¹ Almasihu n'iri fansa burcinitaray se. Yaadin gaa aran ma kay ka tarsasa. Aran ma si ye ka didiji tamtaray ra, k'a calo dan koyne. ² Guna ay , bulos, ay goono ga ci aran se: d'aran ta i n'aran dambangu, Almasihu sinda nafa aran se. ³ Oho, koyne ay go ga seeda ka ne boro kulu kan ga dambanguyan ta se: bora din ciya garawkooni a ma hay kulu kan asariya ci te. ⁴ Aran kan ga ba Irikoy m'aran adilandi asariya ganayan ra, aran fay da Almasihu, aran daray gomno gaa no. ⁵ Zama iri wo, cimbeeri bon no iri goono ga adilitaray kan se iri ga beeje batu biya hanno do. ⁶ Zama Almasihu Yesu ra dambanguyan wala dambanguyan-janay si hay kulu hanse, kala cimbeeri kan ga goy baakasinay do. ⁷ Waato aran goono ga zuru hal a ma boori. May no k'aran gaay hal aran ma si cimo gana sohon? ⁸ Bon-barayano wo mana fu Irikoy kan goono g'aran ce din do. ⁹ Dalbu kayna ga motto kulu fuurandi. ¹⁰ Ay gonda naanay aran gaa Rabbi ra kan aran si hay fo waani miila. Amma, boro kan goono g'aran taabandi, bora alhakko ga kan a bon, boro kulu kan no. ¹¹ Amma, ay nya-izey, d'ay goono ga dambanguyan sanni waazu,hala sohon, ifo se no i goono g'ay gurzugandi? Zama nda yaadin no, kanjiyan bundo si ciya katiyan hari koyne. ¹² Ay ga ba borey kan yan goono g'aran laakal tunandi ma koy ka ngey bon manta. ¹³ Amma aran wo, nya-izey, Irikoy n'aran ce burcinitaray se no. Day wa si nan burcinitara di ma bine ibaay laaley no fondo, amma baakasinay do aran ma may care se. ¹⁴ Zama asariya kulu toonandiyan go sanni follonko bon, kan ga ti: «Ni ma ba ni gorkasin danga ni bon cine.» ¹⁵ Amma d'aran ga care nam ka care gwa, wa haggoy aran ma si care halaci. ¹⁶ Amma ay ga woone ci: aran ma dira biya hanna ra, gaa no aran si bine ibaay laaley toonandi. ¹⁷ Zama bine ibaay laaley ga gaaba nda biya hanno. Biya hanno mo ga gaaba da bine ibaay laaley. I goono ga gaaba nda care, hala hay kan aran ga ba aran ma te, manti nga no aran ga te. ¹⁸ A mma nda biya hanno goono g'aran candi kulu aran si asariya dabaro cire. ¹⁹ Bine ibaay laaley goyey binde, taray kwaaray no i go. Ngey ga ti: zina,da ziibi, ²⁰ da furkutaray, da tooru ganayan, da ziimataray, da ibaretaray, da kusuuma, da canse, da futay, da kakaw, da fay-ka-ye-waani-waaniyan, da wurdi waani-waani, da biniyay, ²¹ da baji han-ka-buguyan, da anasuwa, da hayey di dumey. Woone yan bon no ay ga kaseeti aran gaa, sanda mate kan cine ay ji ka ci aran se ka ne: borey kan yan goono ga hayey din te si Irikoy koytara tubu. ²² Amma wo kan biya hanna ga hay ga ti: baakasinay, da farhan, ²³ da laakal kanay,da suuru kuuku, da dogonay, da booriyan, da naanay, da lalabu, da bon hiniyan. Asariya kulu si no kan ga hayey din ganji. ²⁴ Borey kan ga ti Almasihu waney mo na adam-ize daa laaley kanji, d'i bine beeje laaley, d'i bine ibaay laaley. ²⁵ Da biya hanno do no iri goono ga funa, yaadin gaa iri ma dira biya hanno ra. ²⁶ Iri ma si ciya foomanteyan, ka care futandi, ka canse care gaa.