¹ Lan yaa po nani won puogiti laa tuonli , kelima o ninñingbadima po yeni ,ti kan cedi ti gbanu n yualigi . ² Ti yie yaali tiendi i ŋasiili nni ki tie fee bonla . tii tie nunfanbiadibu danba , tii go lebidi Utienu maama baa waamu . ama bi niba pala dua ti po kelima ti wangidi imoamoani Utienu nintuali . ³ Tin wangidi yaa labaali ŋamo yaa duaga , o duaga yaaba bodi po . ⁴ A pajuaga danba po kelima tin ye yaa jamaano ne tienu juani bi yantiana kaa bua ban le Kilisiti yua n tie U tienu nannanli yaa labaali ŋamo kpiagidi n ŋani ki ñuliti maama . ⁵ Ti naa wangiti ti yaa yula maama ka , ama Jesu kilisiti ti Diedo yo ke wangidi . ti go yedi ti yula ke ti tie yi naacenba kelima Jesu po . ⁶ Kelima Utienu wan yua n yedi : mi yenyenma baa yendi li biigili nni , den teni ke mi yenyenma yendi ti pala nni ki bua , ke tin bandi wani Utienu kpiagidi n ñuliti maama Jesu Kilisiti nungi po . ⁷ Ti cuoni leni laa piama tinba yaaba n naani nni yaa tuonsuantiagu n tie tandi . ke laa paliciamu kpiagidi n da tie ti yu , ama U tienu yaa kpiagidi . ⁸ Lan yaa po , bi wangidi ti fala buolu kuli ama bi naa paadi ti ; ki yagini ti yama , ama ti jigi naa cie ; ⁹ Ti laadi fala , ama U tienu naa ŋaa ti ; bi yen guliti , ama ti yen fi ; ¹⁰ O yogunu kuli ti tugi Jesu kuuma ti gbanandi nni , lani n tie Jesu miali moko n doagidi ti gbanandi nni . ¹¹ kelima tinba yaabi n fo , o yogunu kuli ti ye mi kuuma nni kelima Jesu po ; ke Jesu miali moko n doagidi ti gbanandi nni . ¹² Lan mi kuuma tuuni ti niini ama li miali moko tuuni ti niini . ¹³ Nani ti kuli n pia yantiayenli li dandanli nni nani lan diani maama : «n daani , lan yaapo yo ke n den maadi» ti moko daani lan yaa po yo ke ti maadi . ¹⁴ Yin bandi mani ke yua n fiini O Diedo Jesu bi tinkpiba siiga yeni , ba ti fiini ti moko leni Jesu ki teni tinba leni yinba n taani ki sedi o nintuali . ¹⁵ Yi yaa po n teni ke ti laadi lan kuli . ke U tienu ŋanbili yaa yabidi pugidi lan teni bi niba boncianla moko , tuondi n yaabidi ki pugini U tienu kpiagidi po . ¹⁶ Lan yaa po n teni ke tii luo li papaali , kelima ba ti gbanandi yaa kpeligi ke ti gbamanu wadi , ti naano wani , daali ki tu daali yen pandi . ¹⁷ Kelima moala n po tin laadi yaa fala jenjenmu , ki tie pu ,ti yaa biiga leni wan bogin ti po yaa kpiagidi . ¹⁸ Ti nuni naa ma bi niba n nua yaali yaa po ka , ama yaala ke baa nua ; kelima bi niba n nua yaala tie bonpendi kaala ama ban kan fidi ki le yaala lani n tie yaala n kan pendi fabada .