¹ Amma ni bay kan zamana wo bananta ra alwaati laalo yan ga kaa. ² Zama borey ga bara ngey bon hinne baakoyan da nooru baakoyan, da foomanteyan, da bonbeeraykoyyan. I ga bara alaasiriyyan, i ga murte ngey hayrey gaa, i si saabu, i biney si hanan. ³ I sinda baakasinay kan ga hima nd'a, i sinda suuji. Kormotanteyan no, i si hin ngey bon, bine-biyan no, i ga konna ihanno. ⁴ Amaana gwaakoyan, bon-hari-waasoyan, i ga haw zi gumo, i ga ba ndunnya kaani ka bisa mate kan i ga ba Irikoy. ⁵ I gonda Irikoy ganayan alhaali, amma i wangu wo kan ga ti a dabaro. ⁶ Ma ni banda bare borey din yan gaa. Zama borey din dumey ra afooyan goono kan ga mollo ka furo fuwey ra ka wayborey kan yan biney si gaabi di ka dan tamtaray ra, wayborey kan yan to da zunubi tinay, kan yan daray bine ibaay laalo waani-waani ganayan sabbay se. ⁷ Waati kulu i goono ga dondon, amma i si hin ka to cimo bayra gaa hal abada. ⁸ Mate kan cine yannisu nda yambirisu murte musa gaa. yaadin mo no borey din goono ga murte cimo gaa. Boroyan no kan laakaley sara gumo. Boroyan no kan i mana yadda nd'ey,zama i cimibeero manti cimi wane no. ⁹ Amma i si jina-koyyan beeri te zama i lasaabu-jana ga bangay boro kulu se, mate cine mo boro hinka din wano ciya. ¹⁰ Amma ni wo, ni n'ay dondonandiyano gana, d'ay gora kan dumi ay te, d'ay anniya, d'ay cimbeero, d'ay suuro, ¹¹ d'ay baakasina, d'ay munya, d'ay gurzugandiyaney, d'ay taabi hanyaney. Taabi woofo dumi yan no mana du ay antiyos ra, da ikoniya, da listra ra, gurzugay woofo dumi yan mo no ay mana suuru nd'a? ¹² Rabbi mo n'ay faaba i kulu ra. Yaadin gaa, borey kulu kan yan ga ba ngey ma Irikoy gana Almasihu Yesu ra ga ma gurzugay. ¹³ Amma boro laaley da hiilantey ga koy jina goy laalo ra. I goono ga halli, i goono g'i halli mo. ¹⁴ Amma ni wo, ni mavsoobay ka hayey din kan ni dondon ka cimandi gana, zama ni ga bay borey kan yan gaa ni na hayey din dondon. ¹⁵ Ni ga bay mo kan za ni go zanka no ni na Tira hanney bay kan gonda dabari ka ni no fahamay ka koy faaba do kan go cimbeeri ra Almasihu yesu ra. ¹⁶ Irikoy tira hanney kulu funsanteyan no nda Irikoy fulanzama. I gonda nafa mo dondonandiyan da deeniyan da dan fondoyan da goojeyan se mo adilataray ra, ¹⁷ hala Irikoy bora ma bara toonante, soolante mo da cimi, goy hanno kulu teeyan se.