¹ Ay goono ka ni lordi Irikoy da Almasihu yesu jine, nga kan ga fundikooney da buukoy ciiti, ay ga ni lordi mo a bangandiyana d'a koytara bon: ² Ni ma sanno waazu. Da daama go no wala nd'a si no, ni ma kokari. Ma deeni, ma kaseeti, ma yaamar da suuru nda dondonandiyan kulu. ³ Zama alwaati ga kaa kan borey si hin suuru nda dondonandiyan cimi-cimo, amma i ga dondonandikoyan margu ngey bon se, ⁴ ngey bine ibaay laaley bon, kan ga ci i se han kan ga kaan i hangey se. I ga ngey hangey kaa cimi gaa ka kamba ka koy jandey gaa. ⁵ Amma ni wo ni ma hin ni bon hay kulu ra. Ma hin taabi suuru, ma baaru hanna waazuko goyo te, ma ni saajaw goyo toonandi. ⁶ Zama za sohon ay ciya hanyan sargay kan i ga soogu, ay koyyano alwaato mo to. ⁷ Ay na wangu hanno te, ay n'ay bata toonandi, ay na cimbeeri fonda gana ka haggoy d'a a ma boori. ⁸ Sohon binde adilataray bontoba go jisante ay se, kan Rabbi, adilataraykoyo kan ga ciiti te, g'ay no zaaro din ra. Manti ay hinne se n'a g'a no bo, amma borey kulu kan yan ga ba a bangandiyano mo se. ⁹ Ma waasu ka ka ay do, ma si gay bo. ¹⁰ Zama zaamana wo baakasinay sabbay se no Dimas dira k'ay nan ka koy tassalonika. Karaska koy galatiya laabu, titos mo koy dalmatiya laabu. ¹¹ Luka hinne no go ay banda. Amma ay na ticikos donton afasos. ¹² Da ni ga kaa, ma kande ay kwaayo kan ay nan karbus kambe ra tarawasa kwaara. ¹³ Ma kande tirey mo, sanku fa wo kan yan i hantum kuuru gaa. ¹⁴ Iskandari, guru-ciray zamo, na hari laalo boobo te ay se. Rabbi g'a bana a goyo bon. Ni ma haggoy d'a mo fa, ¹⁵ zama a murte iri sanney gaa gumo. ¹⁶ Ay faasayan sintina kan ay te, boro kulu mana kay ay se, amma i kulu n'ay nan ay hinne. Irikoy ma si woodin lasaabu i se. ¹⁷ Amma Rabbi kay ay se. A n'ay gaabandi mo, hal ay na baaru hanna waazuyano te, dumi cindey kulu mo maa. Irikoy n'ay faaba mo muusu beero meyo gaa. ¹⁸ Rabbi g'ay faaba ka kaa hari laalo kulu kambe. A g'ay faaba mo ka kond'ay nga beene koytara ra. Darza ma bara a gaa hal abada abadin! Amin. ¹⁹ Ma birisila nda akila fo, da onisifaros windo borey. ²⁰ Arastos goro korint, amma ay na turofimos nan militos kwaara, zama a go ga jante. ²¹ Ma te ni hina ka kaa za jawo mana to. Obulos goono ga ni fo, da budens, da linos da kalawdiya nda nya-izey kulu. ²² Rabbi ma bara ni biya banda. Gomni ma bara aran banda.