¹ Zama ay ga aran ma bay ay tangami bambata gaa kan ay go ga te aran sabbay se, da ngey mo sabbay se kan go laodisiya ra da borey kulu mo kan mana di ay mo-da-mo. ² Ay go ga tangam zama i biney ma du gaabi, i ma goro margante baakasinay ra hal i ma du arzaka kan fun fahamay tabbatante ra. Woodin yan no ga nan i ma Irikoy gundo bay, kan ga ti Almasihu. ³ A ra no laakal da bayray arzaka kulu go tugante. ⁴ Woodin no ay goono ga ci hala boro kulu ma si aran hallinda sanni kan ga darandi. ⁵ Zama baa kan ay si aran do noodin gaaham ra, ay go aran dobiya hanno ra. Ay goono ga farhan ka di mate kan aran sasare ka kay care banda nda gaabi aran cimbeero do Almasihu ra. ⁶ Mate kan aran na Rabbi Almasihu Yesu ta, yaadin mo no a ga hima aran ma dira a ra. ⁷ Aran kaajey sinji a ra. Aran cina abon mo hal aran te gaabi cimbeeri ra, mate kan cine i n'aran dondonandi nd'a. Aran goono ga yulwa a ra da saabuyan mo. ⁸ Aran ma te laakal hala boro kulu ma si du aran da nga bayray da halliyan yaamey, borey alaadey bon nda ndunnya hayey bon, kan manti Almasihu bon. ⁹ Zama a ra no Irikoytara toonanta kulu goono ga goro a gaahamo ra. ¹⁰ Irikoy n'aran toonandi Almasihu ra mo, nga kan ga ti koytaray da hin kulu bono. ¹¹ A ra mo no i n'aran dambangu, manti dambanguyan kan kambe ga te bo, amma da Almasihu wane dambanguyano kan a te, kan na adam-ize daa laalo dabaro kaa. ¹² I n'aran fiji a banda baptisma ra, i n'aran tunandi mo a banda, aran cimbeero do Irikoy goyo ra, nga kan na Almasihu tunandi ka kaa buukoy game ra. ¹³ Aan mo kan go buukoyan aran taaley d'aran adam-ize daa laala dambanguyan-janay sabbay se, Irikoy n'aran funandi a banda k'iri taaley kulu yaafa iri se. ¹⁴ Asariya hantumo kan kay iri gaa ka gaaba nd'iri mo, Irikoy na tuusu ka kaa k'a kanji kanjiyan bundo gaa. A na koyey da hin koyey kaa nga gaa. ¹⁵ Gaa no a n'i haawandi taray kwaaray ka du zaama i bon kanjiyan bundo do. ¹⁶ Wa si ta boro kulu m'aran ciiti gwa da han ciine ra, wala batu hane, wala handu kayyan, wala asibti zaari ciine ra. ¹⁷ Hayey din ya biyayan no hayey kan yan ga anniya ga kaa se, amma Almasihu ga ti biyey din koyo. ¹⁸ Boro fooyan go no kan ga maa kaani ka ngey bon kaynandiyan alhaali cabe ka sombu malaykey se. Wa si nan borey wo dumi m'aran zamba k'aran zaamayan alhakko zay. Borey din goono ga kay bangayyaney kan ngey di ra. I ga ngey bon beerandi sabaabu si, ngey adam-ize lasaabey bon. ¹⁹ I fay no ka fun bono gaa. A do no gaahamo kulu goono ga gaay ka haw care gaa dabey da kaajey do ka tonton da toonandiyan kan ga fun Irikoy do. ²⁰ Za kan aran bu Almasihu banda ka fay da ndunnya hayey, ifo se no aran goono g'aran gora te danga ndunnya goray, k'a lordey gana. ²¹ Danga i ma ne: ²² Ma si woone ham! Ma si woone taba! Ma si lamba woone gaa! Hayey din binde ga halaci ngey goyey ra, zama i n'i sinji borey lordey nda i dondonandiyaney bon. ²³ Hayey din ga hima danga i gonda laakal, zama fundi ibaay sambuyan anniya ra n'i bara, da bon kaynandiyan da gaaham taabandiyan ra, amma i sinda nafa kulu gaaham ibaay laaley bon hiniyan se.