¹ Yaadin gaa, za kan bine-yaamaryan go Almasihu ra, za kan bine-gaabandiyan go baakasinay ra, za kan markasinay go biya hanno do,za kan bine bakaraw da suuji go no mo, ² w'ay farha toonandi hal aran ma bara nda laakal follon, da baakasinay follon mo. Aran biney d'aran miiley mo ma ciya afollon. ³ Aran ma si hay kulu te da fayyan, wala bonbeeray yaamo, amma lalabu ra boro kulu ma nga bon lasaabu kan boro fo bisa nga. ⁴ Manti danga boro kulu ma haggoy da nga bon muraadey hinne bo, amma aran ra boro kulu ma haggoy da nga cala muraadey mo. ⁵ Aran ma bara nda miila aran gaa kan dumi go Almasihu Yesu ra mo. ⁶ Nga kan ga ti Irikoy bumbo, mana nga Irikoytara sabayano lasaabu han kan nga ga gaay nda gaabi. ⁷ Amma nga bumbo yadda ka nga Irikoytara hino dabaro nan ka nga bon ciya bannya, ka ciya mo boro taka cine. ⁸ Kan a kaa boro alhaali ra mo, a na nga bon kaynandi ka yadda ka to hala buuyan gaa, oho, hala kanjiyan bundo gaa buuyano do. ⁹ Woodin sabbay se no, Iikoy n'a beerandi ka bisa hay kulu, ka maa dan a gaa kan bisa maa kulu. ¹⁰ Zama Yesu maa gaa no kanje kulu ga gurfa, beena ra waney, da ndunnya ra waney, da ndunnya cire waney. Deene kulu mo ma seeda ka ne: ¹¹ Yesu Almasihu ya Rabbi no, ka koy Baaba Irikoy darza gaa. ¹² Ya ay baakoy, aran goono ga gana waati kulu. Aran goono ga gana manti ay jine hinne bo, ba kan ay si noodin aran goono ga koy da jina. Woodin se, goyey kan aran go ga te zama aran jin ka du faaba, w'i te da humburkumay da jijiriyan. ¹³ Zama Irikoy no goono ga goy aran ra hal aran ma miila da goy mo te kan ga kaan a se. ¹⁴ Aran ma si hay kulu te da jance da kakaw, hal aran ma ciya boroyan kan i si du ka jance, kan ga hanan mo. ¹⁵ Aran ma ciya mo Irikoy izeyan kan sinda taali zamana wo ize darantey da siirantey game ra. I game ra no aran goono ga kaari sanda handariyayzeyan ndunnya ra, kan aran goono ga fundi sanno salle. ¹⁶ D'aran ga woodin te ay ga farha Almasihu zaaro ra, zama yaadin gaa ay mana zuru yaamo, ay mana taabi yaamo mo. ¹⁷ Ay g'ay fundo lasaabu sanda hanyan sargay kan i ga soogu. Baa d'i gay fundo no ya-cine aran sarga d'aran saajaw goy bon, kan aran goono ga te cimbeeri ra, ay maa kaani. ¹⁸ Ay ga farha mo aran kulu banda. Yaadin no aran mo, aran ma farha ka maa kaani ay banda. ¹⁹ Amma ay gonda anniya Rabbi Yesura ay ma Timotiyos donton aran do d'a tonton kayna, zama ay mo ma du bine-gaabi waati kan ay du k'aran gora baaru bay. ²⁰ Zama ay sinda boro kulu kan laakalo ga saba nda timotiyos wano, kan g'aran gora haggoy da cimi. ²¹ Zama borey kan cindi goono ga haggoy da ngey bon muraadey,manti nda Yesu Almasihu waney bo. ²² Amma aran ga timotiyos seeda bay: danga mate kan cine ize ga may baaba se, yaadin mo no a goy ay banda baaru hanna goyo ra. ²³ Nga binde no ay gonda anniya ay ma donton da wasi, waati kan ay ga di han kan ga te ay do. ²⁴ Amma ay goono ga de Rabbi gaa kan ay bumbo ga kaa d'a tonton kayna. ²⁵ Amma ay di a ga hagu ay m'ay nya-izo abafaroditos donton aran do. Ay goy hangasino, d'ay wongu ra hangasino mo no, amma aran diya d'aran saajawko hari kan ay ga laami ciine ra. ²⁶ A faaji gumo aran kulu se, a bine sara gumo mo zama aran maa baaru kan a jante. ²⁷ Da cimi mo a jante, hal a ba ka bu. Amma Irikoy n'a suuji, day manti nga hinne bo,hala nda baa ay mo zama ay ma si du bine saray bine saray ra. ²⁸ Woodin sabbay se no ay n'a donton aran da anniya zama waati kan aran diya, aran ma farha, zama ay bine sara mo ma te daama. ²⁹ Aran m'a ta mo Rabbi ra da farha koonu. Aran ma boro wo dumi beerandi mo. ³⁰ Zama Almasihu goyo sabbay se no a ga ba ka bu. A na nga fundo yababa zama tonton hari kan gaze aran saajawo ra ay se.