Esidilasi diani 3

1 Cilele ŋmaalo n den sedi, Isalele yaaba den ye bi dogi nni. Lanwani bi kuli den taani yenma ki gedi Jelusalema. 2 Yehoyadaka bijua Josue leni o kpiiba bi kopadicianba leni Salitidli bijua Solobabeli leni o kpiiba den fii ki maa Isalele yaaba Tienu padibinbibinli, ki baa padi lipo a padijuukaana nani Li Miali Diedo nilo Musa balimaama n bili maama. 3 Bi ddn maa li padibinbinli lin den kpa ye naankani baa ke bi den jie ya nilanba n den ñani potogu ki cua ki kali mi diema nni, lani bi den padi Li Miali Diedo po a padijuukaana ku tasoangu leni ku yenjuagu kuli. 4 Bi den tiedi a gbandiena jaanma nani li balimaama n bili maama, ki padi daali kuli padijuukaana nani lan bili ban padi ya pada bianu. 5 Laa jaanma puoli bi den suagi ki padi daali kuli padijuukaana leni i ŋmapaani jaanma ya padijuukaana leni ya jaanma buoli kuli n gagidi Li Miali Diedo po leni yua kuli n den puuni Li Miali Diedo ya paabu o yanbuama po. 6 Cilele ŋmaalo dankpiali daali, bi den cili ki padi Li Miali Diedo po a padijuukaana baa ke bi daa den cili Li Miali Diedo diegu maama. 7 Bi den taa i ligi ki teni a takpieda leni a dakpieda, bi go den teni Sidoni yaaba leni Tili yaaba mi jiema leni li bonñokaala leni mi kpama ke ban ban pedi Libani Sedili tiidi ki kuani yi mi ñima nni ke u ñinfaalu n taa yi ki cuani hali Jafa dogu nni. Likuli den tieni nani Pelisa bado Silusa n den puni ba u sanu maama. 8 Ban den guani ki kpeni Jelusalema Li Miali Diedo diegu n ye naankani bi binlieli cilie ŋmaalo nni, Salitieli bijua Solobabeli leni Yehosadaka bijua Josue leni bi kpiiba yaaaba n sieni, bi kopadicianba leni Lefi buolu yaaba leni yaaba kuli n den ñani ti yonbidi ki kpeni den fii ki cili li tuonli. Ki mia Lefi buolu yaaba yaaba n den pia bina piilie leni yaaba n cie yeni ke ban ya gobidi Li Miali Diedo diegu tuonli. 9 Josue leni o bijaba leni o kpiibaa Juda buolu yaaba Kalimieli leni o bijaba, Juda bijaba, leni Hanadadi leni o bijaba kuli den taani ki baa gobidi Li Miali Diedo diegu tuonsoanba. 10 Bi tuonsoanba n den cili Li Miali Diedo diegu tanpuuli ya yogunu, bi yudanba den teni ke bi kopadicianba nagini ki la bi kopaditiadi ki kubi kakacinba ke Lefi buolu yaaba Asafi leni o bijaba mo den nagini ki kubi mu lonmu ki baa ya yiini ki pagi Li Miali Diedo nani Dafidi n den bili maama. 11 Bi den yiini ki kpiagidi Li Miali Diedo ki go pagi o ki tua: Kelima o ŋani, kelima o niŋigbadima baae hali ya yogunu kuli. Bi niba kuli mo den kpaani leni li pamanli ki kpiagidi Li Miali Diedo, kelima bi den cili Li Miali Diedo diegu tanpuuli. 12 Ama bi kopadicianba, Lefi buolu yaaba leni bi diedanba siiga, bi tianba yaaba n den tie nikpela ki laa ku diekpagu den buudi boncianla ban den cili ku diegu maama ya yogunu ke bi nua. Nitoaba boncianla mo den kpaani li pamanli kpaani, 13 hali maama ke bi kan den fidi ki gagidi li pamanli kpaani leni a bubula kelima bi niba den ya kpaani n yaba hali ke yaaba n ye foagima gba.