1 Irikoy alkawlo go no hala ho iri se, kan ga ti a fulanzamyano ra furoyano. Yaadin gaa iri ma humburu a ma si koy ka ciya kan aran boro fo ma lasaabu kan nga gaze a duura gaa. 2 Zama haciika i na baaru hanna waazu iri se, sanda mate kan i te borey din mo se, amma sanno kan i maa mana te nafa hari i se, zama a mana cimbeeri gar borey kan maa r'a do. 3 Zama iri kan cimandi, iri wo go ga furo fulanzamyano din ra, mate kan a ci ka ne: «kal ay ze ay futa ra ka ne: «Daahir i si furo ay fulanzamyano ra» Baa kan a na goyey kubandi za ndunnya sinjiyano waate. 4 Zama Irikoy sanno ra nangu fo i na zaari iyyante ciine te ya-cine ka ne: «Irikoy fulanzam mo nga goyey kulu gaa zaari iyyanta hane.» 5 Ne mo koyne a ne: «Daahir i si furo ay fulanzamyano ra.» 6 To. Za kan boro fooyan ga cindi kan ga furo a ra, ngey mo kan se i na baaru hanna waazu waato mana du ka furo i ganayan-jana sabbay se, kala a ye ka zaari fo dan kan se a ne «Hunkuna.» 7 Alwaati boobo banda a ne Dawda do(mate kan iri jin ka ci ka ne:) «Hunkuna d'aran maa a jinde,wa s'aran biney sandandi.» 8 Zama da Yasuwa n'i no fulanzamyan,don a si zaari fo ciine te woodin banda. 9 Asibti fulanzamyan fo binde cindi Irikoy jama se. 10 Zama boro kan furo Irikoy fulanzamyano ra, bora din fulanzam nga bumbo goyey gaa. 11 Iri ma te annya mo ka du ka furo fulanzamyano din ra, hal iri boro fo kulu ma si kan wangu-ka-ganayan misa din bon. 12 Zama Irikoy sanno ya fundikooni no, gaabikooni mo no. A ga kaan ka bisa takuba, a ga gooru mo ka fay fundi nda biya game ra, wala dabey da londi game ra. A ga bine fonguyaney d'a miiley fayanka. 13 Takahari kulu si no mo kan siino ga bangay taray kwaaray Irikoy jine. Hay kulu go koonu, i go feerante yan mo a moy jine, nga kan se iri ga kande iri te-goyey. 14 Yaadin gaa, za kan iri gonda alfaga beerey kulu ibeero kan bisa ka furo beene beena ra, kan ga ti Yesu Irikoy Izo, kal iri m'iri seeda yaari hal a ma boori. 15 Zama iri gonda alfaga beeri kan ga bakar iri londibuunay se, i n'a si mo hay kulu ra danga iri cine, day zunubi kulu si. 16 Woodin sabbay se binde iri ma maan gomni karga do da bine-gaabi, zama iri ma du suuji nda gomni kan g'iri baakasinay alwaati kan ga hagu ra.