¹ Naani ti baa go guani ki wani ti yula yi kani bii ? bi yi bua yaa tila n baa wani yi tin tie yaaba nani bitianba n tiendi maama . ² Yinba n tie ti tila , ya tila n diani ti pala nni ke bi niba kuli cogi ki go bani . ³ Li doagidi bi niba kuli po ,ke yi tie Kilisiti tili , ti tuona n diani ya tili yaa po . laa tili naa den diani leni tidianñima ka , ama leni U tienu yua n fo yaa fuoma . ke li naa go tie a tana yaa walimu po ka ama ti gbanandi yaa walimu po lan tie ti pala nni ⁴ Ti pia laa dugidi U tienu nintuali kelima Jesu Kilisiti po , ⁵ Laa bua ki yedi ke ti baa fidi ki tieni bonli ba leni ti yucela fidu ka ,ama tin fidi yaali kuli ñani U tienu kani . ⁶ O go den teni ke ti fidi ki tua o ŋantaadi paano yaa naacenba , ki laa ŋua leni yaa tili n diani ka ama leni mi fuoma . kelima yaa balimaama n diani , kpendi nni mi kuuma ama mi fuoma puuni limiali . ⁷ Yaa balimaama n kpendi nni mi kuuma yaama ke bi den diani a tana po , yaa den pia ti kpiagidi hali ke Isalele yaaba kan den fidi ki diidi Musa kelima yaa kpiagidi n ye o nungi po , ba ke li tie yaa kpiagidi n baa pendi , ⁸ Yin bandi cain ke Utienu Fuoma yua n soani yaa tuonli pia ti kpiagidi ki cie . ⁹ Li balimaama tuonli yaali n den kpendi nni li bujia leni u cuonu yaa den pia ti kpiagidi , li moamoansaali yaa maama tuonli pia ti kpiagidi bonŋanla ki cie . ¹⁰ Lan yaa po , yaali n den pia ti kpiagidi naa go den tie pu kuli kelima yaali n ye moala pia ti kpiagidi bonŋanla ki cie . ¹¹ Yaali n den tie bonpendi kaala yaa den pia ti kpiagidi yeni , yaali n ye yaa yogunu n ki pia gbenma n pia ti kpiagidi ki cie . ¹² Nani tin pia laa suginma buolu yeni , ti tuuni leni ti dugidi . ¹³ Ti naa tiendi nani Musa yua n den yen wagini o nunga kaa bua Isaleleeba yaaba n diidi o nunga yaali n ba juodi ki pendi . ¹⁴ Bi tua yanpiidanba kelima ba leni moala , laa kpali piikaabu baa ki piigi bi yama bi yaa cogi o ŋantaadi kpelo diani . li kan pigidi bi po li yaa tie Kilisiti nni yaa ka . ¹⁵ Hali yen dinla bi cogi Musa tili , li cabili yen baa pi bi pala . ¹⁶ Ama hali bi tuo ki lebidi bi pala ki daani O Diedo baa pigidi . ¹⁷ Na kanba lan yedi O Diedo yeni , li bundi Fuoma Yua yo . kelima nan kani ke O Diedo Fuomi ye mi faabima moko ye lan kane . ¹⁸ Tinba yaaba yaa nunmu n pigidi , tin nuanli leni ti pagidi nani ki madiidi nni yeni O Diedo kpiagidi , ti baa sua ke ti nunmu kuli tie nani wani yeni , kpiagidi ki tu kpiagidi .