¹ Naani n baa kpiagi n yuli lan yaa po ; laa pia ñuadi ba kuli . ama n baa waani yi O Diedo bonle kaala leni O bondoagidi kaala . ² N bani Joayendo ke o tie Kilisiti ŋoadi ka moala li pundi piiga n bina na , ke bi den duoni o hali tanpotuadi kaantaalu kani ama mii bani o den ye o gbanandi nni , bi waa den ye o gbanandi nni mii bani U tienu n bani . ³ N go bani ke laa joa , li den tie leni o gbanandi bi laa tie leni o gbanandi mii bani U tienu bebe n bani , ⁴ O den gedi ŋalijani ki den gbadi yaa maama n kaa pia togida yaama ke o nisaalo kan fidi ki togidi . ⁵ N baa kpiagi n yuli laa nilo yaapo , ama n kan kpiagi n yuli n yucelipo , li yaa tie n tadingu po yaaka . ⁶ N yaa bi bua ki kpiagi n yuli , n kan bi tua nani yanluo daano kelima n baa waani i moamoani . ama n kan yedi li ba , kelima mii bua o baa kuli n jigini nni ki cie wan nua ke n tie yua bi wan gba ke n tie yua . ⁷ Ama , ke min da gbengidi n yuli leni ti japaadi kelima laa bondoagidi kaala n den pia ti kpiagidi maama yeni po , n yen gba n gbanu nni li bonla ke li muudi nni nani i konkoni yeni , li tie Sutaani Maleki ki yen muudi nni ke min da gbie leni ti japaadi . ⁸ Taalimi Ta n jandi ki mia O Diedo n ñani laa bonla n niini . ⁹ Ama O den yedi nni : N ŋanbili dagidi a po kelima ku tadingun ne ke n paciamu yen tuuni bonŋanla . lan yaapo , n go ba jigini n yuli ki cie kelima n tadingu po , lan tie Kilisiti paaciamu n yaa ye leni nni . ¹⁰ Lan teni ke n mangidi n pali ku tadingu nni , leni ti sugidi nni , leni fala buolu buolu kuli nni kelima Kilisiti po . kelima yaa yogunu ke n tadi laa yogunu n yen sua ke n pa bonŋanla . ¹¹ N tua nani o yanluodaano kelima yinba teni ke n tua yeni . yinba n bi ŋaa teni n po siedi kelima ba leni min ki tie li ba , yaa tondiba n nua bi yula ke bi tie tondicianba yeni , naa cie nni leni li ba . ¹² yaali n waani ke n tie Kilisiti tondo moamoani , doagidi yi siiga . lan tie li juuli mi biigimi kuli nni , sinankeene leni li bonlidi kaala , leni mi bandicianma kuli den tiendi leni nni yi siiga . ¹³ N tieni be jandietoana yaaba po kaa tieni yi po ; li yaa tie ke mii den tuo ki tua yi po yaaka ? yin tieni mani n po sugili lan yaapo . ¹⁴ Diidi mani n go bogini mi taa tama ki baa cua yi kani , n kan go tua yi po tugili kelima mii lingi yi piama ka , ama yinba yi yaaba yo ke n linga . Kelima a bila ka baa taani li bonla bi danba po ama , bi bidanba n ba taani li bonla a bila po . ¹⁵ Mini n yaaba , n yama po n ba pa n piama ki go teni n yuli kelima yi naani po . n buama yi po yaa pugidi , naani li tie ke n bua yin wadi yi yaa buama n po ? ¹⁶ Min kaa tua yi po tugili yeni , bi tianba tua daalinba n tieni nunfanbu yo ki bua ki baa cuo yi . ¹⁷ Min den suani yaaba yi kani yeni , naani n den ten ke bi fie yi kani bonli ba bi ? ¹⁸ N cedi Tita yegi leni ti kpiilo ke bi den gedi yi po , naani Tita den tieni yi u paalu ki den fie yi kani bonli baa bii ? naani kuli ki cuoni leni yantiayenli leni sanyendu ka ? ¹⁹ Yi tama hali yogu , ke ti bua ki fuu ga ti yula yi nintuali ; yen ka , ama li tie U tienu leni Jesu nintuali yo ke ti maadi . ti maadi yeni ki bua lan todi yi . ²⁰ Kelima n jie n ya cua yi kani , min sua ke yii tie min bi bua yin yaa tie maama , i moko n da sua ke tie yin kaa bi bua min yaa tie yua .N jie min da cua ki sua yi siiga kufugu , li ponli , leni li pabienli , mi paadima , leni i janbi , i kulinkundi ti japaadi , leni ti yanyagidi . , i kulinkundi ti japaadi , leni yanyagidi . ²¹ N jie n cuama yi kani n Tienu n da teni min lee i fee kelima yi po . N jie min da buudi kelima yi siiga yaabi n den ba ti tuonbiadi nni ki naa tuo ki lebidi bi pala ki mia sugili bi tuonjoagindi po , leni bi conconmi po , leni ban tieni yaa cagindi buolu kuli .