¹ Man gaa no wongey goono ga fun? Man gaa mo no yanjey goono ga fun aran game ra? Manti aran ibaay laaley ra no i goono ga fun, kan yan goono ga wongu te aran gaahamey ra? ² Aran goono ga bini, aran si du mo. Aran goono ga wi, aran goono ga canse, aran si hin ka du mo. Aran goono ga yanje, aran goono ga wongu te. Aran si du zama aran si gwaaray no. ³ Aran goono ga gwaaray, aran sibdu mo, zama aran goono hatta no aran adduwey ra, zama aran m'aran ibaay laaley laami kaa. ⁴ Ya aran zina-teeray, aran si bay kan ndunnya corotaray ya Irikoy ibaretaray? Yaadin gaa boro kulu kan ga ba nga ma ciya ndunnya coro, a na nga bon te Irikoy ibare nooya. ⁵ Wala mo aran goono ga tammahan Irikoy tira hanney salan yaamo no kan i ne: Biya hanna kan Irikoy gorandi iri ra goono ga canse iri se gumo? ⁶ Amma Irikoy goono ga gomni no ka tonton. Woodin sabbay se Irikoy sanno ne: «Irikoy ga wangu bon-beeraykoy, amma a ga gomni no lalabukoy se.» ⁷ Wa aran bon ye ganda Irikoy se, amma aran ma wangu ibilisi se, a ga zuru aran se mo. ⁸ Aran ma maan Irikoy gaa, nga mo ga maan aran gaa. Ya aran zunubikooney, w'aran kambey hanandi! ⁹ Aran bine-hinka-koyey, w'aran biney hanandi! Wa te bine saray, wa bu baray te, wa he. Wa nan aran haarey ma bare ka te barayyan, aran farhan mo ma bare ka te bine saray! ¹⁰ Wa aran bon kaynandi Rabbi jine, nga mo g'aran beerandi. ¹¹ Ay nya-izey, aran ma si care ciinay da taali. Boro kan ga nga nya-izo ciinay da taali, wala a ga nga nya-ize ciiti, a goono ga asariya ciinay da taali k'a ciiti mo. Amma da ni ga asariya ciiti, yaadin ga ni mantibasariya ganako, amma ni wo asariya ciitiko no. ¹² Zama asariya Nooko da Ciitiko follon hinne ka bara. Nga no gonda faaba dabari, a gonda halaciyan dabari mo. Ni wo may no kan ga ni gorokasin ciiti? ¹³ Wa maa, aran kan goono ga ne: «hunkuna wala suba iri ga koy birni fo ra ka te jiiri fo noodin ka fatawci ka riiba margu.» ¹⁴ Aran kan si ba bay han kan ga te suba! Ifo no ga ti aran fundey? Aran wo dullu no kan ga bangay alwaati kayna, woodin banda a ga say-say ka daray. ¹⁵ Amma woone no aran ga hima ka ne:Da Rabbi ba iri ga funa ka ya-cine nda ya-cine te. ¹⁶ Amma sohon aran goono ga fooma aran bon-beera ra. Fooma wo dumi kulu ilaalo no. ¹⁷ Yaadin gaa, boro kan ga ihanno bay kan si g'a te mo, bora se woodin ya zunubi no.