¹ Min baa cua yi kani yaama nne n tie mi tataama . maama kuli ba kadi siedinba lie bi siedinba ta ñoana nni . ² Mi ta liema min den cua yi kani yaa yogunu , n den kpia yedi , ba leni moala min kaa ye yi siiga n go yedi ke , yaabin den kpia tieni ti tuonbiadi leni yaaba n sieni kuli ,n yaa gua cua i kani , n kan cedi o ba kuli . ³ Kelima yi lingi yaali n doagidi waana ke Kilisiti maadi ñoabu nni . wan yua n kaa tadi ama o pia u paalu yi siiga . O den ye leni ku tadingu ban den kpa O li dapuanpuanli po ya yogunu . ama O ye ki fo leni U tienu paciamu . ⁴ Ti moko taani leni O , O tadigu nni ama ti fo leni O kelima Utienu paciamu po . lan tie tin tuuni ya tuona yi siiga . ⁵ yinba yi yaa ba , yin kpagi yi yula nni ki lee yi yaa ye li dandanli nni . biigi mani yinba yi yaa ba yi yula . yii bandi ke Jesu Kilisiti ye ti niini bi ? li yaa sua ke poadi ye yi niini yaaka . ⁶ Ama n tama yi ba tuo ke tinba wani naa pia poadi o ba kuli . ⁷ Tinba wan miadi Utienu ke yin da tiendi yaa bonli n bia . laa tie ke ti bua ki waani ti yula ke tii pia poadi o ba kuli ka ama , li tie ti bua yin yaa tiendi yaali n ŋani , ke ti mo n tua nani yaaba n pia poadi yeni . ⁸ Kelima tii pia yaa palu n baa yie i moamoani po ama i moamoani ya palu bebe . ⁹ Ti mangidi ti pala ya yogunu ke ti tadi ke yi mo pa ; lan wani tin miadi yaala ti jandi nni li tie ke yin yaa suagi liiga ki be li dandanli nni . ¹⁰ Lan yaapo n teni ke n diani yi laa bonla ba leni min ki ye yi siiga ; lan tie n yaa ti cua yi kani min da mabini yi leni O Diedo n dini nni ya bali yi ŋamu po ki laa tie yi bodima po . ¹¹ Moala n kpiiba , yin yaa ye li pamanli nni . moandi mani ki yaa suagi liiga ki be li dandanli nni , yin yaa baagidi i yaba , yin ya pia yantiayenli , yin yaa ye leni mi yanduanma , lani n tie mi buama leni mi yanduanma Tienu n ya ye leni yi . ¹² Gobini mani yi leni i fuondi . ¹³ U tienu nigagidinanba kuli fuondi yi . ¹⁴ O Diedo Jesu Kilisiti nanbili leni U tienu buama leni , U tienu buama , leni Utienu Fuoma Yua taayienu n yaa ye leni yi kuli !