¹ Ay nya-izey, han kan cindi kan aynga ba ay ma ci aran se neeya: aran ma farha Rabbi ra. ² Kan ay ga ye ka hayey din hantum aran se, manti kankam hari no ay se, amma a go aran hallasiyan se. Aran ma haggoy da goy laalo teekoy, aran ma haggoy da ngey kan ga ti hansey, aran ma haggoy da borey kan ga gaaham dumbu, ³ Zama iri no ga ti dambangantey, iri kon goono ga sududu Irikoy biya ra ka farha Yesu Almasihu ra. Iri sinda mo gaaham do naanay. ⁴ Baa kan ay gonda gaaham do naanay dalili. Da boro fo ga miila nga gondagaaham do naanay dalili, ay wo du ka bis'a. ⁵ Zaari ahakkanta no i n'ay dan bangu, Israyla asuli gaa no ay fun, benyamin kunda ra, ibrani boro ya hala baaba. Asariya ciine ra, ay wo farisi fonda boro no. ⁶ Ay na anniya haw hal ay ma Almasihu marga gurzugandi. ⁷ Adilitaray ciine ra mo( sanda asariya wano do), ay sinda taali. Kulu nda yaadin, hayey kan ga ti riiba ay se don,woodin yan ay n'i lasaabu mursay Almasihu sabbay se. ⁸ Oho, haciika ay goono ga hay kulu lasaabu mursay Almasihu Yesu ay Rabbo bayyano sabbay se kan bisa hay kulu. A sabbay se mo no ay na hay kulu himandi yaamo. ⁹ Ay g'i lasaabu mo sanda kwaara banda cine zama ay ma du Almasihu, hala mo ay ma bara a ra adilitaray kan fun Irikoy do cimbeero bon. Adilitaray wo, manti ay bumbo wano kan fun asariya ganayan do. Amma nga ga ti adilitaray kan boro ga du Almasihu ra cimbeero do. ¹⁰ Ay ga ba ay ma du ka Almasihu bay gumo, da Irikoy dabaro kan n'a tunandi ka kaa buukoy game ra. Ay ga ba mo ay ma furo a gurzugayey ra, i m'ay himandi nda Almasihu a buuyano ra. ¹¹ Zama mate kan no kulu ay ma to bu-ka-tun gaa ka fun buukoy game ra. ¹² Manti danga ay jin ka to no, wala danga Irikoy jin k'ay toonandi no bo, amma ay goono ka anniya haw hal ay ma du ka haya din kan sabbay se Almasihu jin k'ay di. ¹³ Nya-izey, ay bumbo, ay mana lasaabu kan ay jin ka du a bo, amma hari follon no ay goono ga te: ay go ga dinya hayey kan yan go banda ka kookari ka to wo kan yan go jina gaa. ¹⁴ Ay goono ga zuru zama ay ma du alhakko. Alhakko ga ti Irikoy beene ceeyan wano, kan go Almasihu Yesu ra. ¹⁵ Iri binde, iri kulu kan ga ti toonanteyan, kala iri ma miila yaadin. D'aran di hay fo aran laakaley ra mo kan wan'a, baa woodin Irikoy g'a bangandi aran se. ¹⁶ Kala day nango kan iri jin ka to din, iri ma soobay k'iri diraw te yaadin. ¹⁷ Nya-izey, aran kulu ma goro care banda ay dondonkoyan. Aran ma laakal da borey mo kan goono ga dira iri alhaalo bon. ¹⁸ Zama boro boobo goono ga dira kan ibariyan no Almasihu kanjiyan bundo se. Ay binde n'baaru ci aran se sorro boobo. ¹⁹ Baa sohon mo ay go g'a ci aran se da mo-mundi. Borey din mo i bananta ga ti halaciyan. I irikoyo gsa ti i gundey. I darza go i haawi ra. I goono ga laakal mo da ndunnya hayey. ²⁰ Amma iri wo beene boroyan no. Iri goono ga batu mo iri faabakwa ma fun noodin, nga Rabbi Yesu Almasihu. ²¹ A g'iri gaahamey kan ga ti kayna wane yan bare zama i ma te danga nga gaaham darzanta cine. A ga woodin te nga dabaro ra kan do a ga hayey kulu dan nga bon mayra cire.