¹ Ay nya-izey, wa s'aran cimbeero kan go aran se iri Rabbi Yesu Almasihu kan ti darza koya ra margu nda baar'a-baara. ² Iri ma ne boro fo furo aran marga ra da wura kobayyan da bankaaray hanno yan, alfukaaru fo mo furo nda zaara-zaara. ³ Aran mo ma bankaaray hanno koyo guna ka ne: «ni wo ma goro nangu hanno wo ra». Amma aran ma ne alfukaaro se: «ni mo ma kay ne,» wala: «ma goro ganda ay ce furkanga do». ⁴ Yaadin gaa manti aran goono ga fayanka te aran da care game ra nooya, hal aran bara ciitikoyan kan gonda miila laalo yan? ⁵ Wa maa ay nya-izey, ay baakoy, manti Irikoy na alfukaarey kan talka ndunnya wo lasaabuyan gaa suuban i ma ciya arzakanteyan cimbeeri ra, k'i ciya tubukoyan mo koytara ra kan alkawlo a sambu borey kan yan ga bar'a se? ⁶ Amma aran na alfukaaru kaynandi. Manti arzakantey no goono g'aran kankam? Manti ngey bumbey mo no goono g'aran candi ciiti karga jine? ⁷ Manti ngey mo no goono ga maa kan gonda darza din kayna, maa din kan i go g'aran ce d'a? ⁸ D'aran goono ga koyo asariya toonandi nda cimi, mate kan a go Irikoy tira hanna bon, wo kan ne: «Ni ma ba ni gorokasin danga ni bon cine», yaadin gaa ni goono ga te han kan ga boori nooya. ⁹ Amma d'aran goono ga baar'a-baar'a te, aran goono ga zunubi te. Asariya n'aran zeeri k'aran ciya asariya taamukoyan. ¹⁰ Zama boro kan ga asariya kulu gana, day a ma harta lordi follon gaa, to, a ciya ikulu hartako nooya. ¹¹ Zama Irikoy kan ne: «Ni ma si zina,» A ne mo: «Ni ma si boro wi.» Da ni mana zina, amma ni na boro wi, to, ni ciya asariya taamuko. ¹² Aran ma salan, aran ma te mo, danga boro kan yan i ga ciiti nda asariya kan ga burcinandi. ¹³ Zama ciiti sinda suuji, boro kan mana suuji cabe se. Suuji ga zaama ciiti bon. ¹⁴ Ay nya-izey, da boro fo ne nga gonda cimbeeri, amma a sinda a goyey, ifo no a ga hanse bora se? ¹⁵ Cimbeero wo ga hin k'a faaba no? Da nya-ize fo go no, alboro wala wayboro, ¹⁶ kan go banji ra, a jan nga zaaro gwaaro mo, aran ra boro fo ma ne a se: «Ma koy baani. Ma si maa hargu, ma kungu mo!» Day aran man'a no mo gaaham laamey, ifo no a ga hanse? ¹⁷ Yaadin mo no cimbeeri bar'a nd'a, da nga hinne no goono. D'a sinda goyey, buuko no. ¹⁸ Amma boro fo ga ne: «Ni gonda cimbeeri, ay mo ay gonda goyey.» To, Ma ni cimbeero cabe ay se goyey si, ay mo g'ay cimbeero cabe ni se ay goyey do. ¹⁹ Ni goono ga cimandi kan Irikoy ya afollon? To,ca boori! Amma baa follayey mo goono ga woodin cimandi, i ga jijiri mo. ²⁰ He nin boro yaamo, ni ga ba ni ma faham kan cimbeeri kan sinda goyey si albarka hay no? ²¹ To! Manti Irikoy n'iri kaayo Ibrahim lasaabu adilante nga jine a goyey do waato kan a na nga izo Isaka salle feema bon? ²² Ni di kan a cimbeero d'a goyey goy care banda. ²³ A cimbeero to mo a goyey do. Yaadin mo no Irikoy tira hanna kubay d'a kan ne: «Ibrahim na Irikoy cimandi, Irikoy mo na woodin lasaabu a se adilitaray.» ²⁴ I ne a se mo Irikoy cora. Aran di kan goyey do no i ga boro adilandi, manti cimbeeri do hinne bo. ²⁵ Manti yaadincine mo no i na kaaruwa Rahab adilandi goyey do, waato kan a na diyey kubayni k'i dan mo fondo fo gaa. ²⁶ Zama mate kan cine gaahamo kan sinda biya wo buuko no, yaadin cine no cimbeeri kan sinda goyey mo buuko no.