¹ Ni binde, ay izo, ma gaabu gomni ra kan go Almasihu yesu ra. ² Hayey din kan ni maa ay do mo seeda boobo jine, I ala ni m'i talfi boro naanaykoyyan gaa kan yan ga hin ka afooyan mo dondonandi koyne ³ Ma maa taabi ay banda sanda Almasihu sooje hanno. ⁴ Sooje kulu si nga bon didiji nda ndunnya wo muraadu,hala bora kan n'a suuban ma maa a kaani. ⁵ Da boro go yoonay ra mo, i s'a alhakko no a se kala nda n'a te da mate kan cine a ga hima nd'a. ⁶ Aga hima mo farikoy koy kan go ga goy ma jin k'a albarka gwa. ⁷ Ni ma laakal dan han kan ay go ga ci gaa, gaa no Rabbi ga fahamay no ni se hay kulu ra. ⁸ Ma fongu nda Yesu Almasihu kan tun ka fun buukoy game ra, nga kan fun Dawda dumo gaa, ay baaru hanna bon. ⁹ Baaru hanna din sabbay se no ay goono ga taabi hal i n'ay haw danga zambante cine. ¹⁰ Day i mana Irikoy sanno haw. Woodin sabbay se no ay goono ga suuru nda hay kulu borey kan Irikoy suuban sabbay se, zama ngey mo ma du faaba kan go Almasihu Yesu ra da hal abada darza. ¹¹ Sanno wo naanaykoy no: d'iri bu Almasihu banda, iri ga funa mo a banda. ¹² D'iri go ga suuru, iri ga koytaray gwa mo a banda. D'iri n'a ze, nga mo g'iri ze. ¹³ D'iri wo sinda naanay,nga wo go naanaykoy, zama a si hin ka wangu nga bon. ¹⁴ Ma borey fongandi nda hayey din k'i lordi Irikoy jine i ma si kakaw sann'izey bon, zama woodin si hay kulu hanse, kala a ma borey kan ga maa halaci. ¹⁵ Ma gurjay ka ni bon salle yaddante Irikoy se, goyteeri kan sinda haawi mafaari, kan goono ga cimi sanno fay-fay mate kan a ga hima. ¹⁶ Amma ma fay da sanney kan sinda nafa da wo kan yan manti Irikoy wane, ¹⁷ zama i teekoy ga borey candi ka konda Irikoy wangay ra. ¹⁸ I dondonandiyano mo ga gwa danga bi gwaari cine. Himinayos da filitos mo go i ra, kan yan kamba cimi fonda gaa. I goono ga ne buukoy tunandiyano jin ka te, i goono ga boro fooyan cimbeero zeeri mo. ¹⁹ Kulu nda yaadin, Irikoy daba gaabikoono si zinji. A kawatimo ga ti Rabbi ga bay boro kan ga ti nga wane. Koyne, boro kulu kan goono ga Rabbi maa ce ma fay da goy laalo. ²⁰ Amma fu bambata ra manti wura da nzarfu jinayyan hinne no go no, amma bundu nda botogo wane yan mo go no. Afooyan darza goy wane yan no, afooyan mo kayna goy wane yan no. ²¹ Boro kulu kan ga nga bon hanandi ka waana kayna waney ga ciya darza goy teeyan jinay, kan i fay waani. A gonda nafa mo nga koyo se. A go soolante goy hanno kulu se. ²² Ma zuru zankataray ibaay laaley se, ma soobay ka adilataray, da cimbeeri, da baakasinay da laakal kanay gana, borey banda kan yan goono ga Rabbi ce da bina hanno yan. ²³ Amma ma fay da kakaw yaamey da saamotaray waney, za kan ni ga bay kan i ga kande yanje. ²⁴ A ga hima mo Rabbi bannya ma si yanje, amma a ma ciya baanikom boro kulu se. ²⁵ A ma ciya dondonandiko hanna kan gonda suuru. Amma ciya mo goojeko borey kan ga gaaba nd'a se lalabu ra, zama hambara Irikoy ga nan i ma tuubi hal i ma du ka cimo bay gumo. ²⁶ I ma ye ngey laakaley gaa mo ka fun ibilis birimo ra, nga kan n'i d'i k'i tilasandi i ma nga miila te.