¹ Li dandanli tie yua n pia ti dugidi ki bani cain ke o baa ba wan sugini ki baa yaala , ki doagidi ki wani ke o pia , ba wan kaa da nua yaala . ² Bi kpiaba n den pia yaa dandanli yaapo n teni ke Utienu tendi bi siediŋamo . ³ Li tie leni li dandanli yaapo ke ti bandi ke ŋanduna den tagi leni U tienu maama . ki teni ke tin nua yaala moala ñani tin ki nua yaala yaa niini . ⁴ Li tie leni li dandanli yaapo ke Abela den padi U tienu po yaa padili n ŋani ki cie Kayina yaali , kelima o dandanli yaapo U tienu den doagidi ki yedi ke o tiegi ki den ga o padili . li go tie laa dandanli yaapo ke o baa ki maada ba leni wan kaa ji ye . ⁵ Li tie leni li dandanli yaapo ke U tienu den taa Enoka ke waa den bandi mi kuuma baa go den laa o kelima U tienu den taa o . hali U tienu daa den taa o o den ba siedi ke o tie yua ke U tienu pali mani o po . ⁶ Lan wan yua n ki pia dandanli o kan fidi ki mangi U tienu pali . kelima li tie tiladi yua n bua ki nagini U tienu n daani ke U tienu ye , ke yaaba n lingi O kuli baa ba i panpaani . ⁷ Li den tie leni li dandanli yaapo , ke U tienu den liidi ki waani Nowe yaa bonla n baa tieni ba ke o baa kuli daa den nua la . ke U tienu fangili jeje den cuo o ke o den kpie ku ñindabiaciangu , ki baa faabi o diegunni yaaba . leni lani , o den buni ki cuo ŋanduna . o den ba U tienu kani li moamoansaali ke o tie nitegini ka yaali n baadi leni li dandanli . ⁸ Li tie leni li dandanli yaa po , ke Abalahama den tuo U tienu yiinu , ki den fii ki gedi wan baa ba ki diedi yaa diema yaa niini . o den gedi ba leni wan kaa den bani wan caa naani . ⁹ Li tie leni li dandanli yaapo ke o den gedi ki ban kali nani o nilamo yeni , U tienu n den niani o yaa tinga yaa niini . o den ye a gbandiena nni leni Isaaka leni Jakobo ban yaaba n den taani leni o ki ba laa ñoanianu . ¹⁰ Kelima o den guudi ki baa le yaa dogu yaa tanpuna n paa .naani ke U tienu wani O yaaba , n tie yua n diani laa dogu ki go tie u maalo . ¹¹ Li tie leni li dandanli yaapo ke Sala o yaaba , baa leni o bina n den pendi leni wan ma , U tienu den teni ke o fidi ki ba u buolu , kelima o den dugi yua n niano yeni yaapo . ki bani ke O tie dugika . ¹² Lan yaapo , leni jayendo , ba ke o den podi ki cuaga , o den mala yaa puoliŋuani n kaa pia cuali nani tanpoli ŋmabina , nani yaa tanbiima n ye mi ñincianma kunu ban kan fidi ki cuadi yaama . ¹³ Bi kuli den kpe leni li dandanli kaa den fidi ki ba yaa bonla ke U tienu den nianba , ama bi den tuodi ki la laa bonli kuli hali fuagima ki den mangi bi pala li po ; ki tuo ke bi tie canba leni sancenba ŋanduna nni . ¹⁴ Yaaba n maadi yeni doagidi ki wani ke bi lingi bi doguceli . ¹⁵ Bi yama yaa den baali ban den ñani yaa dogu po , bi den baa fidi ki guani li po . ¹⁶ Ama bi den lingi yaa dogu n ŋani ki cie ; lan tie tanpoli diema . lan yaapo laa pia U tienu po fe leni wan tuo ke bi yini O bi Tienu . kelima O bogini bi po u dogu . ¹⁷ Li den tie leni li dandanli yaapo , Abalahama ki baa padi Isaaka , U tienu n den biigo yaa yogunu ke o den tuo ki baa padi o bonjayenyenga baa ke o den ba U tienu ñoanianu . ¹⁸ Wan yua ke U tienu den niani o ki yedi : leni Isaaka yaa kani a baa ba u puoluŋuanu . ¹⁹ O den tia ki bani ke U tienu pia u paalu , O baa fidi ki guani ki fiini ba a tinkpila . lan yaapo O baa fidi ki guani ki fiini Isaaka baa o yaa kpe . ²⁰ Li den tie leni li dandanli yaapo , ke I saaka den gaali