¹ Kala jiiri way cinda taaci banda no in da barnaba ye urusalima koyne. Ay koy zama Irikoy bangandi ay se ay ma koy. ² ay koy ka baaru hanna dede kan ay goono ga waazu dumi cindey se. Amma ay n'a dede labu gaa jine borey se, zama a ma si te ay goono ga goy, wala ay jin ka goy yaamo se. ³ Amma baa titos kan go ay banda, kan ga ti dumi cindey boro, i man'a tilasandi ka dambangu. ⁴ Sanno wo tun mo nya-ize tangari wane fooyan sabbay se kan mollo ka furo iri game ra, hal i m'iri burcinitara kan go Almasihu ra sunsunay, ⁵ zama i m'iri dan tamtaray ra. Iri mo, iri mana yadda i se baa kayna, hala baaru hanna cimo ma bara arab game ra. ⁶ Amma ngey kan ga ti boro beerey go n. (Mate kulu kan i ciya d'a, ay baa si nda woodin. Irikoy sinda bara'a-bara'a). Ngey din kan ga ti jin boroyan mana hay kulu tonton ay waazo gaa. ⁷ Amma jin borey din di kan Irikoy na baaru hanna talfi ay gaa ay ma kond'a dumi cindey se, mate kan cine a n'a talfi bitros gaa a ma kond'a yahudancey se. ⁸ Zama Irikoy kan goy bitros ra a ma ciya diya yahudancey se, nga no goy ay mo ra ay ma ciya diya dumi cindey se. ⁹ Yakuba nda kefas da yohanna kan yan ga ti bonjareyan di gomno kan Irikoy n'ay no. Waato din gaa binde, i na baakasinay danyan kambe no in da barnaba se hal iri ma koy dumi cindey do, ngey mo ma koy yahudancey do. ¹⁰ Amma i ne iri ma fongu nda talkey. Woodin mo no ay gonda anniya ay ma te. ¹¹ Amma waato kan kefas kaa antiyos kwaara, ay kakaw d'a me-da-me, zama a na taali te. ¹² Zama za boro fooyan mana fun yakuba do ka kaa, bitros doona ka gwa dumi cindey borey banda. Amma waato kan i kaa, a ye banda ka nga bon fay waani. A goono humburu borey kan go dambanguyan borey do harayq. ¹³ Yahudance cindey mo n'a gana munaficitaray ra, hala barnaba mo ye banda i munaficitara sabbay se. ¹⁴ Amma waato kan ay di i siino ga dira mate kan ga saba baaru hanna cimo bon, kala ikulu jine ay ne kefas se: nin kan ga ti yahudance, ni goono ga goro danga dumi cindey boro cine, manti danga yahudance cine. Ifo se no i goono ka dumi cindey tilasandi i ma goro danga yahudancey cine. ¹⁵ Iri wi, i n'iri hay yahudanceyan, manti cindi zunubikooney. ¹⁶ Iri ga bay mo kan Irikoy si boro guna adilante nga jine zama se bora ga asariya gana. Amma a ga boro guna adilante nga jine da bora na Yesu Almasihu cimandi. Iri bumbey mo na Almasihu Yesu cimandi, hal Irikoy m'iri guna adilante nga jine iri cimbeero sabbay se Almasihu ra, manti zama iri na asariya gana se. Zama boro kulu si hin ka du adilitaray Irikoy jine asariya ganayan ra. ¹⁷ Amma d'iri go ga ceeci Irikoy m'iri no adilitaray Almasihu ra, iri di mo iri ya zunubikoonniyan no, yaadin gaa Almasihu g'iri dan iri ma zunubi te no,wala? Abada! ¹⁸ Zama nd'ay ye ka cina hayey kan ay jin ka zeeri, ay go ga cabe kan ay wo asariya daaruko no. ¹⁹ Zama ay wo,asariya do no ay bu asariya se, hala ay ma funa Irikoy jine. ²⁰ Almasihu banda no i n'ay kanji. Kulu nda yaadin ay goono ga funa, amma manti ay no, day Almasihu no goono ga funa ay ra. Fundo mo kan ay goono ga funa nd'a sohon ay gaahamo ra, ay goono ga funa nd'a cimbeeri ra. Cimbeero wo go Irikoy Izo ra, nga kan ga ba ay, kan na nga bon no ka bu ay sabbay se. ²¹ Ay si ga Irikoy gomno ye yaamo, zama nda boro ga du adilitaray Irikoy jine asariya ganayan do, yaadin gaa Almasihu bu yaamo nooya.