1 Amma aran ra boro boobo ma si ciya dondonandikoyan, ay nya-izey, zama aran ga bay kan iri kan ga dondonandi ga du ciiti kan ga jaase boro cindey wano. 2 Zama hari boobo ra iri boro kulu goono ga harta. Da boro siino ga harta sanni ra, bora din ya toonante no. A ga hin ka alzam dan ka nga gaahamo kulu gaay mo. 3 D'iri ga alzamyan dan bariyey meyey ra zama i m'iri gana se, iri g'i gaahamey kulu bare mo. 4 Guna hiyey mo. Baa kan i ga beeri gumo, haw gaabikooni mo g'i tuti, kulu nda yaadin i g'i bare nda kaay kayna nangu kulu kan funkwa ga ba nga ma koy. 5 Yaadin mo no deene ga hima. Baa kan a ga kayna, a ga hari bambata yan fooma. Guna mo mate kan cine danji kayna ga saaji lunku-lunku ton. 6 Deene mo danji no. Ndunnya no kan to da laala. Iri gaahamo jare fo no kan ga gaahamo kulu ziibandi. Danji bangu danjo ga deene diyandi, a ga nan iri fundey me-a-me ma ton mo. 7 Woodin banda, boro ga hin ka ganji hamey kulu gooji da curey da ganda fanakey da hamey kan go teeko ra, i goro mo adam-ize goojiyan cire. 8 Amma boro kulu sinda dabari ka deene gooji. Ilaalo no kan si fulanzam, a to mo da naaji kan ga boro wi. 9 Deene no iri goono ga Rabbi nda Baabo saabu nd'a. Deene mo no iri goono ga borey laali nd'a, kan Irikoy te nga himando bon. 10 Saabuyan nda laaliyan mo goono ga fun me follon ra. Ay nya-izey, a si hima yaadin ma te. 11 Mansaare go no kan ga hari kaano da hari fotto kaa taray hari mo follonku ra no? 12 Ay nya-izey, jeejay nya ga hin ka zeytun ize hay no? Wala reyzin nya ga hin ka jeejay ize hay no? Mansaare kan gonda ciiri mo si hin ka hari kan ga kaanu kaa taray. 13 Aran ra may no ga ti laakalkooni nda fahamante? Bora ma nga goray hanno cabe nga goyey do kan a ga te da lalabu kan ga fun laakal ra. 14 Amma d'aran gonda canse fotto da kakaw aran biney ra, aran ma si fooma ka tangari te cimi bon. 15 Laakal wo manti laakal kan fun beene no, amma ndunnya wane no, adam-ize daa laalo wane no, ibilisi wane mo no. 16 Zama nango kan canse nda kakaw go, noodin ga bara nda yanje nda goy laalo dumi kulu mo. 17 Amma laakal kan ga fun beene, sintina day a ga hanan, laakal kanay wane no, baani wane no, bon-dogonay wane mo no. Toonante no da suuji nda goy hannoyan. A si sanni ci ka tun a bon, a sinda munaficitaray mo. 18 Borey kan ga laakal kanay ceeci, kan ga duma laakal kanay ra ga adilitaray albarka wi.