¹ Ya galatiya borey kan sinda carmay, may no k'aran darandi, aran kan aran moy jine no i cabe taray kwaaray mate kan i na Yesu Almasihu kanji nd'a? ² Woone hinne no ay ga ba ay ma bay aran gaa: hala aran na biya hanna ta zama aran na asariya gana se, wala zama se aran na sanno kan aran maa cimandi? ³ Day aran sinda carmay baa kayna no, hal aran kan sintin biya ra, sohon aran goono ga ceeci aran ma koy jina ka toonandi aran bon gaabi ra no? ⁴ Wala aran na taabi boobo han yaamo no? Da day daahir yaamo no! ⁵ Irikoy binde goono ga biya hanna no aran se, a goono ga dabari goyey te aran game ra mo. A goono ga woodin yan te zama ga asariya gana se no, wala zama aran ga sanno kan aran maa cimandi se no? ⁶ Aran ma fongu Ibrahim: "A na Irikoy cimandi, Irikoy mo na woodin lasaabu a se adilitaray." ⁷ Aran ma woone bay mo:borey kan yan ga cimandi, ngey no ga ti Ibrahim izey. ⁸ Tawreto tira jin ka ci ka ne kan Irikoy ga dumi cindey adilandi nga jine cimbeeri do. Zama Irikoy na baaru hanna waazu Ibrahim se ka ne: "Ni do no ndunnya dumey kulu ga du albarka." ⁹ Yaadin gaa borey kan goono ga cimandi, ngey no ga du albarka Ibrahim banda,nga kan na Irikoy cimandi. ¹⁰ Amma borey kulu kan ga naanay asariya goyey gaa, laaliyan kan i bon, zama i hantum ka ne: «laalante no boro kulu kan si mo ye hay kuku kan go hantumante asariya tira ra, ka n'i te mo.» ¹¹ Zama woone, taray kwaaray ra no a go:asariya ganayan si nan boro kulu ma ciya adilante Irikoy jine, zama «boro kan ciya adilante Irikoy jine, cimbeeri ra no a ga funa.» ¹² Amma asariya wo, manti cimbeeri ra no a bara bo. Amma tawretu tira ne: «boro kan g'i gana, a ga nga baafuna te i ra.» ¹³ Almasihu n'iri fansa asariya laaliyano gaa, za kan a ciya laalante iri sabbay se. Zama a go hantumante: «laalante no boro kulu kan i sarku bundu gaa.» ¹⁴ Woodin te mo hala albarka kan Irikoy no Ibrahim se ma kaa dumi kulu gaa Yesu Almasihu do, hala mo iri ma du biya hanno cimbeeri ra, kan Irikoy jin ka alkawli sambu ka ne nga ga no. ¹⁵ Ay nya-izey, ay ga salan aran se da han kan boro kulu ga bay:baa alkawli kan ti boro wane, waati kan i n'a daahirandi, ¹⁶ boro kulu s'a kaa, boro kulu si tonton a gaa mo. Ibrahim da nga banda bora se no Irikoy na alkawlo no. A mana ne: «banda se», danga boro boobo, amma «ni banda bora », danga banda gaa boro fo no, kan ga ti Almasihu. ¹⁷ Woone ay goono ga ci: Irikoy jin ka alkawlo daahirandi. Asariya kan furo jiiri zangu taaci nda waranza banda, a si alkawlo wo ganandi, hala a ma ciya yaamo. ¹⁸ Zama nda tubo fun asariya do, a si fun alkawlo do, amma Irikoy n'a no Ibrahim se alkawlo bon nga gomno ra. ¹⁹ Yaadin gaa, ifo no asariya ga hanse binde? To, Irikoy n'a tonton no hala borey ma faham da han kan ga ti nga miila daaruyan. Asariya wo ma goro mo hala banda bora ma kaa kan se i na alkawlo no. A na asariya samba mo malaykayan banda, sasabandiko fo kambe ra. ²⁰ Sasabandikwa binde, manti boro follon hinne se no a bara. Amma Irikoy ya nga hinne no. ²¹ Wala asariya ga gaaba nda Irikoy alkawlo no? Abada! D'i na asariya no kan ga hin ka fundi no, don daahir no adilitaray Irikoy jine ga bara asariya din ra. ²² Amma Irikoy tira hanney ne boro kulu go daabante no zunubi dabaro cire, hala i ma alkawlo no borey kan yan goono ga cimandi. Alkawlo wo ga ti cimbeeri wane Yesu Almasihu ra. ²³ Amma za cimbeeri mana kaa, iri ya asariya kas'izeyan no. Iri go daabante no hala cimbeeri ga anniya ka bangay. ²⁴ Yaadin gaa asariya n'iri gaay danga ize gaayko kala Almasihu kaa, hala iri ma ciya adilante Irikoy jine cimbeeri ra. ²⁵ Amma sohon kan cimbeeri kaa, iri si ize gaaykwa din dabaro cire koyne. ²⁶ Zama aran kulu Irikoy ize yan no, zama aran na Almasihu Yesu cimandi. ²⁷ Zama aran kulu kan se i na baptisma te Almasihu ra, aran na Almasihu faka. ²⁸ Sohon fayanka si no: da yahudance no, wala dumi cindey boro no, da bannya no wala burcini no, da alboro no wala wayboro no,zama aran kulu afollon no Almasihu Yesu ra. ²⁹ Amma d'aran ya Almasihu wane yan no, kulu aran ya Ibrahim bandayan no, da tubukoyan mo, mate kan alkawlo ci.