1 Lankuli n den pendi tieni ki gbeni, Isalele yaaba yudanba bi tianba den cua n kani ki yedi nni: "Isalele yaaba kopadicianba leni Lefi buolu yaaba leni bi nifanba naa den gagidi bi yula ki paadi leni ya nilanbuoli n ye ya diema n tie ne niinni. Bi tuuni a cancangintuona ki togidi Kanana yaaba, Heta yaaba, Felesa yaaba, Jebusa yaaba, Amoni yaaba, Moabi yaaba, Ejipiti yaaba leni Amola yaaba tuona. 2 Kelima bi taa bi nilanba yeni bisiaba leni bi bijaba po ki tieni bi puoba. Li teni ke ti nibuolu yu n gagidi U Tienu po kali kali leni ya nilanbuolu n ye mi diema ne niinni. Bi yudanba leni bi bujiaba n cili laa tuonbiadi." 3 Min den gbadi lani, n pali den boandi ke n padi n tiayiekaadi leni n kpaligolikaabu kuli, ki ŋabi n yudi leni n langbiadi, ke n gbanu wudi ke n kali. 4 Isalele yaaba Tienu maama n den jieni yaaba kuli kelima yaaba n den ñani ti yonbidi nni yeni n den tieni ya tuonbiadi po, den taani n kani. Nmo, n gbanu den wudi ke n kaa hali ki pundi ku yenjuagu padili yogunu. 5 Ku yenjuagu padili yogunu n den pundi, n den fii min den boandi n pali ki jiini n yuli ki kaa naakani yeni ki laa n tiapadindi yeni. N den gbaani ki yugidi n nii ki tandi ki tegini Li Miali Diedo n Tienu. 6 Ki yedi o: "N Tienu i fe pianni ke n yuli tiibi. N Tienu n kan fidi ki yaadi n yuli ki diidi a. Kelima ti tagili yabidi hali ki mibidi ti, ti tuonbiadi dogini ki pundi tanpoli. 7 Hali ti yaajanba yogunu ki taa ki pundi halimoala, ti tieni ti tuonbiadi boncianla. Li tie ti tuonbiadi po ke a den taati, tinba leni ti badiba leni ti kopadicianba ki teni i nilanbuoli badiba nuunni ke bi den tuogi leni ti bu toabu ki paadi ti, ki fagi ti ki geni ti ti yonbidi ke dinla i fe kubi nni. 8 Ama baa yeni Li Miali Diedo ti Tienu gbadi tipo mi niñima ya yogunjenjenga n tie na po ki teni ke nitianba faabi, ki go puni u kuakaanu a kaangagidiŋamu nni. Yeni ki yendi ti nunmu ki faabi ti ti yonbidi siiga. 9 Ti den ye ti yonbidi nni ama ŋaa ŋa lienni ti bebe. A teni Pelisa diema badiba gbadi tipo mi niñima ki cedi ke ti ye ki fo ki goa ki maa fini ti Tienu diegu yaagu n den mudi, ki teni ke ti baa kuakaanmoanu Juda diema nni leni Jelusalema nni. 10 Moala, ti Tienu, ti baa yedi be, lankuli yaa puoli? Kelima ti yie ki ŋa a balimaama, 11 ŋan den bili tipo yaama ki teni ke a sawalipuaba pua sawali ki tua: 'Yin caa ya diema nni ki baan diedima yeni tie ya diema n joagini kelima ya nibuolu ye mi niinni joagindi po. Bi gbieni ma bi cancancagintuona ki cili nepo ya kunu ki gedi hali nepo ya kuni. 12 Lani yaapo yin da pa yi bisiaba bi bijaba, yin da todiba bi yema n mangi ban baa mi yanduanma. Lani yi baa baa u fidu, yi baa je mi diema n pia ya bonŋanla ki ŋa man tua faali yi bila po hali ya yogunu kuli.' 13 Fala cuo ti kelima tin den tieni ya tuonbiadi leni ya tagiliciami po. Ama baa yeni, ti Tienu ŋaa waani ti fala nani ti tuonbiadi n den pundi maama. A go kubi tinba ya niba n sieni ti yonbidi nni ke ti ye. 14 Naani lankuli ya puoli ti go baa miidi a kuali ki taa ya nibuolu n tuuni li cancangintuonli ne bisiaba ki go teni ba ti ya bisiaba bi? Naani a pali kan fii ki pebidi hali ki kan ŋa liba? 15 Li Miali Diedo, tinba Isalele yaaba tienu, a tiegi. Ama a teni ke nitianba faabi. Diidi, ti ye a nintuali leni ti tuonbiadi, ama ti kan bi baa ki ya ye a nintuali leni ti tuonbiadi."