu ba puoli po ki yedi : " dinla i yaa gbadi O nialu yin da juagi mani yi pala " ⁸ Kelima Josue yaa den fidi ki kuanba mi fuodima nni , li puoli U tienu kan go bi maadi dantoali maama . ⁹ Lan wani U tienu fuodima daali ye U tienu niba po . ¹⁰ Kelima yua n kua U tienu fuodima nni yen fuodi leni o tuona kuli , nani U tienu n den fuodi leni O tuona maama . ¹¹ Moandi mani ki kua laa fuodima nni . o ba kuli ti siiga n da gbali ki kua kelima o yiema po nani bani yeni . ¹² Kelima U tienu maama fo ki go tuuni leni u paalu ,ki mani ki jia ki cie jugisiediñoaliedi buolu kuli , ki mudi ki koa hali deeni ki paadi o naano leni li yantiali , a tuga leni kpaba lonlo laa maama yen bigi li pali nni yanjaga leni li yantiana kuli . ¹³ Tagima ba kuli ki wuo O nintuali , ama li bonli kuli doagidi cain ki se yua ya ke ti ba fa ki togidi ti tuona kuli . ¹⁴ Lan wani , nani tin pia ya kopadicianbado yua n den kua tanpoli , lan tie Jesu U tienu bijua , tin ya se bonŋanla ya dandanli yaa niini ke ti tendi siedi . ¹⁵ Kelima tii pia ya kopadicianba n kan fidi ki gbadi ti po mi ninñinma ti tadigu nni .nani tinba , bi den tulini O li bonli kuli nni , ama waa den tieni tuonbiadi . ¹⁶ Lan wani tin nagini leni li papaali li ŋanbili bali kalikaanu kani , ki ba mi ninñingbadima leni li ŋanbili yaa yogunu ke ti bua mi todima .