Sura 3

1 Woodin sabbay se ya nya-izey hanantey, aran kan yan gonda baa beene ceyano ra, aran ma mo sinji Diya da Alfaga beero gaa kan iri goono ga seeda, nga kan ti Yesu. 2 Nga wo naanaykoy no Irikoy kan n'a dan se, mate kan Musa ciya Irikoy windo kulu ra. 3 Zama i na Yesu lasaabu kan a gonda darza ka bisa musa, mate kan windi ciniko gonda beeray ka bisa windo. 4 Zama windi kulu gonda nga cinakwa, amma hay kulu cinakwa ga ti Irikoy. 5 Musa wo daahir a ciya naanaykoy Irikoy windo kulu ra, nga kan ti saajawko, a ma seeda te hayey kan Irikoy ga ci se. 6 Amma Almasihu wo ciya naanaykoy, nga kan ga ti Ize, Irikoy windo bon. Iri no ga ti a windo, d'iri g'iri bine-gaabo d'iri beeja kan ga ti iri darza gaay nda gaabi hala bananta. 7 Woodin sabbay se binde, mate kan biya hanna go ga ci ka ne: «Hunkuna d'aran maa a jinda, 8 wa s'aran biney sandandi, sanda mate kan cine i te ngey murteyano hane, hano kan hane i n'ay si saajo ra. 9 Nan kan aran kaayey n'ay gosi k'ay si, i di ay goyey mo hala jiiri waytaaci. 10 Woodin sabbay se no ay te waato zamana izey se bine. Ay ne: «waati kulu i go ga daray ngey biney ra, i man'ay fondey bay mo.» 11 Kal ay ze ay futa ra ka ne: «Daahir i si furo ay fulanzamyano ra.» 12 Yaadin gaa, nya-izey aran ma haggoy hal aran ra afo ma si bara nda bine laalo kan ga wangu cimandiyan, kan ga nan aran ma fay da Irikoy fundikoono. 13 Amma aran ma care yaamar han kulu, za i ga hin ka ne hunkuna. A ma si te aran boro fo bine ma sandi zunubi fafaguyan do. 14 Zama iri gonda baa Almasihu ra, da day iri g'iri naanay sintina yaari nda gaabi hala bananta. 15 I go ga ne: «Hunkuna d'aran maa a jinde, wa s'aran biney sandandi, sanda mate kan cine i te ngey murteyano hane.» 16 Zama may yan no borey kan, waato kan i maa, i murte? Manti ikulu no kan yan fun misira Musa banda? 17 May yan mo no borey kan se Irikoy futu jiiri waytaaca ra? Manti borey kan yan na zunubi te no ka kan buukoyan saajo ra? 18 May yan se mo no a ze ka ne i si furo nga fulanzamyano ra? 19 To, kala ngey kan yan wangu ganayan. Iri di mo kan i mana du ka furo, zama i man'a cimandi.