Esidilasi Diani 7

1 Laa bonla kuli n den pendi Pelisa bado Alitakiselisesi bali yogunu, Esidilasi yeni den tie Selaja bijua Ajalia bijua ŋilikija biga, 2 Salume bijua, Tisadoke bijua, Asitu bijua , 3 Amaliya bijua, Asalia bijua, Madayoti, 4 Sadakiŋia bijua, Usii bijua, buki bijua, 5 Buki n maa Abisua, Abusua n maa Finesi, Finesi n maa Eleasala, Eleasala n maa Alono, o kopadiciamo. 6 Laa Esidilasi n den ñani Babilona, ki goa ki kpeni Jelusalema. o den tie li balimaama bangika ki bani Li miali Diedo Isalele yaaba Tienu n den teni Musa ya balimaama hali boŋanla. o bado den teni o wan mia o yaala kuli kelima Li miali Diedo o tienu den ye leni o ki ŋanbidi o po. 7 O bado Alitakiselisesi bali binleleeli binli Isalele yaaba siiga boncianla, leni bikopadicianba, leni Lefi buolu yaaba , leni bi yanyanba, leni a buliñoaguuda leni U tienu diegu naacenba bi tianba den yegi leni Esidilasi ki kpeni Jelusalema. 8 Esidilasa den pundi Jelusalema o bado binleleeli binli cimuulo. 9 O den fii Babilona o ŋmakpialo dankpiali daali kelima U tienu den ye leni o ki kubi o. 10 kelima Esidilasa den kuani o pali nni ki bangi Utienu balimaama ki go kubima ki tieni manyedi yaala , ki go bangi Isalele yaaba U tienu balimaama leni o ñoabonbilikaana kuli. 11 O bado Alitakiselisesi den diani li tili ki teni Esidilasi yua n den tie o kopadiciamo leni li balimaama bangika ki go dangi Li miali Diedo n den bili ya balimaama leni ya ñoabonbilikaana Isalele yaaba po. li tili yeni maama n den tie mine. 12 Alitakiselissi bi badiba bado n diani fini Esidilasi po ya tili n tie ne, fini yua tie o kopadiciamo leni li balimaama bangika ki bani boŋanla U tienu yua n die tanpoli balimaama... 13 N ñani li ñoabonli ki yedi ke Isalele leni bikopadicianba leni Lefi buolu yaaba yaaba n ye n diema nni kuli ki bua ki fii ki yegi leni a ki gedi Jelusalema kuli, ban cedi ban gedi. 14 Mini o bado leni n tundikaleleediba n soani a ŋan ban goandi Juda diema leni Jelusalema kuli, ki bandi li bonla kuli ya cuoni ŋua a tienu balimaama, yaama n ye a nuu nni yeni. 15 A ya caa ŋan taa mini o bado leni n tundikaaba yeni n puni yanbuama paabu ya ŋalinjifa leni ya wula Isalele yaaba tienu yua yaa diegu n ye Jelusalema po. 16 ŋan go taa yaaba n ye Babilona diema nni kuli n puni ya ŋalinjifa leni wula, leni Isalele yaaba leni bikopadicianba n puni ya paabu bi tienu diegu yaagun ye Jelusalema. 17 ŋan kubi laa ligi boŋanla ki ban da a naatona leni a petona leni a pebila leni yaala n baa dagidi mi pienma pada leni a ñincaba po kuli ki padi li kuli a tienu diegu ya padibinbinli yaali n ye Jelusalema po. 18 Fini leni a kpiiba baa juogi ki bili yin ba tieni yaala leni ya ŋalinjifa leni ya wula n ba sieni, ki ŋoadi yi n bua maama. 19 Tin den teni ya tadimu a tienu diegu tuonli po, ŋan gedi ki ban bili mu wani U tienu diegu nni Jelusalema po. 20 ŋan gon baa bua ya ligi a tienu diegu po, ŋan ga yi mini o bado ŋalimanbilikaanu nni. 21 Mini o bado Alitakiselisesi n ñani li ñoabonli ke ya ŋalimankubida n ye yufilata nintuali yaa diema nni kuli n jaligi ki teni Esidilasa yua n tie o kopadiciamo leni U tienu balimaama bando, ki bani tanpoli tienu balimaama bŋanla, wan miaba yaala kuli. 22 Ban teni a hali ki pundi ŋalinjifa kilo tuda naa, leni mi kpama kilo tuda piita, leni duven litidi tuda naa, leni mi kpama litidi tuda naa, leni ya yaama n baa dagidi kuli po. 23 Yin jaligi ki tieni Utienu yua n die tanpoli n puogi yaala odiegu tuonli po kuli, ke a pali n da ti be n diema po leni mini o bado leni n jaba po. 24 Ti go bua ki waani yi ke yin da ga bi kopadicianba kani leni Lefi buolu yaaba leni U tienu diegu yanyinba leni li buliñoaguuda leni li naacenba, leni yaaba n tuuni U tienu diegu nni kuli kani bancanli bi lubili bi isani taginma ligi. 25 Fini Esidilasi mo ŋan dini yaaba n baa ya ja ti buciandi leni ti buwaadi Isalele yaaba po, bani yaaba n ye yufilata diema nintuali kuli ki bani a tienu balimaama ŋan dini ba nani U tienu yanfuoma yaama n ye a niinni n waani a maama yaaba n daa bani Untienu balimaama mo ŋan bangi ba. 26 Yua n yie kuli kaa kubi a tienu balimaama leni mini o bado ya balimaama cain kuli, ban jia leni o ti buudi ki kpa o yaka ban ñani o olieba siiga yaka ban fie o bonpiakaala yaka ban kuani o li kpaadieli nni. 27 Esidilasi den jaandi ki yedi: Ti tuondi ki kpiagidi Li miali Diedo, ti yaajanba tienu, yua n den kuani o bado yama nni ke wan jigini Li miali Diedo diegu yaagu n ye Jelusalema. 28 Ki go teni ke n ba ki nunmanga obado leni o tundikaaba leni o patieba kuli kani Li miali Diedo n tienu den paagi nni ke n taani Isalele yaaba yudancianba siiga bi tianba fii ki yegi leni nni ki kpeni.