Dianciamina 4

1 Judu leni Benjamina buolu yaaba yi balinba n den gbadi ke ya jufinba n ñani ti yonbidi ki kpeni maa Li miali Diedo Isalela yaaba Tienu diegu. 2 Bi den cua Solobabeli leni bi diedanba kan ki yedi: Ti baa taani leni yi ki maa U Tienu diegu kelima tinba leni yinba kuli jaandi Tienyendu. Ti padi opo apada hali Asili bado Esali halidani yo gunu wani yua n den cuo ki cuani ti ne. 3 Ama Solobabeli, Josue leni Isalele yaaba diedanba den guani ki yedi ba: Tinba leni yinba kan taani ki maa ti Tienu diegu, tinba bebe baa maa li miali Diedo Isalele yaaba Tienu diegu. Nani pelisa diema bado Silusa n den yedi ti maama. 4 Lani mi diema yaaba den wudi jufinba gbanu ki jieni ba ban da maa U Tienu diegu. 5 Bi den pani bi niba yi ligi ke ban pani bi tuonli hali Pelisa diema bado Selusa bali yogunu ki ya caa hali Pelisa bado Daliyusa bali yogunu. 6 O bado Asuelusa bali cilima , jufinba yibalinba den diani li tili ki kuli Juda yaaba leni Jelusalema yaaba. 7 Pelisa bado Alitakiselisesi yogunu, Biselami, Metiledati, Tabeeli leni bi lieba moko den diani li tili ki soani obado kani . 8 Bi den diani li tili yeni leni Alama ya diani ki soagini leni Alama mabuolu nni. 9 Tinba gufeneeli, Lehumi leni o tidianlo Simisayi leni ti lieba Dini yaaba, Tadipeli yaaba, Afadasi yaaba, Eleki yaaba Babilama yaaba, Suse yaaba, Deha yaaba, Elami yaaba, 10 bani oniciamo leni upaalu daano osinapadi n cuo ki gedini ki ban kaani yaaba Samali dogu nni leni tinbuontoana yaaba n ye ukpenu nintuali n diani. 11 Ban den diani ki soani ya tili : O bado Alitakiselisesi, tinba a naacenba yaaba n ye ukpenu nintuali n diani apo. 12 O bado, hani ya bani ke ya jufinba n ñani akani ki guani ki cua ti siiga Jelusalema nne leni ya yantiali tie ke ban guani ki maa mi yiema diema leni mi biadima dogu. Bi hanbi li tanpuuli ki guani ki maa ibilini 13 Han yaabani ke bi ya guani ki maa unaa dogu ki go ki go guani ki maa ibilini u niba kan go ya pa bacanli, bi lubili bi isani tagima tagima ligi. Yeni mo bi ba cuani obado halimano tungbali. 14 Li tie lani yaapo ke ti mo, tin di obado diegu nni yeni ti sua ke laa hani ban fali obado, lani teni ke ti diani ki waani a, 15 han teni ban lingi yaajanba tila, a ti tiandikaana nni, a baa sua ke laa dogu tie mi yiema dogu, yogunu kuli uden biidi bi batieba leni gufeneelinba po. Hali yogu uniba fiindi mi yiema. Li tie lanyaapo yo ke bi mumudi laa dogu. 16 Ti bua ki waani a, ke u dogu ne ya guani ki maa, ke ubilinu mo maa, a kan go yaa die junfinba diema nintuali. 17 O bado n soani yaa maguankaama Lehumi leni o ti dianlo simesayi leni yi lieba yaaba n kaa Samali dogu nni leni tinbuotoana yaa n ye ukpenu nintuali po n fuondi yi. 18 Yin soani tipo yaa tili yeni, bi cogili n nintuali cain. 19 N teni ke bi lingi ki laa ki sua ke li tie moamoane, ke hali yogu laa dogu niba fiindi bi batieba po mi yiema leni mi janjanma. 20 Bi batieba den tieni laa dogu nni ki diedi yaa diema ye yufilata diema nintuali kuli ke bi paba li bancanli leni li lubili leni isani tagima ligi. 21 Lanyaapo teni mani ban sieni laa niba tuona, ke laa dogu n da guani ki maa n yaa puni usanu. 22 Yin da cuo laa bonla leni gbefema ke lan da ti biidi bi batieba po ki pugini. 23 Ban li cogi obado Alitakiselisesi n diani ya tili Lehumi leni o tidianlo simesayi leni bi lieba po yaa yogunu, bi den jaligi ki gedi Jelusalema, Jufinba kani ki teni ke bi sieni li tuonli paalu. 24 Lanwani U Tienu diegu maama tuona den sedi Jelusalema. Li tuonli den sedi ki ya caa hali Pelisa bado Daliyusa bali binlieli binli.