¹ Manti ay wo burcini no? Manti ay wo diya no? Manti ay wo di iri Rabbi Yesu? Manti aran wo ay goyo no Rabbi ra? ² Da boro foyan do ay wo manti diya no, kulu nda yaadin aran do ay ya diya no, zama aran wo ay diyataray kawatimi no Rabbi ra. ³ Woone ga ti ay tuyano kan ay g'ay bon fansa sambu, borey se kan yan go g'ay gosi. ⁴ Manti iri gonda fondo iri ma du gwa-da-han? ⁵ Manti iri gonda fondo iri ma naaru nda wande kan ga ti cimandiko, danga mate kan diya cindey go ga te, da Rabbi nya-izey, da kefas mo. ⁶ Wala in da barnaba, iri hinne no ka sinda fonda iri ma si goy te? ⁷ Sooje woofo no go soojetaray ra kan ga nga bon bana? May ga reyzin kaali tilam kan si a albarka gwa? May no ga alman kuru kan si kuro wa han? ⁸ Wala ay go ga hayey din ci adam-izey ciyan hinne bon no? Manti yaadin no tawreto mo ci? ⁹ Zama Musa asariya ra i n'a hantum ka ne:((Yeeji kan go ga kara, ni ma si takunkum dan a gaa.)) E day yeeji hinne no Irikoy ga haggoy d'a? ¹⁰ Wala manti daahir iri sabbay se no a na woodin ci? Oho me iri sabbay se no a n'a hantum. Zama boro kan go ga far, a ga hima a ma far da beeje. Boro kan go ga kara mo, a ma beeje dan kan nga ga du a ra. ¹¹ D'iri na biya hanno hayey duma aran se, sohon d'iri g'aran ndunnya harey wi, woodin hari bambata no, wala? ¹² Hala boro fooyan ga du dabari wo aran bon, manti iri banda ciine no? Kulu nda yaadin, iri mana goy dabaro din bon, amma iri go ga suuru nda hay kulu, hal iri ma si Almasihu baaru hanna ganji jina-koyan. ¹³ Aran mana bay no kan borey kan yan go ga hananyan goy te Irikoy windo ra, i go ga du ngey gwaaro Irikoy windo do? Borey mo kan yan go ga sargay feema goyo te, i go ga du ngey baa feema wane gaa. ¹⁴ Yaadin mo no, Rabbi waadu borey kan yan go ga basru hanna waazu se, i ma funa nda baaru hanna waazo din. ¹⁵ Amma ay mana goy nda hayey din kulu. Ay si ga woone yan hantum hal borey ma te ay se yaadin bo. Don ay ma bu, a ga bisa boro fo ma ay farha wo ye yaamo. ¹⁶ Zama d'ay go ga baaru hanna waazu, manti fooma hari no ay se. A ga tilas ay gaa no. Zama kaari ay, d'ay si baaru hanna waazu! ¹⁷ Zama d'ay go ga woodin te ay yadda bon, kulu ay gonda alhakku. Amma za kan manti nd'ay bon miila no, han kan Irikoy talfi ay gaa day no ay goono ga te. ¹⁸ Ifo binde ga ti ay alhakko? Nga neeya: waati kan ay go ga baaru hanna waazu, ay ma si hay kulu ceeci aran gaa, zama ay ma si goy da dabaro kan go ay se baaru hanna ra. ¹⁹ Zama baa kan ay ya burcini no, ay n'ay bon te boro kulu se bannya hal ay ma du boro boobo ka tonton. ²⁰ Yahudancey se ay ciya danga yahudance, hal ay ma du yahudancey. Borey kan go asariya ganayan ra se, ay ciya danga asariya ganako(baa kan ay si asariya fonda ra), hal ay ma du asariya ganakoy. ²¹ Borey kan sinda asariya se, ay ciya sanda boro kan sinda asariya, hal ay ma du ngey kan yan sinda asariya.(Manti danda ay si ga Irikoy asariya gana no bo, amma Almasihu asariya ganayan ra n'ay go). ²² Londobuuney se ay ciya londobuuno hal ay ma du londibuuney. Borey kulu se, ay n'ay bon ye hay kulu, hala nda mate kan cine no kulu ay ma afooyan faaba. ²³ Ay go ga woone kulu te mo baaru hanna sabbay se, hal ay ma du baa baaru hanna albarka ra. ²⁴ Manti aran ga bay kan borey kan go ga zuru yoonay ra kulu go ga zuru no,amma boro follon day no ga du ka yana? Yaadin gaa, aran ma zuru nda mate kan gaa aran ga du ka yana. ²⁵ Boro kulu mo kan go ga gurjay te foorey do, i ga hin ngey bon hay kulu ra. Borey din goono g'a te hal ngey ma du kobto bontobay kan ga lakaw, amma iri wo go g'a te hal iri ma du bontobay kan si halaci. ²⁶ Yaadin cine no ay go ga zuru nd'a, manti nda sikka. ²⁷ Yaadin mo no ay go ga kutubo te d'a, manti da haw ra karyan. Ay go g'ay gaahamo taabandi k'a dan tamtaray ra,zama a ma si te, waato kan ay waazu afooyan se, a banda i m'ay bumbo furu.