¹ Ay Yakuba, ay ya Irikoy da Rabbi Yesu Almasihu bannya no. ² Ay go ga tira wo hantum dumi way cindi hinka se kan yan go say-sayante ndunnya ra. Ay go g'aran fo. ³ Ay nya-izey, waati kan taabi waani-waani du aran, aran m'a lasaabu farhan toonante, zama aran ga bay kan aran cimbeero gosiyan ga kande suuru. ⁴ Wa nan suuro ma nga goyo toonandi mo,zama aran ma bara toonante yan da timmante yan kan si jan hay kulu. ⁵ Amma d'aran ra boro fo jan laakal, a ma gwaaray Irikoy gaa, kan ga boro kulu no nda baayan, kan si deeni mo. A g'a no bora se. ⁶ Amma a ma gwaaray da cimbeeri, a ma si sikka baa kayne. Zama sikkante wo ga hama teeku bonday kan haw goono ga faaru k'a tunkufa. ⁷ Bora din dumi ma si tamhan hala nga ga du hay fo Rabbi do, ⁸ za kan bine-hinka-koy no, kan si kay nga fondey kulu ra. ⁹ Nya-ize talka ma farhan nga beera ra. ¹⁰ Amma nya-ize arzakante ma farhan nga kaynandiyano ra, zama a ga bisa sanda subu boosi cine. ¹¹ Zama wayna ga fun da nga haw konna ka subo kaagandi, a booso ga kan, a booriyano mo ga halaci. Yaadin mo no arzakante ga daray d'a nga muraadey ra. ¹² Albarkante no boro kan ga suuru taabi ra, zama waati kan a ciya yaddante, a ga du fundi ontobay kan Irikoy n'a alkawlo sambu ka ne nga ga no borey kan yan ga ba nga se. ¹³ Waati kan boro du siyan, boro ma si ne: "Irikoy do no ay siyano fun." Zama i si hin ka Irikoy si da hari laalo, nga bumbo mo si boro kulu si. ¹⁴ Amma boro ga du siyan waati kan ni ibaay laaley ga ni candi ka te ni se kumsay. ¹⁵ Waati din gaa no ni ibaay laaley ga te gunde ka zunubi hay. Zunubi mo d'a beeri ka zaada, a ga kande buuyan. ¹⁶ Ay nya-izey, ay baakoy, wa si aran bon darandi. ¹⁷ Nooyan hanno nda nooyan toonante kulu, beene no i ga fun, Irikoy kan ti kaari kulu Baabo do, kan do bareyan siino, wala bareyan biya. ¹⁸ Nga bumbo miila do no a n'iri hay, hayyan taji cimi sanno do, zama iri ma bara danga nga takaharey bon-jina. ¹⁹ Wa fongu woone gaa ay nya-izey, ay baakoy. Boro kulu ma waasu ka maa, day a ma si waasu sanni ciyan gaa, a bine ma si waasu ka tun mo. ²⁰ Zama boro bine tunyan si Irikoy adilitaray goyo te. ²¹ Woodin sabbay se mo aran ma ziibi kulu nda laala kan baa kulu kaa. Lalabu ra aran ma yadda nda sanni kan i dums aran ra, kan gonda dabari k'aran fundey faaba. ²² Amma aran ma bara Irikoy sanno ganakoyan, manti a maakoyan hinne bo, zama nda yaadin no, aran goono g'aran bon halli. ²³ Zama boro kulu kan ga maa Irikoy sanno, nga no bora mana ciya a ganako, a ga hima danga boro kan goono ga nga moyduma alhaalo guna diji ra. ²⁴ A ma nga bon guna ka dira, amma sahaadin-sahaadin no a ga dinya nga moyduma alhaalo gaa. ²⁵ Amma bora kan goono ga mo sinji asariya toonanta gaa, asariya kan ga burcinandi, a ga soobay ka woodin te mo, bora din wo manti maako no kan goono ga dinya, amma teeko no kan goono ga goy. Nga wo ga ciya albakante nga goyo ra. ²⁶ Boro kulu kan ga tammhan nga ya diina ganako no, nga no bora si hin ka nga meyo gaay, amma a goono ga nga bon halli, bora din diina ya yaamo no. ²⁷ Diina hanno kan sinda ziibi Baaba Irikoy jine ga ti: boro ma alatuumey da wayborey kan kurnyey bu kunfa ngey kankamey ra, a ma nga bon gaay mo hal a ma si furo ndunnya ziibi ra.