¹ U tienu balimaama yaama n pia yaa bonŋanla n kpendi yaa junjungu ke li naa tie li moano ka kan fidi faabada ba leni a pada ya ke bi tiendi o yogunu kuli binli nni , ki teni yaaba tiendi laa pada n dagidi cain . ² Lani yaabi baa tuo , bi kan go bi yaa baa pada kelima yaaba n tiendi laa pada , bi yaabi ba fidi ŋanbi cain yenma , bi kan go bi yaa ba ki pia bi tuonbiadi siedo bi pala nni . ³ Ama bi tuonbiadi tiadima po yen teni binli kuli ban padi . ⁴ Kelima li kan tuo a naatona leni a pudibuana soama n fidi ki ñani ti tuonbiadi . ⁵ Li tie lan yaapo ke Kilisiti n den kua ŋanduna nni yaa yogunu , O den yedi : ŋaa den bua padili baa kuli bi , paabu ba kuli , ama A den tagi n po ti gbanandi . ⁶ ŋaa go den tuo ki ga a padijukaana bi , ti tuonbiadi sugili yaa pada . ⁷ Lan wani n den yedi : diidi , n cua ki baa tieni a yanbuama U tienu kelima li balimaama tili nni li den maadi min yaa maama yo . ⁸ O den kpa yedi : ŋaa den bua , ŋaa go den tuo ki ga a pada bi , bu paabu ; baa padijukaali bi , ti tuonbiadi yaa pada . ba ke laa pada den ŋua li balimaama n bili maama . ⁹ O den yuandi ki yedi : diidi n cua ki baa tieni a yaa yanbuama ; lan tie ke o bolini li bonciala kelima o bua ki kaani li bonyuanla . ¹⁰ Laa yanbuama yaa po n teni ke ti ba mi candiŋanma kelima Jesu Kilisiti den puni O gbanandi nani li padili yeni yenma yua kuli po . ¹¹ Kopadicianmo kuli yen se o tuonli kaanu daali kuli ki tuuni li kopadiciantuonli , mi tianma , o yen padi padibuoyendu , yaa pada n kan fidi ki ñani ti tuonbiadi hali abada . ¹² Ama kilisiti wani , O den tieni padiyenli bebe ti tuonbia po , ki yuandi ki ban kali o yogunu kuli po U tienu balikalikaanu jieno po . ¹³ O gu moala O yibalinba n tua o taaŋmaakaanu . ¹⁴ Kelima wan puni O yuli maama yenma yeni , O teni ke wan gagidi ki ŋanbi yaaba leni o soama yeni , ke bi dagidi cain o yogunu kuli po . ¹⁵ U tienu fuomi yua moko tieni ti po siedi ke li tie yene . kelima O den kpa yedi : n baa kuani bi po yaa ŋantaado n tienna , ¹⁶ O Diedo go yedi yaa dana tienna yaa pendi n baa tieni n balimaama bi pala nni n go baa dianma bi yantiana nni ¹⁷ O go den pugini ki yedi : n kan yaa tiadi bi tuonbiadi po , n kan go yaa tiadi ban tieni yaa tudima . ¹⁸ Lan wani , ti tuonbiadi sugili n ye naan kani kuli , padili naa go ye ti tuonbiadi po . ¹⁹ Lan yaapo n kpiiba , nani tin baa jii fidi ki kua u kaangagidi ŋamu nni kelima Jesu soama po , ²⁰ O den luodi ti po yaa sanpaanu n fo ki pendi bu kpalidoaginkaabu , lan tie ti gbanandi . ²¹ Nani tin pia yaa kopadicianbado yua ke bi dini U tienu diegu po yeni , ²² Lan wani tin nagini U tienu leni payenli ke ti pala gbie leni li dandanli , ke ti pala siedo joagindi ŋuudi ki ñani , ti gbanandi moko ŋuudi leni mi ñinŋanma . ²³ Tin kubi bonŋanla tin pia yaa suginma siedo kelima yua n nianti u ñoanianu tie dugika . ²⁴ Tin yaa faami mani ki guu ti yaba , ki tigini ti yaba mi buama leni a tuonŋama nni . ²⁵ Tin da ŋa mani ti tanma nani bi tianba n maani maama , ama tin yaa paagidi ti lieba pala , nani yi moko n nua ke O Diedo daali nagidi yeni . ²⁶ Kelima ti yaa bandi i moamoani , ki nan go yuandi ki tiendi ti tuonbiadi leni ti yanbuama , padili naa go ye ti tuonbiadi po ²⁷ Ama yaa cuonu n bia , leni mi fantanbiadima gu ki baa bolini bi niyiekaaba . ²⁸ Yua n den miidi Musa balimaama kuli , tie yua ke bi baa kpa o ke ninñingbadima kuli ki ye ; siedinba lie bii bi ta ñoabu nni . ²⁹ Lan wani , yua n fali U tienu bijua ki nua ke o ŋantaado yaa soama yaama n den ŋuudi ki ŋanbi o yeni tie fanma , ki go sugi li ŋanbili paabu fuoma , naani o yaa cuonu ka baa yaa bia ki cie ? ³⁰ Kelima ti bani yua n den yedi : Mini n tie yua n yen tuu li panli Mini n tie yua n baa tuu yi biadima panpaani . O Diedo go den yedi : O Diedo baa jia o niba buudi ³¹ Li tie yaa bonla n bia ki i jeje hali boncianla yua n ba U tienu yua n fo nuunni ³² Yin tiadi mani yaa dana n pendi po ; yaa yogunu ke yi yama den yendi , ke ba leni fala siiga yi den moani li moacianli ki den se ke li paa lienni . ³³ mi tianma bi yen fiagi yi ki go wangi yi fala bi niba kuli nintuali , yogunu baa mo , yi yen taani yen ban wangidi yaaba fala . ³⁴ Yi den pia mi ninñingbadima a kpaada po . yi go den tuo ki mangi yi pala leni bi niba n den fie yi piama , kelima yi bani ke yi pia yaa ŋalimano n ŋani ki cie ki go baa ye o yogunu kuli . ³⁵ Lan wani , yin da ŋa mani yin pia yaa dugidi yaadi n pia yaa panpaani n yaba . ³⁶ Kelima li pundi yin yaa se ke li pa , lani n tie ke , yi yaa tieni U tienu yanbuama ki dudi , yin baa wan den niani yi yaala . ³⁷ Li go sieni u yogunu waamu bebe , yogun jenjenga , ke yua n ti cua n cua ke li kan waagi . ³⁸ N nitegini ka baa ye ki fo kelima li dandanli po , ama o yaa guani puoli n pali kan mangi o po . ³⁹ Tinba wani , ti naa tie yaaba n baa guani puoli ki bia ka ; ama yaaba n pia li dandanli ki baa ciadi bi naani .