¹ Zama nya-izey, ay si ba aran ma jan ka bay kan iri kaayey kulu goro buru yuma cire, ikulu na teeko danandi mo. ² ikulu du baptisma Musa ra buro teeko do. Ikulu na gwaari dumi follon gwa kan fun Irikoy do. ³ Ikulu na hari dumi follon han mo kan fun Irikoy do. ⁴ Zama tondo kan fun Irikoy do kan go i banda din gaa no i han. Tondo din mo ga ti Almasihu. ⁵ Amma i boro boobo, Irikoy mana maa i kaani. A sabbay se no a n'i buukoy say-say ka furu ganjo ra. ⁶ Hayey binde bara misayan iri se,hal iri ma si hari laaloyan bini, mate kan cine ngey wo bini. ⁷ Aran ma si te tooru ganakoyan mo, mate kan cine i boro fooyan te,mate kan a go hantumante ka ne:((Jama goro ganda zama ngey gwa ka han, i tun mo zama ngey ma fooru se.)) ⁸ Iri ma si zina mo, mare kan i boro fooyan te. Zari follon ra i boro zambar waranka cindi hinza no bu. ⁹ Iri ma si Rabbi si mo, mate kan i boro fooyan n'a si, gondey mo n'i halaci. ¹⁰ Aran ma si jance mo, mate kan i boro fooyan te, i halaci mo halaciyamkoyo do. ¹¹ Hayey din kulu te i gaa danga misayan. I n'i hantum mo ka te iri se kaseetiyan hari, iri kan yan zamaney toonandiyan kaa iri gaa. ¹² Woodin sabbay se boro kan go ga tammaha nga go ga kay, a ma haggoy nga ma si kan. ¹³ Siyan kulu mana du aran kala day wo kan dumi ga kaa boro kulu gaa. Amma Irikoy ya naanaykoy no kan si ta aran ma du siyan kan ga bisa aran hina, amma siyano alwaato ra no a ga faaba fondo te aran se hal aran ma du ka hin a. ¹⁴ Woodin sabbay se, ay baakoy, aran ma zuru tooru ganayan se. ¹⁵ Ay go ga salan danga laakalkooniyan se, aran ma guna han kan ay go ga ci. ¹⁶ Gaasiya kan ra albarka go, kan se iri ga Irikoy sifa, manti nga no g'iri markasina da Almasihu kuro cabe? ¹⁷ Buuru kunkuno kan iri ga ceeri mo, manti nga no g'iri markasina da Almasihu gaahamo cabe? Zama buuru kunkuni follonka no go, iri kan ga ti iboobo, iri ciya gaaham follon, zama iri kulu ga margun kunkuni follonka din gaa. ¹⁸ Wa guna Israyla kunda. Borey kan yan go ga sargayey gwa kan i kande sargay feema do, manti i ga margu nda sargay feema no? ¹⁹ Yaadin gaa ifo no ay go ga ne? Han kan i sarga tooru se ya hay fo no? Han kan i sarga tooru se ya hay fo no, wala tooru bumbo ya hay fo no? Abada! ²⁰ Amma han kan dumi cindey go ga sarga toorey se, i go g'a sarga follayey se, manti Irikoy se no. Ay si ba mo aran ma margu nda follayey. ²¹ Aran sin hin ka Rabbi gaasiya han, da follayey wano mo. Aran si hin ka margu Rabbi gwaaro do, da follayey wano mo. ²² Wala iri go ga Irikoy zukku hal a ma canse? Iri ga bis'a gaabi no? ²³ Hay kulu ga halal, amma manti hay kulu no i ga hima ka te. Hay kulu ga halal, amma manti hay kulu no ga jina-koyyan te. ²⁴ Boro kulu ma si nga bon nafa ceeci, amma day han kan ga nafa te nga gorokasin se. ²⁵ Hay kulu kan fawakoy ga neera, aran m'a gwa. Aran ma si hayyan kulu te bine lasaabu fonda ra. ²⁶ Zama: (( gande ya Rabbi wane no, nga nda hay kulu kan go a ra.)) ²⁷ Da boro kan mana cimandi n'aran ce gwaari se, aran yadda ka koy mo,to, gwaari kulu kan i ga jisi aran jine,aran ma soobay k'a gwa. Aran ma si hayyan kulu te bine lasaabu fonda ra. ²⁸ Amma da boro fo ci aran se ka ne:(( i na woone sarga tooru se)), aran ma s'a gwa, bora kan n'a cabe aran se sabbay se, da bine lasaabu sabbay se mo. ²⁹ Manti sanda ni bine lasaabo no ay go ga ne, amma day boro fa din wano. Zama ifo se no ay g'ay hina neesi boro fo bine lasaabo bon. ³⁰ D'ay go ga gwa da saabuyan, ifo se no i g'ay jance nda hari laalo, hay fo bon kan ay na Irikoy saabu? ³¹ Yaadin gaa d'aran go ga gwa, wala aran go ga han, wala hay kulu kan aran go ga te, kala aran ma ikulu te Irikoy darza se. ³² Aran ma si ciya katiyan hari yahudancey, wala dumi cindey, wala Irikoy marga se. ³³ Wa ciya danga ay cine, mate kan hay kulu ra ay go ga kaan boro kulu se. Ay s'ay bon nafa ceeci, ammaboro boobo wane, hal i ma du faaba.