¹ Yi yaabi baa fidi ki juuni n po waamu leni n yanluoma yin juuni leni nni . ² Kelima n pia li ninponli yi po yaali n tie nani U tienu ninponli buolu yeni . kelima n bi niani yi ke n baa cayi leni joa yendo bebe , lan tie Kilisiti nani ya puowandiali n gagidi ki ŋani cain . ³ Ama n jie ban da yaani yi yantiana yin ŋa Kilisiti yin ŋua yua yen payenli yeni . nani o wa n den buandi Awa leni o ninponbiadili maama yeni . ⁴ Kelima yaa nilo n cua yi kani ki wangi Jesu toa kaa tie tin wani yi yua , bi ke yi tuo ki ga fuotoama kaa tie U tienu Fuoma ŋanma yaama ke yi den ga , bi labaaliŋamo toa kaa tie yin ŋua yua , yi yen tuo ki ga li daano cangu . ⁵ N tama yaa tondiba n nua bi yula ke bi tie tondicianba yeni , baa cie nni leni ba . ⁶ Ba , n yaa bani liba mi maama nni , mii luo mi bandima wani . ti waani yi lan kuli yi siiga li bonli kuli nni . ⁷ Bi , nani n tieni tagile leni min jiini n yuli kelima n bua ki yugidi yi , min den cua yi kani ki waani yi U tienu labaaliŋamo fanma kaa ga panpaani ba kuli yi kani yeni bii ? ⁸ Kaanto yaa jandiena yaaba n kpaadi ban pia yaala ki todi nni ke n cua yi kani ki baa soani yi po . ⁹ yaa yogunu ke n den ye yi kani , ba leni min den luo bonli boncianla , mii tua o ba kuli po tugili , Kelima n kpiiba yaaba n den ñani Maseduna ki cua Kolinta , den puni nni yaali n den poadini kuli . li bonli kuli nni n den fidi kubi n yuli ka tua oba kuli po tugili . yene ke n go baa ba kubi n yuli . ¹⁰ Leni Kilisiti moamoani yii n ye n niini yeni yaapo , n yedi ke o ba kuli kan fidi ki yie n po ke n kan kpiagi n yuli li po Akayi diema nni . ¹¹ Ki be yaa po ? li tie ke mii bua yi bii ? U tienu wan bani ke n bua yi . ¹² Min tiendi maama ,n go baa yaa baa ki tiendi yene , kelima n bua ki sieni yaaba n ba li magbaali ki bua ka kpiagidi bi yula , ki go bogindi bi yula len tinba . ¹³ Laa niba tie tuofaatonda , yaa tuonsoanba n buandi bi niba ki kpali ke bi tie Kilisiti tonda . ¹⁴ Laa tie bonludi kaala kelima Sutani o yaa ba moko yen kpali ke o tie mi yenma Maleki . ¹⁵ Lan wani laa ludi ti o tuonsoanba moko ya kpali ke bi tie miyenma ya tuonsoanba . bi juodima baa tua nani bi tuona n tie maama . ¹⁶ N go yedi , o ba kuli n da nuanli nni nani ke n tie yanluodaano ; lan yaaka tuo mani ke n tie yanluodaano , lan tie n moko n baa ki kpiagi n yuli waamu . ¹⁷ Min maadi maama ke n ba kpiagi n yuili yeni , tie papaadan maama yo , mii yedi ke li ñani O Diedo kani , ama n maadi nani o yanluodaano yeni . ¹⁸ Kelima li pia niba boncianla ke bi kpiagidi bi yula nani ŋanduna yeni , lan yaapo n moko baa kpiagi n yuli . ¹⁹ Kelima yinba yaaba n tie bi yanfuodanba , yi tuo ki juuni leni bi yanluodanba . ²⁰ Yi yen fidi ki juuni leni ya nilo kpandi yonbi , leni yua dini yi , ki fie yi bonla , ki fali yi , bi ki pabi yi . ²¹ I fe pia nni leni min baa yedi yaala , tin den ye yi siiga ti den dingi , ki kan fidi laa bonla ama , o nisaalo n baa yuoo tien yaanli kuli , n maadi nani o yanluodaano yeni , n moko baa fiidi ki tieni laa bonla . ²² Bi tie Ebulunba yaaba bii ? n moko tie wane ; bi tie Isaleelenba yaaba bii ? n moko tie Isaleele yua ; bi yaa tie Abalahama puoliŋuanu yaaba n moko tie yene : ²³ bi yaa tie Kilisiti naacenba , n maadi nani o yanluodaano yeni . n go tie Kilisiti naacemo ki cie ba ; n cie ba a tuona nni , n cie ba ti puadi nni , n cie ba a kpaadidiena nni , u yogun tiama mii foagi leni mi kuuma . ²⁴ Taalima mu jufinba den pua nni pita n puadi yia . ²⁵ Taalimi Ta , bi puanni leni a gbabina , yenma bi madi nni a tana , taalimi ta mi ñincianma den baa je nni , mi ñincianma den tugi nni danmunli leni ku ñiagu ke ye mi niini . ²⁶ O yogunu kuli n sancena nni mii yen foagi leni mi kuuma , i kpeni nni , a sanjala siiga , mii den foagi leni mi kuuma n ma doguni yaaba siiga leni yaaba kaa tie jufinba siiga , mii foagi leni mi kuuma u dogu ciamu nni leni mi fanpiema nni , mi ñincianmi nni , n nagini mi kuuma kelima yaaba kpali ke bi tie Jesu yaaba po . ²⁷ N den ye a tuonjoaga nni leni fala nni , ki yen ye mi duanoanlima nni , mi koma leni u ñinñuulu nni , yogunu n kuli mi ñoalolima nni , ti wadi leni ti cadi nni . ²⁸ Mii cuadi ki taani leni bontiala ; daali kuli n ye leni a jandiena yanyagidi . ²⁹ ŋme n tadi ke n moko mii tadi lenio ; ŋme n ba ke laa ju n pali . ³¹ Li ya tie tiladi min kpiagi n yuli n baa kpiagi n yuli kelima n tadingu po . ³⁰ U tienu yua n tie O Diedo Jesu Ba , wan yua n pia ti pagidi hali yaa yogunu n kaa pia gbenma , bani ke mii pua faama . ³² Yaa yogunu ke n den ye Damasa dogu nni , o baciamo Aleta n den dini yua wan yaa gobidi u dogu den teni ke bi niba guu Damasa dogu bulñoana kuli ki baa cuo nni . ³³ Ama n kpiiba den teni ke n kua gu baabuogu nni ki balinin nni u dogu bilinciamu ke n baa ki jiidi niini ke n sani ki ciadi bi nuunni .