¹ Nya-izey, d'aran bay boro fo na taali te, aran kan to da biya hanna, aran ma bora din ye fondo nda lalabu. Ni mo ma haggoyda ni bon, hala ni ma si dusiyan. Aran ma care tinay sambu. ² Yaadin gaa no aran ga asariya kan Almasihu no toonandi. ³ Zama nda boro ga tammaha nga wo hay fo no,a binde manti hay kulu no, a goono ga nga bon hallii day no. ⁴ Amma boro kulu ma nga bon goyo deedandi,waato gaa no a ga du farhan nga bon hinne se, amma manti nda boro fo gaa deedandiyan. ⁵ Zama boro kulu ga nga bon tina sambu. ⁶ Amma boro kan i ga dondonandi nda Irikoy sanno, a ma nga dondonandikwa nafa nga hari hanno kulu ra. ⁷ Wa s'aran bon darandi! Boro si Irikoy hahaara. Zama han kan boro duma, nga mo no ni ga wi. ⁸ Zama boro kan duma han kan ga kaan nga bine ibaay laala se, bine ibaay laalo do no a ga fumbi wi. Amma boro kan ga duma han kan ga kaan biya hanno se, biya hanno do no a ga fundi hal abada wi. ⁹ Iri ma si farga nda goy hanno teeyan, zama alwaati toonanta ra iri g'a albarka wi, d'iri man'a nan. ¹⁰ Yaadin gaa waati kulu kan iri gonda daama, iri ma ihanno te boro kulu se,sanku fa ngey kan ga ti cimi fonda almayaaley. ¹¹ Wa guna biir'ize bambatey wo kanay goono ga hantum aran se d'ay kamba. ¹² Borey kan ga ba ngey ma booriyan cabe adam-ize alhaalo bon, ngey no g'aran tilasandi aran ma dambangu. I goono ga woone te zama ngey maa gurzugay hinne se Almasihu kanjiyan bundo sabbay se. ¹³ Zama baa ngey bumbey kan i dambangu siino ga asariya fonda gana, amma i ga ba ngey m'aran dambangu zama ngey ma fooma nd'aran gaahamey. ¹⁴ Amma ay wo, ay si fooma abada, da manti iri Rabbi Yesu Almasihu kanjiyan bundo kan do i na ndunnya kanji ay se, i n'ay kanji mo ndunnya se. ¹⁵ Zama i ma boro dambangu wala i ma s'a dambangu sinda nafa, amma wo kan gonda nafa ga ti takahari taji. ¹⁶ Boro kulu mo kan ga dira lordo wo bon, laakal kanay da suuji ma bara abanda, da Israyla kan ga ti Irikoy wano banda mo. ¹⁷ Boro kulu ma si ye k'ay taabandi koyne, zama dolley kan go ay gaahamo gaa ya Yesu seeda no. ¹⁸ Ay nya-izey, iri Rabbi Yesu Almasihu gomno ma bara aran biya banda. Amin!