Jakobo leni Esayu kelima yaali n kpendi yaa po . ²¹ Li tie kelima li dandanli yaa po Jakobo wan den baa kpe yaa yogunu , o den ñii o gbianu yuli po ki gaali Josefi bila , yendi yendo . ²² Li den tie leni li dandanli yaapo , Josefi n den nagidi mi kuuma yaa yogunu , o den maadi I saleleenba yaaba buolu ñama Ejibiti diema nni , ki go den bili li ñoabonli yaali n tie o tinkpikpaba maama . ²³ Li den tie leni li dandanli yaapo , ke Musa madi yogunu , o danba den wuoni o hali ŋmaali taa . kelima bi den sua ke ki bigi yeni den ŋani , baa den jie o bado ñoabonli . ²⁴ Li den tie leni li dandanli yaa po , Musa n den fandi , o den yie ban yino Falono bisalo bijua . ²⁵ O den faadi ki taani leni U tienu niba ki lee fala ki cie wan mangi o pali leni ti tuonbiadi yemanma o yogunu waamu bebe yaa po . ²⁶ O den nuanla ke o yaa laa i fee nani Kilisiti yeni li tie o po piacianma ki cie Ejibiti ŋalimano kuli , kelima o den nua wan baa ba yaa panpaani liiga . ²⁷ Li tie leni li dandanli yaapo , ke o den ñani Ejibiti dogu nni , kaa jie Ejibiti bado pabienli . o den se ke li pa o yanjagili nni kelima o den nua o baa kuli n ki nua yua . ²⁸ Laa dandanli yaa po o den teni ke bi bogini ki tieni pak , mi pendima janma ,ke bi go den mii mi soama bi dienna buliñoana po . lani n tie mi kuuma Maleki n da sii Isaleleenba yaaba bonjakpiala . ²⁹ Li de n tie leni li dandanli yaapo , ke Isaleleenba yaaba den tagini mi ñincianma nani ki tinkuongi yeni , ama Ejibiti yaaba , yaaba n den biiga ki baa laa ñincianma siiga , mi den naliba . ³⁰ Li tie leni li dandanli yaapo , ke Jeliko bilinciamu den baa yaa yogunu ke Isaleleenba yaaba den cuoni ki lindi u hali dana lele . ³¹ Li tie leni li dandanli yaapo , ke li poconconli Lahaba ki den taani ki bodi leni U tienu niyiekaaba kelima o den gaa Isaleleenba niba yaaba n den cua ki baa diidiu dogu . o den ga bi cangu bonŋanla ki den todiba . ³² N go baa yedi be ki pugini ? mii pia o yogunu ki baa maadi Jedeyono maama leni Balaka , leni Samisona , leni Jefite , leni Dafidi , leni Samieli , leni bi sawalipuaba yaa maama kuli . ³³ Ban kuli leni li dandanli , bi den koani ki paadi i dogi ki tieni yaali n tiega ki go den baa Utienu n nianba yaala , ki den luoni i yangbanli ñoana , ³⁴ Ki den gbindi mi fantanbiadima jama , ki sani ki ciadi leni mu jugisiemu , ki paagi leni i yiani , ki tie jakoanda bu toabu nni , ki teli bi nilanba toa tuada . ³⁵ Puotanba den laa bi kpiiba ke bi den guani ki fii bi tinkpiba siiga . bi waani bi tianba fala hali ke baa den tuo mi faabima kelima bi bua ki baa yaa tinkpifiima n ŋani ki cie . ³⁶ Bi den ñuadi bi ne , ki puaba leni i febi , ki loli ki kpa bi tianba , ki kuani bi ne a kpaadi diena nni , ³⁷ Bi den teni ke bi lugidi bi tianba a tana , ki jia ki jendi bi ne , ki waanba o falaciamo , ki kpa bi tianba leni mu jugisiemu , bi tianba den yie ti pegbandi leni ti ŋuagbandi ki caa i kankaani kelima bi den luo li bonyiekaala , , ke bi niba den bia bi po , ki go wangiba fala , ³⁸ ŋanduna naa den dagidi kaa pia laa nimoanba , bi den gaandi mi fanpienma nni leni a juana nni leni ti jualondi nni , leni i tinfali nni . ³⁹ Ba ke ban kuli den baa ke U tienu tieni bi po o siediŋamo kelima bi dandanli yaapo , baa den ba wan den nianbi yaala , ⁴⁰ Kelima Utienu n den jagi ti po yaa bonŋanla yaapo teni ke bi kan fidi ki ŋanbi ki dagidi cain li yaa tie leni tinba yaa ka .