¹ Zama, nya-izey, aran bumbey ga bay kan iri furoyan aran do mana te yaamo. ² Iri jin ka maa gurzugay da wowi boobo filibi kwaara ra, mate kan aran ga bay. Amma iri te bine-gaabi iri Irikoyo ra ka Irikoy baaru hanna salan aran se, baa kan gaabakasina boobo go no. ³ Zama iri yaamaryan, manti siiriyan ra no a go, manti nda ziibi wane mo no, manti mo gulinci ra no. ⁴ Amma mate kan cine Irikoy n'iri gosi hal iri bara yaddante a se, hal a na baaru hanna dan iri kambe ra, yaadin cine no iri goono ga salan. Iri go ga salan manti zama iri ma kaan borey se bo, amma zama iri ma kaan Irikoy se, nga kan g'iri biney neesi. ⁵ Zama aran ga bay kan iri mana sanni kaanoyan ci baa ce fo. Iri mana sanni Ci biniyay kobay ra,(Irikoy no ga ti seeda). ⁶ Iri mana darza ceeci mo borey do, d'aran do no wala boro fo do no, baa kan iri gonda dabari iri m'aran tinandi, iri kan ga ti Almasihu diyey. ⁷ Amma iri ciya baanikomyan aran game ra, danga mate kan cine ize hampako ga haggoy da nga izey. ⁸ Yaadin no iri mo iri gonda aran muraadu gumo. Iri maa kaani iri m'aran no, manti Irikoy baaru hanna hinne bo, amma baa iri fundey mo, zama aran ciya iri se baakasinay hari gumo. ⁹ Nya-izey, aran ga fongu nda iri goyo d'iri taabo. Iri goy cin da zaari zama iri ma si boro kulu tinandi aran game ra. Yaadin no iri te ka Irikoy baaru hanna waazu aran se. ¹⁰ Aran ya seedayan no goray hanna, da adilitaray gora, da gora kan sinda jance kan dumi iri cabe aran game ra, aran kan goono ga cimandi. ¹¹ Irikoy mo ga ti seeda. Aran ga bay mate kan iri goro aran boro fo kulu se, sanda baaba nda nga ize cine. ¹² Iri n'aran yaamar, iri n'aran bine gaabandi, iri n'aran gwaaray aran ma diraw te kan ga saba nda Irikoy beerandiyan, nga kan g'aran ce nga bumbo koytara nda nga darza ra. ¹⁴ Zama aran, ay nya-izey, aran kulu ciya dondonkoyan Irikoy margey kan yan go yahudiya ra Almasihu Yesu ra se. Xama aran mo na taabi han aran dumey kambe ra sanda mate kan i na taabi han yahudancey do. ¹⁵ Ngey no ka Rabbi Yesu nda annabey wi. I n'iri mo gaaray. I si kaan Irikoy se, i goono ga gaaba nda borey kulu mo. I goono g'iri ganji iri ma salan dumi cindey se, hal i ma du faaba. ¹⁶ Woodi gaa no i ga ngey zunubey toonandi alwaati kulu. Amma Irikoy futay toonanta zumbu i bon. ¹⁷ Nya-izey, i n'iri fay d'aran alwaati kayna, manti bine ra bo, amma gaaham ra. Amma iri wo, iri ga kookari ka tonton da anniya, iri ma du ka di aran moydumey. ¹⁸ Zama iri ga ba iri ma kaa aran do, sanku fa ay bulos, ay ba ay ma kaa aran do kan manti ce fo, amma saytan n'iri ganji. ¹⁹ zama ifo ga ti iri beeja, iri farhan, d'iri farhan bontoba? Manti aran no, iri Rabbi Yesu jine a kaayano waate? ²⁰ Zama aran no ga ti iri darza d'iri farhan.