¹ Ti bani ki tingi n po tin ye yaa gbanandi yaa niini yaadi n tie nani li gbandieli yeni yaa bodi , ti pia tanpoli po yaa dieli ke U tienu wani o yaaba n tagi yaali . yaa dieli n baa ye u yogunu kuli , o nisaalo n ki tagi yaali . ² Ti go ye leni li dunli laa gbandieli yaa niini kelima ti bua ki yie ti tanpoli gbandieli . ³ Lan wani ti yaa yie tanpoli tiadi ti kan sua ti ye mubina . ⁴ Hali ti da ye ti naa gbanandi nni ti ye leni li dunli leni fala . laa tie ke ti bua ki yiedi tin yie yaa gbandieli ka , ama ti bua ki yie tanpoli yaali , lan tie yaali n fo n bolini yaali n kpe . ⁵ U tienu , wani O Yaaba n boginti laa bonli po , ki go kpa puni ti O Fuoma Yua , yuan tie tin baa ba yaala yaa bonciala . ⁶ Lan wani ti pala gbie leni ti dugidi , ki go bani ke ti yaa ye ti naa gbanandi nni ti ye ki fuagi leni O Diedo . ⁷ Kelima ti cuoni leni li dandanli yo , laa tie leni tin nua yaali ka . ⁸ Ti gbie leni ti dugidi ti go bi sugini ba ki ña yaa gbanandi n tiene yaa niini ki yaa ye leni O Diedo . ⁹ Lan yaa po , ba tin ye ti naa gbanandi nni bi , ti yaa di ye ti naa gbanandin nni , ti tiendi a nia ki bua O pali n yaa mani ti po . ¹⁰ Kelima tiladi , ti kuli baa fa ki sedi Kilisiti bujiali kaanu kani yua kuli n ga o tuonŋama bi , o tuonbiadi panpani wan bi ye o gbanandi nni yaa yogunu . ¹¹ Nani tin pia O Diedo fangili maama yeni , lan teni ke ti maadi ki bua ti maama n sii ki lebidi bi niba pala . U tienu bani yua kuli ; yi moko yi pala nni yi bani tin tie yaaba . ¹² Tii wangidi ti yula yi kani , ama ti puni yi u sanu yin mangi yi pala ti po . lani n tie yin fidi ki guani ki lebidi yaaba n gbengidi bi yula len yaali n ye niini ki naa faami yaali n ye li pali nni . ¹³ Lan yaapo , n yaa tie nani yua n luo mi yama li tie Utienu po , n yaa go pia ma mo , li tie yi yaa po . ¹⁴ Kilisiti buama tiginiti . kelima ni yendo yaa kpe bi niba kuli po , li bundi ke bi niba kuli kpe . ¹⁵ O den kpe yua kuli po ,lan tie yaaba n ye , n da ye bi yucela po ka ama ban yaa ye yua n den kpe , bi po , ki guani ki fii bi tinkpiba siiga yaa po . ¹⁶ Lan wani ki cili leni moala tii go nua bi niba leni ti gbanandi nunnuanligu ka ; ba ti yaa den bandi Kilisiti wan den ye ti gbanandi nni yaa yogunu , moala laa tie yen ka . ¹⁷ kelima o nisaalo ya ye Kilisiti nni , o tie tagipanma , li bonkpeli pendi , ke li bonli kuli tua bonpanla . ¹⁸ Lan kuli ñani U tienu kani , wan yua n teni ke ti guani mangi yeni O kelima Kilisiti yaa po . ki go puogiti yaa tuonli n tie , ke tin tua yaaba n baa teni ke bi niba n guani mangi leni O . ¹⁹ U tienu den ye Kilisiti nni ki den teni ke ŋanduna guani mangi leni O . kaa coadi bi tuonbiadi ; ki go den tieni ti ñoana nni O maama . ke tin yaa wangidi ya maama n ba teni bi niba n guani mangi leni U tienu . ²⁰ Lan wani , ti tie nani Kilisiti n dini yaa niba li bali ; ke ti maama tie nani U tienu wani O yaaba n maadi ti ñoana nni ki tundi yi . ti miadi yi Kilisiti yeli nni guani mani ki mangi leni U tienu . ²¹ Kilisiti yua n kaa den bandi ti tuonbiadi , U tienu teni ke O tua tuonbiadi kelima tinba yaa po . lan tie Kilisiti yaa niini tin fidi ki baa U tienu moamoansaali.