¹ Za kan i n'aran tunandi Almasihu banda, aran ma hayey kan yan go beene ceeci, nango kan Almasihu goono ga goro Irikoy kambe gwaaro gaa. ² Aran ma laakal dake hayey kan yan go beena ra gaa, manti hayey kan yan go ndunnya ra gaa. ³ Zama aran bu no. Aran fundey mo goono ga tugu Almasihu banda Irikoy do. ⁴ Waati kan Almasihu kan ga ti aran fundo ga bangay, aran mo ga bangay a banda darza ra. ⁵ Aran ma ndunnya hayey kan goono ga goy aran gaahamey ra wi. Ngey neeya: zina, da zibi, da canse laalo, da ibaay laalo, da biniyay(zama biniyay ya tooru ganayan dumi fo no). ⁶ Woodin yansabbay se mo no Irikoy bine tuna goono ga kaa[borey kan yan ga wangu ka Irikoy gana yan gaa]. ⁷ I game ra mo no aran n'aran diraw te waato, waato kan aran goro hayey din ra. ⁸ Amma sohon kal aran ma woone yan kulu nan: bine tunay, da futay, da zamba, da alasiray. Sanni ziibo mo ma si fatta aran meyey ra. ⁹ koyne aran ma si taari care se, zama aran ma boro zeena kaa, nga nda nga goyey kulu. ¹⁰ Aran ma boro taajo faka mo kan Irikoy, a takakwa, goono ga tajandi bayray ra nga bumbo alhalo bon. ¹¹ Boro tajitara din ra fayanka sino: da garekey no wala yahudancey, da dambanguyankoy no wala boro kan si dambangu, wala mebaraw wala sitancey(danga mebaraw kulu koda), wala bannya wala burcini. Amma Almasihu no ga ti hay kulu, a go hay kulu ra mo. ¹² Yaadin gaa zama aran ya Irikoy suubananteyan no, a hanantey no, da borey kan a ga ba mo, kala aran ma bakaraw bine faka, da boriyan, da bon kaynandiyan, da lalabu, da suuru kuuku. ¹³ Aran ma suuru care se, aranma care yaafa mo. D'aran ra boro fo gonda kalima sanni boro fo bon, a ga hima mate kan cine Rabbi n'aran yaafa, yaadin mo no aran ma te care se. ¹⁴ Hayey din kulu bon, aran ma bara nda baakasinay, zama nga no g'aran haw care gaa gumo hal aran ma ciya afollon. ¹⁵ Almasihu laakal kana mo m'aran biney may, zama laakal kanay wo se no i n'aran ce gaaham follon ra. Aran ma saabu mo. ¹⁶ Almasihu sanno ma goro aran ra, a ma yulwa mo laakal kulu ra. Aran ma care dondonandi ka care yaamar mo da zaburayan da saabu baytuyan da dooniyan kan fun biya hanno do. Aran ma baytuyan te da gomni aran biney ra Irikoy se. ¹⁷ Hay kulu mo kan aran goono ga te, da sanni ra no wala goyvra no, aran m'a kulu te Rabbi Yesu maa ra ka baaba Irikoy saabu a do. ¹⁸ Wandey, aran m'aran bon ye ganda aran kurnye se mate kan a ga hima nd'a Rabbi ra. ¹⁹ Kurnyey, aran ma ba aran wandey aran ma si fottu i gaa mo. ²⁰ Zankey, aran ma aran hayrey gana hay kulu ra, zama woodin no ga kaan Rabbi se. ²¹ Baabey aran ma si aran izey kurtunandi, zama i biney ,a si sara. ²² Bannyey aran ma aran koyey gana, kan yan ga ti ndunnya waney. ²³ Aran m'i gana hay kulu ra, manti waati kan i goono g'aran gune hinne bo, zama se i maa aran kaani. Amma aran m'i gana da bine follon Rabbi humburkumay ra. ²⁴ Hay kulu mo kan aran ga te, aran m'a te da bin kulu , danga Rabbi se, manti borey se. Zama aran ga bay kan Rabbi do aran ga du tubuyan kan ga ti aran alhakko. ²⁵ Wa may Rabbi Almasihu se! Zama boro kan ga laala te, i g'a laala din yeti a se. Baar'a-baar'a si no mo.