² Aran ma mo ye adduwa ra ka batu a ra mo nda saabuyan. ³ Aran ma te adduwa iri mo se, Irikoy ma fondo feeri iri se nga sanno se, hal iri ma Almasihu gundo ci kan sabbay se no ay go kasu. ⁴ Zama ay m'a bangandi mate kan cine a ga hima ay se ay ma ci. ⁵ Aran ma dira nda laakal ngey kan yan mana cimandi jine. ⁶ Aran ma alwaati wi mo da laakal. Alwaati kulu aran sanney ma ciya gomni waney, danga gwaari kan maa ciiri, zama zran ma du ka bay mate kan cine no aran ga tu d'a boro kulu se. ⁷ Ticikos ga ti iri nya-izo, iriu baakwa, saajawko naanaykoy, ay tamtaray hangasin mo no Rabbi ra. A g'aran bayrandi d'ay baaru kulu. ⁸ Woodin sabbay se no ay n'a donton aran do, zama aran ma du k'iri gora bay, a m'aran biney gaabandi mo. ⁹ Ay na onisimos donton a banda mo, onisimos ga ti nya-ize naanaykoy, iri baakwa, aran do boro no. Nga mo no ga hay kulu ci aran se kan goono ga te neewo. ¹⁰ Aristarkos, ay kasu hangasino g'aran fo. Markos, barnaba waymayzo mo goono g'aran fo. Aran jin ka du lordi a bon, d'a kaa aran do aran m'a zumandi. ¹¹ Yasuwa mo, kan se i ga ne yustos goono g'aran fo. Ikulu yahudance yan no. Ngey hinne no ga ti ay goy hangasiney Irikoy koytara se kan n'ay saajaw. ¹² Abafaros mo, kan ga ti aranbora, Almasihu Yesu tamo, g'aran fo. Alwaati kulu a goono ga kookari aran se nga adduwey ra zama aran ma kay timmanteyan da toonanteyan Irikoy miila kulu ra. ¹³ Zama ay g'a seeda: a go ga taabi aran se gumo da ngey mo se kan yan go lawodisiya da hiyarapolis. ¹⁴ Loktoro luka, iri baakwa, da dimas goono g'aran fo. ¹⁵ Aran ma nya-izey fo kan yan go lawodisiya. Aran ma nimfas da nga windo ra Almasihu marga fo. ¹⁶ Waati kan cine i na tira wo caw aran do, a m'a caw mo lawodisiya Almasihu marga ra. Aran mo aran ma lawodisiya tira caw. ¹⁷ Aran m,a ne arkipas se a ma haggoy da saajaw goyo kan a ta Rabbi do, hal a m'a toonandi.