¹ Woodin banda nya-izey, aran ma te iri se adduwa, hala Rabbi sanno ma waasu ka say-say ka du beeray mo, mate kan cine a goono ga te aran do. ² Wa gwaaray mo iri ma fun boro laalo siirantey kambe ra, zama manti boro kulu no ga ti cimi fondo ganakoyan bo. ³ Amma Rabbi ya naanaykoy no. A g'aran sinji k'aran wa izefuto. ⁴ Iri gonda aran gaa naanay mo Rabbi do kan aran goono ga hayey kan iri n'aran lordi nd'a din te aran ga soobay k'i te mo. ⁵ Rabbi mo m'aran biney candi ka kande Irikoy baakasina da Almasihu suuro ra mo. ^{6 7} Amma iri g'aran lordi, nya-izey, iri Rabbi Yesu Almasihu maa ra, aran ma fay da nya-ize kulu kan goono ga hawfunay goray te, kan manti nda dondonandiyaney kan aran ta iri do. Aran bumbey ga bay mate kan cine a ga hima aran m'iri dondon. Zama iri wo mana hawfunay goray te aran game ra. ⁸ Iri mana boro kulu gwaari gwa yaamo. Amma goy da taabi ra no cin da zaari iri goy hal iri ma si boro kulu tinandi aran ra. ⁹ Manti danda iri sinda dabari no bo, amma zama iri m'iri bon ciya deedandiyan hari aran se, u al aran ma dondon iri do ¹⁰ Zama baa waato kan iri go aran do, iri n'aran lordi nda woodin ka ne: boro kulu kan wangu ka goy, bora koy ma si gwa mo. ¹¹ Zama iri go ga maa baaru kan aran game ra boro fooyan goono ga hawfunay goray te. I si ga goy baa kayna, amma kawlanteyan no. ¹² Borey din dumi yan binde iri goono g'i lordi k'i yaamar Rabbi Yesu Almasihu maa ra ka ne i ma goy da laakal kanay ka ngey bon gwaayandi mo. ¹³ Aran mo nya-izey, aran ma si farga nda ihanno teeyan. ¹⁴ Boro kulu kan mana iri sanno gana kan go tira wo ra, aran ma haggoy da bora din, aran ma si margu nd'a, zama a ma du ka haaw. ¹⁵ Aran ma s'a lasaabu danga ibare cine bo, amma aran m'a yaamar danga nya-ize cine. ¹⁶ Sohon Irikoy bumbo, kan ga ti laakal-kanay-koy m'aran no laakal kanay alwaati kulu da mate kulu kan no. ¹⁷ Rabbi ma goro aran kuku banda. Ay bulos, ay fooyano neeya d'ay bumbo kamba. Woone no ga ti seeda ay tirey kulu ra. ¹⁸ Ya-cine no ay goono ga hantum. Iri Rabbi Yesu Almasihu gomno ma bara aran kulu banda.