1 Diidi ya diedanba n den yegi leni nni ki ñani Babilona Alitakiselisesi bali yogunu yela leni bi coali: 2 Fineya buolu nni, Gelisoma, Itamali buolu nni Danieli, Dafidi buolu nni Hatusi Sekania bijua. 3 Sekania bijaba, Peleyosi Sakali leni o diegu nni yaaba jaba kobiga n piimu. 4 Pasati bijaba Moabi buolu Eliyonayi, Seleya bijaba o den yegi leni jaba kobilid. 5 Sekania bijaba, Jakasieli bijua leni jaba kobita. 6 Odini buolu nni, Jonatan bijua Obedi, o den yegi leni jaba piimu. 7 Elami bijaba, Esayi, Atalia leni jaba piilele. 8 Sefatia buolu nni, Mikayeli bijua Sebatia leni jaba piinii. 9 Joabi buolu nni, Jehieli bijua Abidiasi leni jaba kobilie n piiga n bonba nii. 10 Selomoti buolu nni, Josifia bijua leni jaba kobiga n piiluoba. 11 Bebayi buolu nni, Bebayi bijua leni Sakali leni piiga n jaba nii. 12 Asigali bijaba nni, Hakatami bijua Yohanana leni jaba kobiga n piiga. 13 Adonikami bijaba nni, Elifeleti, Jeyeli, Semayeja bani yaaba ya yela n den juodi. Bi den yegi leni jaba piiluoba. 14 Bigifayi bijaba nni, Utayi, Sabudi leni jaba piilele. 15 N den taani laa niba kuli ya kpenu n puubi ki caa Ahafa. Ti den tieni likani dana ta. N den diidi li nitaanli leni bi kopadicianba, mii den la bi siiga Lefi buolu yaaba oba kuli. 16 Lanwani, n den yini bi yudanba Elieseli, Etieli, Semayeja, Elinatami, Jabili, Elinatani, Natan, Sakali leni Mesulami leni li balimaama bangikaaba Jojali leni Elinatani. , 18 Nani U Tienu nuu yu n ŋani n den ye leni ti yeni po, bi den cuani tipo Selebia yua n den tie yanfodaana ki tie Mikali bila siiga yua Jakobo bijua Lefi buolu yua.Bi den cuani wani leni o bijaba leni o naataani ke bikuli taani ki tie piiga n niba nii. 19 Maleli bijaba nni, bi den cuani Hasabia leni Esayi bani leni bi naataani leni bi bijaba ke bikuli taani ki taani tie niba piiie. 20 Natania buolu yaaba, Dafidi leni bi yudanba n den puogi yaaba ban ya tuuni Lefi buolu yaaba po moko bi den cuani niba kobilie n piilie ban den gandi yaaba. 21 Ahafa kpenu yeni kani n den bili li ñoabonli ketin loli bu ñoabu ki miini tiyula ti Tienu kani ki mia o ke wan pa ti li sancenŋanli tinba leni ti bila leni tin die yaala kuli po. 22 Ife den baa cuo nni n ya den baa mia o bado a minteela leni bi tanjagiba yaaba n baa guudi ti leni ti yibalinba ti sancenli nni, kelima ti den yedi o bado: U Tieni nuu ye leni ti, tinba yaaba n lingi yaala n ŋani kuli. Ama o paalu leni o pabienli ye yaaba n ŋa o po. 23 Li tie lani yaapo ke ti den loli bu ñoabu ki jaandi ki yini ti Tienu yeli, ke o mo den guani ti jaandi. 24 N den gandi bi kopadicianba yudanba piiga n bonba lie. Selebia, Hasabia leni bi naataani siiga piiga. 25 N den biigi bi nuntuali iligi, ŋalinjufa o bado, o tundikaaba, bi nikpeliba leni Isalele yaaba yaaba n sieni n puni yaala bi yanbuama po. 26 N den teni ba ŋalinjufa kilo tuda piilie, ya kumoandi n tie ŋalinjufa kilo tuda piita leni wula kilo tuda piita. 27 Wula taditi bondi piilie ke ti dunga tie wula kujapiena tudili leni ya kumoandi n ñuliti ya boba bona lie. Laa boba den ŋani boncianla ki pundi wula. 28 Lanwani den yedi: Yi tie yaaba n gagidi Li Miali Diedo po, ti naa moko gagidi Li Miali Diedo po. Ya ŋalinjufa leni ya wula n ye ne tie yi yanbuama paabu Li Miali Diedo yi baanba Tienu po. 29 Yin ya fangi ki kubi laa bonla bohanla hali yin baan biigi laa ŋalinjufa bi kopadicianba Lefi buolu yaaba Isalele yaaba diedanba kani, Li Miali Diedo diegu nni ya yogunu. 30 Lani bi kopadicianba leni Lefi buolu yaaba den ga ban den biigi ya ŋalinjufa, ya wula leni ya tiadi n sieni kuli ki baa gedini Jelusalema ti Tienu diegu nni. 31 Ti den fii Ahafa kpenu kani ki baa gedi Jelusalema ciyendo dankpiali daali. Ti Tienu nuu den ye leni ti ki kubi ti leni ti yibalinba toabu nni leni ban den dia ti ya diadi kuli li sancenli nni. 32 Tin den pundi Jelusalema, ti den fuodi dana ta. 33 Li dannaali daali, ti den biigi ŋalinjufa wula leni ya tiadi n sieni kuli U Tienu diegi nni ki teni o kopadiciamo Ula bijua Melemoti, o den yegi leni Elayasala Fineya bijua leni Lefi buolu yaaba Josue bijua Josabati leni Binuyi ya bijua Noadia. 34 Tin den biigi likuli,li coali leni leni li kpiagu, ti den diani likuli kpiagu n da maama 35 Yaaba n den ñani ti yonbidi ki kpeni den padi a padijuukaana Isalele yaaba Tienu po piiga n naatona lie, piiga n petona luoba, piilele n pebila lele leni piiga n pudibuana lie ki mia bi tuonbiadi sugili, ke likuli den tie padijuukaana Li Miali Diedo po. 36 Li ya puoli bi den ca bi yudancianba leni u kpenu kandima gufeneelinba o bado ñoabona. Lanwani bi den todi Isalele yaaba U Tienu diegu tuonli po.