1 zama alfaga beeri kulu, irikoy g'a suuban no borey game ra. Borey se mo no a g'a dan nga muraadey ra, zama a ma nooyaney da sargayey salle zunubey sabbey se. 2 A ga hin suuru nda ammey da darantey, za kan nga bumbo gonda londibuuney kambu kuku gaa. 3 Woodin sabbay se mo no a ga hima a ma sargayyan salle nga bon se,mate kan cine a ga te jama se. 4 Boro kulu si no mo kan ga beera wo sambu nga bon se_ kala nda Irikoy n'a ce, 5 danga matebkan cine a n'a Haruna ce d'a. Yaadin no Almasihu mo. Manti nga no ka nga bon beerandi nga ma ciya alfaga beeri bo, amma Irikoy kan salan a se ne: «Ni ya ay izo no. Hunkuna no ay na ni hay.» 6 Mate kan a ci mo zabura ra nangu fo ka ne: «Ni ya alfaga no hal abada, Malcizadaka wano cine.» 7 A ndunnya gora waate, Almasihu na adduwa nda gwaarayyan te da heeni korno nda mo-mundi Irikoy gaa, nga kan gonda dabari kan g'a faaba ka kaa buuyan ra. Irikoy ta a se mo zama a humbur'a. 8 Baa kan nga ya ize no, kulu nda yaadin a na ganayan dondon taabi kan a han do. 9 Waato kan a ciya toonante, a te hal abada faaba daliili borey kulu kan yan g'a gana se. 10 Irikoy mo n'a dan a ma ciya alfaga beeri, Malcizadaka wano cine. 11 Iri gonda hari boobo mo kan iri ga ci a bon, kan i feeriyan ga sandi no, zama aran ciya boroyan kan si tara ka maa. 12 Zama aran kan haciika aran gayyano sabbay se, aran hima ka te dondonandikoyan, hala hon aran ga laami nda boro fo kan ga Irikoy sanno kaajo sintina dondonandi aran se. 13 Aran ciya boroyan kan ga laami nda wa, manti nda gwaari tino bo. 14 Zama boro kulu kan ga wa han sinda bayray adilitaray sanni ra, zama attaciriya no. Amma gwaari tino ga boro toonante se, kan yan i waati kulu goyey do i doona lasaabuyan ka ihanno da ilaalo fayanka.