1 Sohon nya-izey, iri Rabbi Yesu Almasihu kaayano ciine ra, da iri marguyano a do, iri goono g'aran gwaaray aran ma si zinji nda waasi aran laakaley ra. 2 Aran laakaley ma si tun mo biya fo fahamandiyan sabbay se, wala tira kan i ne, way, a fun iri do sabbay se, kan ne, way, Rabbi zaaro jin ka kaa. 3 Mate kulu kan no, wa si nan boro kulu m'aran halli. Zama zaaro din si ka kala nda murteyano jin ka te. Asariya taamukwa mo ma bangay jina, nga kan ti halaciyan izo. 4 Nga no ga murte ka nga bon beerandi ka bisa hay kulu kan se i ga ne irikoy, wala hay kulu kan se i goono ga sombu, hal a ga goro Irikoy fuwo ra, ka nga bon fe ka ne nga wo Irikoy no. 5 Aran si fongu kan ay na hayey din ci aran se za waato kan ay go aran do? 6 Sohon mo aran ga bay han kan goono g'a gaay, kan ga nan a ma si bangay kala nga alwaato ra. 7 Zama asariya taamuyano gundo goono ga goy baa sohon. Kala day nga kan goono g'a gaay sohon g'a te hal i ma nga kaa fonda gaa. 8 Waati din ga no asariya taamukwa gaa bangay. Rabbi g'a zeeri nda nga me fusuyano k'a halaci mo nda nga kaayano kaaro. 9 Asariya taamukwa din kaayano ga te saytan dabaro ra, da dabari goy kulu dumi, da alaama, da dambari hari kan yan ga ciya tangari wane yan, 10 Da fafagay goy laalo kulu dumi borey kan yan goono ga halaci se. I goono ga halaci zama i wangu ka ba cimo hal i ma du faaba. 11 Woodin sabbay se mo no Irikoy ga halliyan gaabikoono samba i se hal i ma tangaro cimandi. 12 Gaa no borey kulu kan yan mana cimo cimandi, amma i maa kaani goy laalo teeyan ra, Irikoy m'i ciiti ka zeeri. 13 Iri ga hima ka Irikoy saabu waati kulu aran sabbay se, nya-izey kan Rabbi ga ba. Zama Irikoy n'aran suuban za sintina aran ma du faaba se, fayyano kan biya hanna te aran se da cimi gaa deyeno do. 14 Woodin sabbay se a n'aran ce iri basru hanna do hal aran ma du iri Rabbi Yesu Almasihu darza. 15 Woodin sabbay se binde, nya-izey, aran ma kay, aran ma dondonandiyaney kan iri n'aran dondonandi nd'a gaay. Nda me-da-me no wala nd'iri tira do waney. 16 Iri Rabbi Yesu Almasihu bumbo d'iri baabo Irikoy m'aran biney gaababdi k'aran sinji goy hanno nda sanni hanno kulu ra. 17 Nga no ba iri k'iri no hal abada bine-gaabi nda beeje hanna gomni do.