¹ Ay bulos, da sila nda timotiyos, iri go ga tassalonika borey Almasihu marga fo kan go iri Baabo Irikoy da Rabbi Yesu Almasihu ra. ² Gomni nda lakal kanay ma bara aran banda, kan yan fun baaba Irikoy da Rabbi Yesu Almasihu do. ³ Nya-izey, a ga hima iri ma Irikoy saabu alwaati kulu aran sabbay se. Woodin no ga hagu, za kan aran cimbeero goono ga beeri gumo. Aran baakasina mo kan aran boro fo kulu goono ga cabe carae se go ga tonton. ⁴ Woodin sabbay se iri bumbey goono g'aran sifa Irikoy margey ra aran suuro d'aran cimbeero sabbay se, aran gurzugayey kulu ra da kankamey kan ra aran goono ga hin suuru. ⁵ Woodin ga ti seeda Irikoy cimi ciito bon, kan ga nan Irikoy m'aran lasaabu kan aran to aran ma furo nga koytara ra, kan se haciika aran goono ga maa taabi. ⁶ Zama adilitaray hari no Irikoy se a ma kankam ye borey kan yan goono g'aran kankam din se. ⁷ Adilitaray hari mo no a m'aran kan go kankam ra no fulanzamay iri banda. ⁸ Woodin yan ga te waati kan Rabbi Yesu ga bangay ka fun beena ra da nga malayka dabarikooni danji beele ra. A ga borey kan yan si Irikoy bay ciiti, da borey kan yan wangu ka iri Rabbi Yesu baaru hanna gana. ⁹ Borey din ga du alhakku kan ti halaciyan, hal abada wane, kan g'i fay da Rabbi moyduma d'a dabaro darza. ¹⁰ Woodin ga te zaaro din ra waati kan Yesu ga kaa ka du beeray nga hanatey ra. Borey kulu kan yan cimandi ga dambara nd'a mo ngey game ra. Zama aran na seeda kan iri te aran se cimandi. ¹¹ Woodin sabbay se binde, alwaatinkulu iri goono ga adduwa te aran se hal iri Irikoyo m'aran lasaabu kan aran to ceeyano wo. ¹² A ma muuradu hanno kulu da cimbeeri goy kulu toonandi aran se da nga dabaro mo, hal iri Rabbi Yesu maa ma du beeray aran ra, aran mo ma du beeray a do, iri Irikoyo da Rabbi Yesu Almasihu gomno do.