¹ Woodin sabbay se no, waato kan iri mana ye ka hin suuru koyne, iri di kan a ga boori iri hinne ma goro atina kwaara. ² Iri mo na iri nya-izo timotiyos donton, kan ga ti Irikoy goyteeri Almasihu baaru hanna rra. ³ Iri n'a donton zama a m'ran sinji, a m'aran biney gaabandi mo aran cimbeero ra, hala boro kulu ma si ye banda masiibey din sabbay se. Zama aran bumbey ga bay kan i na woodin yan waadu iri se. ⁴ Zama haciika za iri go aran do, iri soobay ka ci kan taabi ga ba ka kaa iri gaa. Kala woodin te mo, mate kan aran ga bay. ⁵ Woodin sabbay se no ay mo, waato kan ay mana du ka hin suuru koyne, ay donton hal ay ma du k'aran cimbeero bay, a ma si te mate kulu kan cine no, siikwa m'aran si hal iri goyo ma ciya yaamo. ⁶ Amma sohon kan timotiyos kaa ka fun aran do,a kande iri se baaru hanno aran cimbeero d'aran baakasina bon. A ne aran gonda fonguyan hanno iri se waati kulu. A no mo kan aran gonda iri diyan muraadu, danga mate kan iri mo gonda aran diyan muraadu. ⁷ Woodin sabbay se, nya-izey, iri taabey d'iri kankamey kulu ra, iri du bine-gaabi aran sabbay se aran cimbeero do. ⁸ Zama sohon d'ran goono ga sinji Rabbi ra, iri wo ga funa. ⁹ Zama saabuyan woofo dumi no iri ga ye ti Irikoy se aran sabbay se, da farhan kulu kan iri goono ga te se aran sabbay se Irikoy jine? ¹⁰ Cin da zaari iri goono ga te adduwa gumo iri ma du ka di aran moydumey ka han kan gaze toonandi aran cimbeero ra. ¹¹ Sohon Irikoy kan ti iri Baabo bumbo, d'iri Rabbi Yesu m'iri fonda soola hal iri ma du ka kaa aran do. ¹² Rabbi mo ma nan aran ma koy jina ka tonton baakasinay ra aran da care se da borey kulu se mo, mate kan cine iri wano mo goono ga te aran se. ¹³ Aran ma koy jina ka tonton baakasinay ra hal a ma aran biney sinji, sinjiyan kan sinda jance, hananyan ra iri baaba Irikoy jine, iri Rabbi Yesu kaayano alwaato ra, waati kan a ga kaa, nga nda nga hanantey kulu nga banda.