¹ Amma ay ga ne aran se: alkawli kulu kan tubukwa go zanka, hay kulu man'a fay da bannya, baa kan nga no ga ti hay kulu koyo. ² Amma a go yaarikwa da jine funa kambe ra hala hanno kan hanne baabo kosu a se. ³ Yaadin no iri mo. Waato kan iri go zankayan, iri go tamtaray ra ndunnya hayey se. ⁴ Amma kan alwaato to, Irikoy na nga Izo donton. Wayboro no k'a hay. ⁵ A hay mo asariya fonda ra, hal a ma du ka borey kan go asariya fonda ra fansa, hal iri ma du izetaray danyan do ka ciya Irikoy izeyan. ⁶ Za kan aran ya izeyan no, Irikoy na biya hanno donton aran biney ra kan ga hen ka ne: Baaba, ay Baaba! Biya hanna din Irikoy Izo do no a fun. ⁷ Yaadin gaa ni ya manti bannya no koyne, amma ni ya ize no. Za kan ni ya ize, ni ya tubuko mo no Irikoy do. ⁸ Waato din kan aran mana Irikoy bay, aran goro tamtaray ra toorey se kan yan manti irikoyyan no da cimi. ⁹ Amma sohon kan aran ga Irikoy bay, wala a ga bisa ay ma ne Irikoy g'aran bay, mate no aran ga te ka bare ka ye ndunnya hayey do kan gazanteyan no, yaamoyan mo no? Mate no aran ga te ka miila aran ma hayey din tamtara ra? ¹⁰ Aran ga jirbey da handey, da alwaatey, da jiirey lasaabu! ¹¹ Ay goono ga hamburu aran se a ma si koy te goyo kan ay te aran game ma ciya yaamo! ¹² Ay nya-izey, ay g'aran gwaaray, aran ma bara danga ay cine, zama ay mo goro danga aran cine. ¹³ Aran mana taali kulu te ay se. Aran ga bay mo kan ay jante no. Woodin sabbay se no ay na baaru hanna waazu aran se za sintina. ¹⁴ Amma baa kan ay janta ciya siyan hari aran se,a ran mana dond'ay ka wangu ay. Amma danga Irikoy malayka cine no aran n'ay ta, danga Almasihu Yesu cine. ¹⁵ Man gaa albarka din kan go aran se don? Zama ay goono g'aran seeda, d'a hin ka te, don aran n'aran moy dagu k'ay no nd'ey. ¹⁶ Yaadin gaa, sohon ay ciya aran ibare zana ay goono ga cimi ci aran se, wala? ¹⁷ Borey din kan goono g'aran ceeci nda anniya sinda miila hanno bo. Amma i ga ba ngey m'aran kaa waani zama aran ma ngey ceeci nda anniya. ¹⁸ Amma a ga boori boro ma bara nda anniya hari hanno ceeciyan ra alwaati kulu, manti waati kan ay go aran do hinne. ¹⁹ Ay ize kayney, ay goono ga ye ka maa hay-zanay aran sabbay se hal Almasihu ma te ka boori aran ra! ²⁰ Ay ga ba ay ma ye aran do sohon hal ay m'ay jinda barmay, zama ay go bon-haway ra aran sabbay se. ²¹ Wa ci ay se, aran wo kan ga ba aran ma ye asariya ganayan ra: aran mana maa han kan asariya ci no? ²² Zama i hantum ka ne kan Ibrahim du ize hinka. Afa konna do no a du a, afa mo wayboro burcini do. ²³ Day konna izo i n'a hay gaaham miila do, amma wayboro burcino izo i n'a hay Irikoy alkawlo bon. ²⁴ Hayey wo ciya misa, zama wayborey din ga hima alkawli hinka. Afa, sinayi tondo no a fun, wo kan goono ga izeyan hay tamtaray ra, danga hajaratu nooya. ²⁵ Zama hajaratu wo, misa cine, a ga hima sinayi tondo kan go laarabey laabo ra. A ga ciya sanda urusalima, sohon wano, kan nga nda nga izey go tamtaray ra. ²⁶ Amma urusalima, beene wano, kan ga ti iri nya, ya burcini no. ²⁷ Zama i hantum ka ne: ((Ya nin wayguno kan mana hay, ma farha! Nin kan mana maa hay-zanay, ma jinde sambu ka cilili bine kaani sabbay se, zama waybora kan go goboro, a izey ga baa nda waybora kan gonda kurnye wane.)) ²⁸ Amma aran wo, ay nya-izey, aran ya alkawli izeyan no danga Isaka cine. ²⁹ Amma danga mate kan izo kan i hay gaaham miila do na izo kan i hay Irikoy biya do gurzugandi, yaadin mo no sohon. ³⁰ Amma ifo no Irikoy tira hanna ne? A ne: «ni ma konna da nga izo gaaray, zama konna izo si du tubu wayboro burcino izo banda.» ³¹ Yaadi gaa, nya-izey, iri wo manti konna izeyan no, amma iri ya wayboro burcini izeyan no.