Esidilasi diani 6

1 Lanwani o bado Daliyusa den ñani li ñoabonli ke ban lingi a tikpela n den bili ya ŋalimani diegu nni Babilona po. 2 Lanwani bi den la Medi dociamu Akimeta nni li tigbabikaali yaali ya mztiadikaama n tie ne: 3 O bado Silusa bali binkpiali binli, o den ñani li ñoabonli U Tienu diegu maama Jelusalema nni po. Ke ban maa U Tienu diegu kun ya tie ban baa padi a pada naankani, ku tanpuuna n ya pia u gbamanu, ku kpedimu baa tie nukpanduna piiluoba, ku piamu mo baa tie nukpanduna piiluoba. 4 Bi ya ŋuani a tana ŋuani taa, ban ŋuani ti dapandi mo ŋuaniyendu. Bi baa ñandi o bado ligikpagu nne ki pa bi tuonsoanba. 5 Yaala n pugida, U Tienu diegu tiadi, wula tiadi leni ŋalinjufa tiadi o bado n den taa yaadi Jelusalema ki cuani ti Babilona nni ke ban taa tikuli ki guani ti tikaani tin den kpa ye U Tienu diegu nni naankani. 6 Moala fini Tatinayi yua n tie Yufilata kpenu kandima nuntuali po gufenelo leni Satadi-Bosinayi leni yinba bi paatieba Alifasaki yaaba yaaba n ye Yufilata diema nuntuali kuli, yikuli n fuadi mani ki cedi ba. 7 Cedi mani ban suagi U Tienu diegu ne tuonli. Jufinba, gufeneelinba leni Jufinba yudanba n goa ki maa U Tienu diegi kun den kpa ye naankani. 8 N bili yipo ya ñoabonli n tiene yaaali n tie yin baa tieni yaala ki todi Jufinba yudanba ban goa ki maa U Tienu dienu: Yin ñani mani ban kpendinni ya ligi o bado po ki teni ba yaala n baa dagidi ke li tuonli n da sedi. 9 Yin ya tendi ba yaala kuli n tie tiladi tanpoli Tienu padijuukaana po. A naatonbila, a petona leni a pebila kuli leni ŋalikami leni mi yaama leni duven leni mi kpama, yi baa teni lankuli Jelusalema kopadicianba daali ki cua daali ke liba kuli n da poadi. 10 Lan baa ga maama ban ya padi tonpoli Tienu po ya pada n pia u nuulimanu ki go ya jaandi ki miadi U Tienu o bado leni o bila yema po. 11 Diidi min bili ya ñoabonli yua n yie laa maama kuli po: Ban fidi o diegu ki ñani ku dafoagididigu ki caani gu ki joani o kupo, ki mudi o diegu kun tua diegbengu. 12 U Tienu yua n gandi u naa kaanu ki teni ke o kpiagidi baa ye likani n bolini ya bado n baa fii ki yie mi naa balimaama ki biigi ke o baa bolini U Tienu diegu yaagu n ye Jelusalema ne. Mini Daliyusa, n bili ya ñoabonli n tie ne ke yin ya tiendi lin yedi yaalacain. 13 Tatinayi yua n den tie Jufilata kpenu kandima gufeneelo leni Satadi- bosinayi leni bi tuonsoanlieli den tieni o bado n bili yaa ñoabonli capcap. 14 Lani Jufinba yudanba den suagi liiga ki maa U Tienu diegu. Bi sawalipuaba Aje leni Ido bijua Sakali den tundi ba ki paagidi bi pala ke li tuonli den cuoni boŋanla ki ban gbeni nani Isalelenba Tienu ñoabonli n bili maama leni Pelisa diema badiciamo Silusa Daliyusa leni Alitakiselisesi kuli ya ñoabona n den bili maama. 15 Bi den maa ki gbeni U Tienu diegu ban yi ya ŋmaalo Adadi dantaali daali o bado Daliyusa balibinluobili. 16 Isalele yaaba, bi kopadicianba, Lefi buolu yaaba leni ya niba n sieni ki den ñani ti yonbidi ki kpeni kuli den ye leni li pamanli ki jaandi U Tienu diegu luodima jaanma. 17 Bi den padi U Tienu diegu luodima yeni po a pada, naatona kobiga,petona kobilie, pebila kobina, Islelenba tuonbiadi sugili po, bi den padi piiga n pudibuana lie nani Isalele yaaba buolu coali n da maama. 18 Bi go den bogini ki kaani bi kopadicianba caga caga ki boagidi Lefi buolu yaaba ki ŋoadi leni bi tuonbuoli n bili maama U Tienu po Jelusalema nni nani Musa balimaama tila n bili maama. 19 Yaaba n den ñani ti yonbidi ki kpeni den jaani paka jaanma ciyendo ŋmaalo piiga n dannaali. 20 Bi kopadicianba leni Lefi buolu yaaba den gagidi ki ŋanbi biyula U Tienu po, bikuli den gagidi ki ŋanbi. Bi den kodi paka jaanma pebiga yaaba n den ñani ti yonbidi ki kpeni po leni bi kpiiba bi kopadicianba po leni biyula po kuli. 21 Isalele yaaba yaaba n den ñani ti yonbidi ki kpeni den taani ki dini paka jaanjiema. Leni yaaba kuli n den paadi leni bi tuonjoagindi ki taani leni Isalele yaaba ki lingi U Tienu Li Miali Diedo leni payenli. 22 Bi den jaani ya dupen n ki pia daliali jaanma hali dana lele, kelima U Tienu den mangi bi pala leni wan kuani Sili yaaba bado yama nni ke o todi bani Isalele yaaba Tienu diegu maama po.