1 Wodin banda ay guna kala nga neeya, fu me fo feeri beena ra. Jinde sintina kaŋ ay ma danga hiili karyaŋ heenim kaŋ go ga salan ay se ne: Ma kaaru ne wo, ay mo ga ni cabe ham kaŋ ga ka wodin banda. 2 Sahadin ay maa ay biya fo na ay fundo candi kala ay di koytaray fo go beena ra. Koytara din boŋ boro fo go ga goro. 3 bora kaŋ go ga goro gonda jaspe hali cine nda sardine tondi hali cine koytara karga mo sajara kaŋ ga hima emeraudi hari na windi. 4 koytara karga windanta mo ay di koytaray karga way hakku. Koytaray kargey boŋ mo, dottijo waranka cindi taaci go ga goro. Bankaaray kwaaray go I ga,wura koytaray seeda go iboŋey boŋ 5 beene maliyaŋ dumi go ga fatta kargey din gaa hala nda dum-dum yaŋ nda jinda yaŋ 6 koytara karga din jie mo, teeku go no kaŋ a himando go sanda buta gullayze cine, nda tondi ɲalante cine, karga bindo nda a windanta baafuna taaci go no kaŋ moyize boobo go I se jine nda banda kulu. 7 baafuna jina ga hima muusu beeri, ihinkaŋta ga hima haw yeejim ihinzanta gonda adamize monduma cine. Itaacanta ga hima (gaaru) kaŋ ga deesi. 8 Baafuna taacey wo kulu gonda fatayaŋ, I to mo nda moyize yaŋ I windanta hala nda I bindo. Ciini nda zaari I si farga nda wone ciyaŋ : hananante, hananante, hananante ga ti Rabbi Irikoym hina kulu koyo kaŋ goro, a go no, a ga ka mo. 9 Alwaato cine kaŋ baafuna taacey go ga darza nda beeray gomni nooyaŋ sanney ci bora kaŋ go ga goro karga din boŋ nga kaŋ ga funa zamaani nda zamaani, 10 Dottijo waranka cindi taaca sombu bora jine kaŋ go ga goro karga boŋ, I sujudu a se, nga kaŋ ga funa zamaani nda zamaani. Kulu I na ngey koytara fuula jindaw a jarga ga ne: 11 Iri koyo nda Iri Rabbo, ni to I ma ni no darza nda beeray nda hinim zama ni na hay kulu taka, ni baayo ra mo no I kulu go no nda kaŋ I na I taka.