¹ Ya aran arzakantey, wa maa: wa he ka kaati masiibey kan ga kaa aran gaa sabbay se. ² Aran arzakey halaci, aran bankaarey mo, kollo n'i gwa. ³ Aran wura nd'aran nzarfo mo hay. I hayyano mo ga goro seeda aran bon k'aran gaahamey gwa danga danji cine. Aran n'aran arzakey jisi zaari banantey ra. ⁴ Guna, alhakkey kan aran zamba kan aran wangu ka no goy-teerey kan n'aran farey wi se, i goono ga jinde sambu. Fari wiikoy heeno mo furo Rabbi kundeykoyo hangey ra. ⁵ Aran n'aran waate gwa ndunnya bon, aran goro kaani ra, aran na harram gwa ka naasu wiyano zaaro se. ⁶ Aran na boro adili ciiti ka zeeri k'a wi mo, a mana wangu aran se mo. ⁷ Aran ma suuru binde, ay nya-izey, hala Rabbi ma kaa. Guna mate kan cine farko ga nga laabu nafa albarkanta batu. A ga suuru a se hal a ma du hari, sintina da banda waney mo. ⁸ Aran mo kal aran ma suuru. Aran m'aran biney daahirandi, zama Rabbi kaayano maan. ⁹ Ay nya-izey, aran ma si care jance zama i ma si aran ciiti. Guna ciitikwa goono ga kay fu meyo gaa. Ay nya-izey, aran ma fongu nda annabey kan salan Rabbi maa ra. ¹⁰ Aran m'i dondon ka suuru taabi ra danga mate kan cine i te. ¹¹ Guna, iri ga ne borey kan suuru se albakanteyan. Aran maa ayuba suuro baaro. Aran di han kan Rabbi te a se kokor banda mo, za kan Rabbi to da bakaraw da suuji. ¹² Amma hay kulu jine, ay nya-izey aran ma si ze. Wa si ze da beene, wala da ganda, waka davzeyan kulu dumi. Amma aran «Oho» ma goro oho, aran «Ha'a» ma goro ha'a mo, zama aran ma si kan ciiti ra. ¹³ Boro fo go no aran game ra kan goono ga taabi, waka? To! A ma te adduwa. ¹⁴ Boro fo go no kan bine ga kaan, wala? To! A ma saabuyan baytu te. Boro fo go no aran game ra kan jante, wala? To! A ma Almasihu marga arkusey ce i ma adduwa te a se ka ji soogu a bon Rabbi maa ra. ¹⁵ Adduwa din kan i te cimbeeri ra ga jantakomo faaba,Rabbi mo g'a tunandi. D'a na zunubi te mo, Irikoy g'a yaafa a se. ¹⁶ Yaadin gaa aran m'aran zunubey ci care se. Aran ma te care se adduwa, zama aran ma du baani. Adilante adduwa gonda dabari gumo, a ga to mo. ¹⁷ Ilya ya boro no kan gonda takayan sanda iri wano cine. A te adduwa da anniya hari ma si kan, haro mana kan laabo bon jiiri hinza nda handu iddu. ¹⁸ A ye ka te adduwa koyne, beena te hari, laabo mo na nga albarka hay. ¹⁹ Ay nya-izey, d'aran ra boro fo kamba cimi gaa, nga no, boro fo n'a bare ka ye cimo do haray, ²⁰ wa woone bay: boro kan ga zunubikooni bare ka ye nga fonda ra kan gaa a kamba, a g'a fundo faaba buuyan gaa ka zunubi boobo daabu a se mo.